ಡಾ ನರಸಾಪೂರ & ಪರಿವಾರ

143. ಮಾನಾಭಿಮಾನ ನಿನ್ನದೇ, ಶ್ರೀ ಲಕುಮಿ ವಲ್ಲಭ || ಪ ||

ನಿನ್ನದೇ ಸಕಲ ಸಂಪದವು || ಅ ||

ಕ್ಷಣದಿ ಅಟ್ಟಕ್ಕೇರಿಸಿ ಕಾಣದ ಸೌಭಾಗ್ಯವೀವೆ |

ಅನೇಕ ಮದಗಳಿತ್ತು ಮಿನುಗಿಸುವೆ ||

ಚಿನ್ಮಯ ರೂಪದಿ ಸಲಹುವೆ |

ಘನ್ನ ಮಹಿಮೆ ಕೃಪೆ ಸುರಿಸುತ || 1 ||

ಚೆನ್ನಿಗ ರಾಯನ ನೋಟ ಸರಿದರೆ |

ಬನ್ನ ಬಡಿಸುವೆ ಈ ಸಂಸಾರದಿ ||

ಆಣೆ ಮಾಡಿ ಹೇಳುವೆ ಶ್ರೀಕೃಷ್ಣವಿಠ್ಠಲನ |

ಪೂರ್ಣ ಅರಿತವರ್ಯಾರು ಮೂರ್ಲೋಕದೊಳಿಲ್ಲ || 2 ||

144. ಏನಾದರೊಂದನ್ನು ಕರುಣಿಸೆನಗೆ ದೇವಾ |

ಮುನಿಯೋಗಿಗಳಿಗೆ ಪಾದದ್ವಯವಿತ್ತೆ || ಪ |

ನಖದಿಂದ ಗಂಗೆಗೆ ಜನುಮವಿತ್ತೆ |

ಸಖ ಪಾರ್ಥನಿಗೆ ಜ್ಞಾನವನಿತ್ತೆ ||

ಕುಕ್ಷಿಯೊಳು ಬ್ರಹ್ಮಾಂಡಗಾಶ್ರಯವಿತ್ತೆ |

ಲಕ್ಷ್ಮಿಗೆ ವಕ್ಷಸ್ಥಳ ವಾಸವವಿತ್ತೆ || 1 ||

ಪ್ರಲಯದಿ ಸಕಲ ಜೀವರುದರಲಿಟ್ಟೆ |

ವಾಲಿಯ ತರಿದು ಸುಗ್ರೀವಗೆ ರಾಜ್ಯವನ್ನಿತ್ತೆ ||

ಬಾಲಿಕೆ ತ್ರಿವಕ್ರೆಗೆ ಸುಂದರ ರೂಪವಿತ್ತೆ |

ಬಲಿಯ ಪಾತಾಳಕ್ಕೊತ್ತಿ ನಿನ್ನನೇ ಇತ್ತೆ || 2 ||

ಧ್ರುವಗೆ ವರದಿ ಚಿರಸ್ಥಾನವನಿತ್ತೆ |

ಸುವಧು ದ್ರೌಪದಿ ಕರೆಗೆ ವಸ್ತ್ರವನಿತ್ತೆ ||

ಪವನಪುತ್ರಗೆ ಸಂಪೂರ್ಣಾಲಿಂಗನವಿತ್ತೆ |

ಭವಭಯ ಪರಿಹರಿಸೋ ಶ್ರೀಕೃಷ್ಣವಿಠ್ಠಲ || 3 ||

"ಭ್ರಮರಗೀತೆ"

145. ಮೂರ್ಖರಾದೆವು ನಾವು ಹೇ ! ಉದ್ಧವ |

ಏಕೋಭಾವದಿ ನೆನೆದವನ ರೂಪವ || ಪ ||

ಶಿಕ್ಷಿಸದೇ ನಮ್ಮ ಅಪಚಾರ ಲಕ್ಷಿಸದೇ |

ಸುಖವನಿತ್ತು ತಣಿಸಿದವ ಮನಕೆ || ಅ ||

ಬೀಸುವ ಗಾಳಿಯೇ ಗುಯ್ಗುಡುವ ಭ್ರಮರವೇ |

ಕಸ್ತೂರಿ ಬೊಟ್ಟನಿಟ್ಟು ವನಮಾಲೆ ಧರಿಸಿದ ||

ವತ್ಸಾಂಕಿತ ಹೃದಯ ನಮ್ಮೆಲ್ಲರ ಕಣ್ಮಣಿ |

ವಶವಲ್ಲ ತಾನೊಬ್ಬರ, ಸಕಲರೂ ಅವನವಶ || 1 ||

ಬೇಗ ಬರುವೆನೆಂದು ಪೇಳಿ ಪೋದವನ |

ಮಂಗಳೆಯರೆಲ್ಲಾ ಅವನ ಬರವ ಕಾಯುತ ||

ಅಂಗಸಂಗ ರಾಸಲೀಲೆಯ ನೆನೆ ನೆನೆಸಿ |

ಕಂಗಳಾಶ್ರುವಿನಿಂದ ತುಂಬಿ ಕಾಯುತಿರೆÉ || 2 ||

ಲಕ್ಷಿಸದೇ ಗೋಪಿಯರ ಅಳಲು |

ಗೋಕುಲ ಬಿಟ್ಟು ಭರದಿಂ ತೆರಳಿದವನ ||

ಮೋಕ್ಷರಸ ವೀಕ್ಷಿಸುತ ಕಾಯುತಿಹೆವು |

ಲಕ್ಷ್ಮೀಪತಿ ಶ್ರೀಕೃಷ್ಣವಿಠ್ಠಲನ ತಂದು ತೋರು || 3 ||

"ಕುಚೇಲೋಪಾಖ್ಯಾನ"

146. ಸಾಂದೀಪನಿ ಗುರ್ವಾಶ್ರಮದಲ್ಲಿದ್ದ ಸಹಪಾಠಿ ತಾನೆಂದು ಬೀಗದೆ |

ಅಂದು ಹೊರಟ ಕುಚೇಲ ಬ್ರಾಹ್ಮಣನೊಬ್ಬ ಶ್ರೀಕೃಷ್ಣ ದರುಶನಕೆ || 1 ||

ಮಡದಿ ತಂದಿತ್ತ ಎರವಲು ಅವಲಕ್ಕಿ ಹರಕು ಬಟ್ಟೆಗಂಟು ಕಂಕುಳಲಿಟ್ಟು |

ಎದುರಲವನ ಕಾಣಲು ಕಂಬನಿ ಮಿಡಿದು ತೆÀಕ್ಕೈಸಿ ಬಿಕ್ಕುತ ಸ್ಮರಿಸಿ ಕಳೆದ ದಿನಗಳ ||2||

ಪಾದ ತೊಳೆದು ಬ್ರಾಹ್ಮಣನ ಪರಿಪರಿಯಲಿ ಉಪಚರಿಸಿದ ರುಕ್ಮಿಣಿ ಸಮೇತನಾಗಿ |

ಎದ್ದು ಹೋಗಿ ಬರುವೆನೆಂದವನ ಸಂತೋಷದಿ ಬೀಳ್ಕೊಟ್ಟ ಸರ್ವವಿದಿತನು || 3 ||

ಬೇಡದೇನೂ ಹಿಂತಿರುಗಿದವ ಕಂಡ ಸತಿ ಸುತರ ಸಂಪದ್ಭರಿತ ಆನಂದಿತರ |

ನೀಡಿದರೆನಗೆ ನಿನ್ನೇ ನೀಡು ಬೇರೇನೊ ಬೇಡದಂತೆ ಮಾಡು ಎಂದ ಕಣ್ಣಾಲಿ ತುಂಬಿ ||4||

ಬೇಡದಿದ್ದರೂ ಭಕ್ತನ ಮನದಿಚ್ಛೆ ಅರಿತುಕೊಳ್ಳುವ ಹೃದ್ಗುಹಾವಾಸಿ |

ಒಡೆಯ ಶ್ರೀಕೃಷ್ಣವಿಠ್ಠಲ ಮಾಡಿದುಪಕಾರವ ನೆನೆನೆನೆದು ಪುಳಕಿತನಾದ || 5 ||

"ಶ್ರೀ ಮದ್ಭಾಗವತ"

147. ನಾರಾಯಣ ಮಂತ್ರ ಜಪಿತ ನಾರದ ಪ್ರಾರ್ಥಿಸಿದಂತೆ ಬಾ- |

ದರಾಯಣ ರಚಿಸಿದ ಶ್ರೀಮದ್ಭಾಗವತ ಆನಂದದಿ || 1 ||

ವಿರಾಗಿ ಶುಕಮುನಿಗೆ ಪೇಳಿದರ್ಮೊದಲು ಒಲುಮೆಯಿಂದಲಿ |

ಹರಿ ಪ್ರೇರಿತ ಶುಕರು ಸಂಚರಿಸುತ ಬಂದರು ಗಂಗಾ ತಟಕೆ || 2 ||

ಪರೀಕ್ಷಿತರಾಜ ಪರಮಭಾಗ್ಯದಿ ಭಾಗವತೋಪದೇಶ ಪಡೆದವರಿಂದಲಿ |

ನಿರ್ಮಲ ಮನದಿ ನಿರೀಕ್ಷಿಸುತ ಕಾಲಾಗಮನ ಸಪ್ತದಿನ ಪರ್ಯಂತ || 3 ||

ಖಟ್ವಾಂಗರಾಜ ಮೂಹುರ್ತದಿ ಸಾಧಿಸಿದ ಸತ್ಯಲೋಕ ಖಗಪತಿ ಧ್ಯಾನದಿ |

ಸಟೆಯಲ್ಲ ಶ್ರೀಮದ್ಭಾಗವತ ನೀಡುವುದು ಸಕಲೇಷ್ಟಗಳ ಇಹಪರದಿ || 4 ||

ಪುಷ್ಟಿ ಕೊಡುವುದು, ಸಂತುಷ್ಟಿ ಕೊಡುವುದು ಸಕಲ ಸಜ್ಜನರ ಮನಕೆ |

ದಿಟವಿದು ಶ್ರೀ ಕೃಷ್ಣ ವಿಠ್ಠಲನಾಣೆಗೂ ಸತ್ಯ, ಸತ್ಯ, ಪರಮ ಸತ್ಯ || 5 ||

148. ದರುಶನ ತೋರೋ ದಯಾನಿಧೇ ಘನಶ್ಯಾಮ |

ದುರಿತರಾಶಿ ತರಿದು ಒಲವಿಂದ ದಯೆ ತೋರು || ಪ ||

ಕರೆದಾಕ್ಷಣ ಬಂದು ಕರಿಯ ಪೊರೆದೆ |

ಆರ್ತಳಾದ ದ್ರೌಪದಿಗೆ ಅಕ್ಷಯಾಂಬರವಿತ್ತೆ ||

ಪೋರ ಪ್ರಲ್ಹಾದಗೆ ಇದ್ದಲ್ಲಿ ಬಂದು ದರ್ಶನವಿತ್ತೆ |

ಹರಿಧ್ಯಾನಿಪ ಧ್ರುವಗೆ ಒಲಿದುಎದುರು ನಿಂತೆ || 1 ||

ಕರೆಯದೆಯೆ ಸರಳ ಗೋಪಾಲರೊಡನಾಡಿದೆ |

ನಾರಾಯಣನೆಂದೊಮ್ಮೆ ಕರೆಯಲು ಮೋಕ್ಷವಿತ್ತೆ ||

ಆರ್ತಕರೆಯಾಲಿಸಿ ಒದಗುವ ನರಹರಿಯೇ |

ಭರ್ತೃ ಶ್ರೀಕೃಷ್ಣವಿಠ್ಠಲಾ ನಿನ್ನ ದರ್ಶನ ಎನಗೆಂದೀವೆ ? || 2 ||

149. ಸ್ವರ್ಗಾದಿ ಲೋಕಗಳಲ್ಲಿ ಇಡಬೇಡಾ ಎನ್ನನ್ನು |

ಸರ್ವದಾ ಶ್ರೀಕೃಷ್ಣವಿಠ್ಠಲ ನಿನ್ನ ಪಾದತಳದಲ್ಲಿಡು || 1 ||

ಜಡಮತಿಯಾಗಲಿ ಮತಿವಂತನಾಗಲಿ ಪ್ರತಿ ಜನುಮದಿ |

ದೃಢ ಭಕುತಿ ನಿನ್ನಲಿ ನೀಡು ಶ್ರೀಕೃಷ್ಣವಿಠ್ಠಲ || 2 ||

ಭಕ್ತಜನರು ಮುಂದೆ ನೀನವರ ಹಿಂದೆಯಂತೆ

ಭಕ್ತವತ್ಸಲ ಶ್ರೀಕೃಷ್ಣವಿಠ್ಠಲ ಸದಾಭಕ್ತಿ ನೀಡು || 3 ||

ಭಕ್ತಿಯಿಂದ ಬೇಡಿದ್ದು ನೀಡುವ ಅಕ್ಷಯದಾಯಕ |

ಶ್ರೀಕೃಷ್ಣವಿಠ್ಠಲ ನಿನ್ನೇ ಸದಾ ಬೇಡುವಂತೆ ಮಾಡು || 4 ||

ಯಾವ ಪುಣ್ಯ ಲೋಕದಲ್ಲೂ ಆಸೆ ಇರಿಸದೆ ಎನಗೆ |

ಕೈವಲ್ಯದಾಯಕ ಶ್ರೀಕೃಷ್ಣವಿಠ್ಠಲ ಸೇವೆ ಭಾಗ್ಯಕರುಣಿಸು || 5 ||

ಅಜ್ಞಾನದಿ ನಾ ಮರೆತರೂ ನೀ ಮರೆಯದಿದ್ದರೆ ಸಾಕು |

ಸುಜ್ಞಾನಮೂರ್ತಿ ಶ್ರೀಕೃಷ್ಣವಿಠ್ಠಲನ ಕೃಪೆಯಾದರೆ ಧನ್ಯೆ || 6 ||

"ಮಾನಸ ಪೂಜೆ"

150. ದಿವ್ಯ ಪೂಜೆ ಮಾಡಿರೋ ಭಗವಂತನ ಮನದಣಿಯ |

ಕಾಸು ಖರ್ಚಿಲ್ಲದೆ ಹೊರಗಿರುವ ಸ್ವಾಮಿಯೇ ಅಂತರಂಗದಲ್ಲಿರುವನೆಂದು || ಪ ||

ಮನವ ಶುಚಿಮಾಡಿ ಸಾರಿಸಿ ಚಕ್ರಾಬ್ಜ ಮಂಡಲದಿ |

ಒಂದೇ ಮನದಿ ಕರೆದು ಉನ್ನತ ಪೀಠದಿ ಕುಳ್ಳಿರಿಸಿ ||

ಅಘ್ರ್ಯಪಾದ್ಯಾಚಮನ ಮದುಪರ್ಕದಿ ಉಪಚರಿಸಿ |

ಸಕಲ ಪವಿತ್ರ ಜಲ ಸ್ಮರಿಸಿ ಶುದ್ಧೋದಕ ಸ್ನಾನ ಮಾಡಿಸಿ || 1 ||

ಶ್ರೇಷ್ಠ ದುಕೂಲವ ಉಡಿಸಿ ಮೇಲೆ ವಸ್ತ್ರ ಹೊದಿಸಿರಿ |

ಸರ್ವಾಲಂಕಾರ ಮಾಡಿ ಕಿರೀಟ, ಹಾರ, ಕೇಯೂರ ||

ಕಡಗ, ಕಂಕಣ, ಮಕರಕುಂಡಲ, ಕಸ್ತೂರಿ ತಿಲಕ ಇಡಿ |

ತುಳಸಿ, ಶ್ರೀಗಂಧ, ಪುಷ್ಪದಿಂದ ಅರ್ಚಿಸಿ ಮೆಚ್ಚಿಸಿ || 2 ||

ಸರ್ವಭಕ್ಷ, ಭೋಜ್ಯ, ಫಲ, ತಾಂಬೂಲ ನೈವೇದ್ಯವ ಅರ್ಪಿಸಿ |

ಸರ್ವವಿಧ ಆರತಿ ಬೆಳಗಿ ಪ್ರದಕ್ಷಿಣ ನಮಸ್ಕಾರ ಸಲ್ಲಿಸಿ |

ಷೋಡಶೋಪಚಾರ ಒಂದೇ ಮನದಿ ಮಾಡಿ ಸಂತೋಷಿಸಿ |

ಸರ್ವ ಸಮರ್ಪಣವೆಂದು ತನ್ನನ್ನೇ ಶ್ರೀಕೃಷ್ಣವಿಠ್ಠಲಗರ್ಪಿಸಿ ಮಾನಸಪೂಜೆ ಮಾಡಿರಿ || 3 ||

151. ರಂಗಾ ನಿನ್ನ ಅಂಗಸಂಗವಿತ್ತು ಸಲಹೋ | ನಂದೇನೋ ಸಕಲವೂ ನಿನ್ನದೇ || 1 ||

ಸಂಸಾರ ಸೃಷ್ಟಿಸಿ ಸುಖ- ದುಃಖವಿತ್ತು | ಇಂದ್ರಿಯದಾಸೆಗೆ ಬಲಿಪಡಿಸಿ || 2 ||

ಸಂಚಿತ ಕರ್ಮ ಪ್ರಾರಬ್ಧವನುಣಿಸಿ | ಸಂದಣಿಸುವ ಲೆಕ್ಕಿಗ ಮಿತಿ ಉಂಟೇನೋ || 3 ||

ಬಂಧ ಮೋಕ್ಷ ಕೊಡುವ, ಬಿಡಿಸುವ | ಚೆಂದದ ಪರಿಪೂರ್ಣಗುಣ ಸಾಗರನೇ || 4 ||

ನುಂಗುವೆ ಸಕಲ ಲಯಕಾಲದಿ ಬಿಡದೆ | ಬೊಮ್ಮಾಂಡನಾಯಕ ಶ್ರೀಕೃಷ್ಣವಿಠ್ಠಲ || 5 ||

152. ಅಂತಿಲ್ಲ ಇಂತಿಲ್ಲ ಸುಳ್ಳಿನ ಕಂತೆಯೆ ಮೊದಲಿಲ್ಲ |

ಅಂತರಂಗದಿ ಅಂತರ್ಯಾಮಿ ಕಾಣಲು ಅಸಂಭವವೇನಿಲ್ಲ || ಪ ||

ಅಸಂಪ್ರಾಜ್ಞಾತ ಸ್ಥಿತಿಯೇ ಬೇಕಿಲ್ಲ, ಆಡಂಬರಗಳ ಮಾತೇ ಬೇಡಾ |

ಸರ್ವವ್ಯಾಪಿತ ಶ್ರೀಕೃಷ್ಣವಿಠ್ಠಲನ ದೃಷ್ಟಿಸಲು ಒಳಗಣ್ಣಿದ್ದರೆ ಸಾಕು || 1 ||

ಆನಂದದಿ ಮಾಡಿದ ಸುಕರ್ಮವ ಭಕ್ತಿಯಲಿ ಸಮರ್ಪಿಸೆ |

ಅನಂತ ಫಲ ಕೊಡುವ ನಮ್ಮ ಶ್ರೀಕೃಷ್ಣವಿಠ್ಠಲ ಬಿಡದೆ || 2 ||

ಸುರಾಸುರ, ಧನಿಕನಿರ್ಧನಿಕ ಎಂದು ಭೇದವಿಲ್ಲದೆ ಒಲಿವ |

ಆರ್ತಿಯ ಕರೆಗೆ ಓಡೋಡಿ ಬರುವ ನಮ್ಮ ಶ್ರೀಕೃಷ್ಣವಿಠ್ಠಲ || 3 ||

ಅಲ್ಲಿ ಇದ್ದಾನೆ ಇಲ್ಲಿ ಇದ್ದಾನೆ ಎನ್ನದೇ ಭಗವಂತನ ಸರ್ವತ್ರ ಕಾಣು |

ಅಚಿಂತ್ಯಾದ್ಭುತ ನಮ್ಮ ಶ್ರೀಕೃಷ್ಣವಿಠ್ಠಲ ಎಲ್ಲಿ ಕಡೆ ಕಂಡಾನು || 4 ||

ಆನಂದಪೂರ್ಣ ನಿತ್ಯತೃಪ್ತನಿಗೆ ಕೊಡುವುದೇನೂ ಬೇಕಿಲ್ಲ ಕೊಡುವುದಾದರೆ |

ಅಭಿಮಾನ ಬಿಟ್ಟು ಒಂದೇ ಮನದಿ ತನ್ನನೇ ಕೊಟ್ಟರೆ ಸಾಕು ಶ್ರೀಕೃಷ್ಣವಿಠ್ಠಲ ಸ್ವೀಕರಿಪ || 5 ||

153. ನಾ ಧನವಂತ ಸೌಭಾಗ್ಯವಂತ ಭಗವಂತನೆಂಬೋ |

ಸುಧನ ಪೊಂದಿದ ಮಾನವಂತ ||

ವಿಷಯ ಸುಖ ಬೇಡದ, ಅನ್ಯ ದೇವತಾರಾಧಿಸದ |

ಎಂದೆಂದೂ ಅಲ್ಪ ವರ ಅಪೇಕ್ಷಿಸದ ಗುಣವಂತ ||

ಹಿಡಿ ಹಿಟ್ಟಿಗಾಗಿ ಕಲ್ಪವೃಕ್ಷವ ಪೀಡಿಸದೇ ಸಂಸಾರತಾರಕ |

ಶ್ರೀಕೃಷ್ಣವಿಠ್ಠಲನ ಎಂದೆಂದೂ ಏನು ಬೇಡದ ಬುದ್ಧಿವಂತ |

ಬೇಡುವುದಾದರೆ ಮೋಕ್ಷಪ್ರದ ಅಕ್ಷಯನನ್ನೆ ಬೇಡುವೆ ||

154. ಅಲ್ಲಿ ಅಲೆದೆ ಇಲ್ಲಿ ಅಲೆದೆ ಎಲ್ಲೆಲ್ಲೊ ಅಂಡಲೆದೆ |

ಬಲ್ಲದೇ ನಿಜ ಸುಖದ ನೆಲೆಯಾ || ಪ ||

ಶೃಂಗಾರದಿ ಮೈಮೆರೆತೆ ಬಂಗಾರ ಭಗವಂತನರಿಯದೆ |

ಸಂಗ ತೊರೆಯದೆ ಮಂಗನಂತೆ ಕುಣಿದಾಡಿದೆ || 1 ||

ಸುತ್ತಿ ಸುತ್ತಿ ಸೋತು ಮತ್ತೆ ಗತ್ತು ಬಿಡದೆ |

ಆರ್ತತೆಯ ಭಾವ ಅರಿಯದೆ ಕರ್ತೃನ ಕಡೆಗಣಿಸಿದೆ || 2 ||

ಮಣಿಸಿ ಹಣೆಯ ಸಕಲೆಡೆ ಸುಣ್ಣವಾದೆನಾದರೂ

ಕಣ ಕಣದಲ್ಲಿರುವನ ಚಣ ಕಾಲವೂ ಕಾಣದಾದೆ || 3 ||

ಅಕ್ಷಯದಾತನ ಮರೆತು ಸಕಲಾಪೇಕ್ಷೆ ಬಯಸಿದೆ |

ಸಾಕ್ಷಿ ಶ್ರೀಕೃಷ್ಣವಿಠ್ಠಲನ ಪಾದಭಕ್ತಿಯೇ ನಿಜಸುಖದನೆಲೆ ಎಂದರಿಯದೆ || 4 ||

155. ಗುರು ಕರುಣೆಯಿಂದ ಹರಿ ಸ್ಮರಣೆಯಾಗಲಿ || ಪ ||

ನಿರಂತರ ಜಪದಿಂದ ಹರಿ ದರುಶನವಾಗಲಿ || ಅ ||

ಜಪ-ತಪಗಳೊಂದು ಅರಿಯದೆ |

ವೃತ ನೇಮಗಳೊಂದು ಸಾಧಿಸದೆ ||

ಸುಖಲೋಲುಪದಿ ಜೀವಿಸಿದೆ |

ಹೀಗೇ ಜನುಮ ಹೋಯಿತಲ್ಲ || 1 ||

ಸಾಧನ ಶರೀರವೆಂದು ತಿಳಿಯದೆ |

ವ್ಯರ್ಥವಾಗಿ ದಿನ ಕಳೆಯುತಾ ||

ಇನ್ನಾದರೂ ಗುರುಗಳೊಲುಮೆಯಿಂದ |

ಶ್ರೀಕೃಷ್ಣವಿಠ್ಠಲನ ಸೇವಾ ಭಾಗ್ಯಸಿಗಲಿ || 2 ||

156. ನಿನ್ನ ಸ್ಮರಣೆ ದಯಪಾಲಿಸೋ | ಜೀಯಾ | ನಿನ್ನ ಪ್ರೇರಣೆ ಇಲ್ಲದೆ

ದೊರೆಯದೋ ಈ ಭಾಗ್ಯ || ಪ ||

ಜ್ಞಾನಿ ನೀನು, ಅಜ್ಞಾನಿ ನಾ ನಿನ್ನ ಗುಣಗಳರಿಯೆ |

ಭಕ್ತಿಗೆ ಒಲಿದು ಮುಕ್ತಿಯ ನೀಡುವವ ನೀನೆ || 1 ||

ಅನಂತ ಗುಣಗಳ ಮಹಿಮನೇ, ಭವಪಾಶ ಮೋಚಕನೇ |

ಪಂಚಭೇದ, ತಾರತಮ್ಯ ಜ್ಞಾನ ಕೊಟ್ಟು ಸಲಹೋ ಕರುಣಾಕರನೇ || 2 ||

ನನ್ನನು ಅರಿಯೇ, ನಿನ್ನನು ತಿಳಿಯೇ ಅಸ್ವತಂತ್ರ ನಾನು |

ಸೂತ್ರಧಾರಿ ಶ್ರೀಕೃಷ್ಣವಿಠ್ಠಲ ಎಲ್ಲ ನೀನಾಡಿಸಿದಂತೆ || 3 ||

157. ಸದಾ ಸಿರಿವಂತ ಆಗುವಂತೆ ಅನುಗ್ರಹಿಸೋ ಸಿರಿವಲ್ಲಭ ನಿನ್ನ ದಯದಿ || ಪ ||

ಭಕ್ತಜನರ ಸಂಗದಿ ಕುಟುಂಬ ಸಿರಿವಂತವಾಗಲಿ |

ಸದಾ ನಿನ್ನ ನಾಮಜಪದಿ ಕೋಟಿ ಸಿರಿವಂತವಾಗಲಿ ||

ಎನ್ನ ಹೃದಯದಿ ನೀನೇ ನೆಲಸಿ ಲಕ್ಷ್ಮೀಪತಿ ನಿವಾಸವಾಗಲಿ |

ಸಮಾನ ಭಾವದಿ ಸರ್ವರಲಿ ಸರಸಿಜನಾಭನ ಕಾಣುವಂತಾಗಲಿ || 1 ||

ನಿನ್ನ ಪಾದ ದರುಶನದ ಆಶೆ ಮನದಿ ಹೆಚ್ಚುತಿರಲಿ |

ಎನ್ನ ಪಾಪರಾಶಿ ಎಂಬ ಬಡತನ ಕರಗಲಿ ||

ಭಕ್ತಿ, ಜ್ಞಾನದ ಧನಕನಕ ರಾಶಿ ಸಿಗುವಂತಾಗಲಿ |

ಶ್ರೀಕೃಷ್ಣವಿಠ್ಠಲನ ದಯದಿ ಈ ದುರಾಸೆ ಎಂದಿಗೂ ಇರಲಿ || 2 ||

158. ನಮಿಪೆ ಶ್ರೀಹರಿಪಾದಪದ್ಮಕೆ, ಮುಕುತಿಪಥ ತೋರುವಪಾದ |

ಅಮಿತ ಸೂರ್ಯ ಸಮಪ್ರಭ ನಖಕಾಂತಿಯುಕ್ತ ಪಾದ ||

ಋಷಿಮುನಿ ವಂದಿತ ಪಾದ, ಶಂಖ ಚಕ್ರಾಂಕಿತ ಪಾದ |

ಜಾಹ್ನವಿಜನಕ ಪಾದ, ಸರ್ವಲೋಕಗಳಳೆದ ಪಾದ || 1 ||

ಅಂಗುಷ್ಟದಿ ಭೂಮಿಯ ಒತ್ತಿದ ಪಾದ, ಜಾನಕಿ ಸೇವಿತ ಪಾದ |

ಅಹಲ್ಯೋದ್ಧಾರಕ ಪಾದ, ಶಬರಿ ಭಕ್ತಿಯಲಿ ಪೂಜಿಪ ಪಾದ ||

ದ್ವಿಜ ಸ್ಮರಿಸುವ ಪಾದ, ಸದಾ ಹೃನ್ಮನದಲ್ಲಿ ನೆನೆವ ಪಾದ |

ಭಕ್ತರಿಗೊಲಿದು, ದರುಶನದಿ ದಯಪಾಲಿಪ ಪಾದ, ಅದುವೇ ಶ್ರೀಕೃಷ್ಣವಿಠ್ಠಲನ ದಿವ್ಯಪಾದ || 2 ||

159. ನಿನ್ನ ಇಚ್ಛೆಯೇ ನನ್ನ ಇಚ್ಛೆಯಾಗಲಿ |

ನಿನ್ನ ಸೇವೆಯೇ ನನ್ನ ಕರ್ಮವಾಗಲಿ || 1 ||

ನಿನ್ನ ಧ್ಯಾನ ನಿರಂತರ ನನ್ನದಾಗಲಿ |

ನನ್ನ ಆತ್ಮ ಎಂದೂ ಪರಮಾತ್ಮ ನಿನ್ನದಾಗಲಿ || 2 ||

ನನ್ನದೆಂಬುದು ಎಲ್ಲಾ ನಿನ್ನದಾಗಲಿ |

ನನ್ನ ಮೇಲೆ ಸದಾನುಗ್ರಹ ನಿನ್ನದಿರಲಿ || 3 ||

ನಾನು ನಿನ್ನವಳೆಂದು ಮಾತ್ರ ಮರೆಯದಿರು |

ನನಗೆ ಶ್ರೀಕೃಷ್ಣವಿಠ್ಠಲನ ಸ್ಮರಣೆವೊಂದೇ ಸಾಕು || 4 ||

160. ಸುಗುಣಾಂತರಂಗ ಸಂಸಾರ ಭಯತಾರಕ |

ಸುಂದರ ಮೂರುತಿ ಸಕಲ ಪಾಪ ಪರಿಹಾರಕ || 1 ||

ಸವೋತ್ತಮ ಸರ್ವ ಪರಿ ಪಾಲಕ |

ಸರ್ವೇಶ ಸರ್ವ ಶಬ್ದವಾಚ್ಯ ಸರ್ವಜ್ಞ || 2 ||

ಸೃಷ್ಟಿಕರ್ತ ಸರ್ವಾಭೀಷ್ಟ ಫಲಪ್ರದಾತ |

ಸರ್ವಾಂತರ್ಯಾಮಿ ಶ್ರೀಕೃಷ್ಣವಿಠ್ಠಲ ಸಕಲರ ಸಲಹಲಿ || 3 ||

161. ಚದುರಂಗವ ನಾಡಿದ ಚದುರ ಚತುರ್ಯುಗದಿ || ಪ ||

ಚೆಂದದಿ ನೋಡಿ ಕಾಯಿಯ ನಡೆಸಿ ಮಾಯದಿ || ಅ ||

ಲೋಕವ ಹಾಸನ್ನಾಗಿಸಿ ಚೇತನಾಚೇತನರ ಕಾಯನ್ನಾಗಿಸಿ |

ಸಕಲರ ಅಂತರಂಗವರಿತು ತಾ ಮುನ್ನಡೆಸಿದ || 1 ||

ಸಾಧನೆ ಮಾರ್ಗದಿ ನಡೆದವರೆಷ್ಟೋ ಮನೆಗಳ ಹಾರಿ ಕುಣಿದವರೆಷ್ಟೋ |

ಕೊಂದವರೆಷ್ಟೋ ಕರ್ಮಾನುಸಾರದಿ ಕೊಲ್ಲಿಸಿ ಕೊಂಡವರೆಷ್ಟೋ || 2 ||

ಕುಣಿಸಿದಂತೆ ಕುಣಿವ ಬಿಂಬದ ಪ್ರತಿಬಿಂಬ ತಾನೆಂದರಿಯದೆ |

ಮಣಿದು ಸ್ವತಂತ್ರ ಸರ್ವೋತ್ತಮ ಶ್ರೀಕೃಷ್ಣವಿಠ್ಠಲನ ತಿಳಿಯದೆ ಬಳಲುತಾ || 3 ||