ಡಾ ನರಸಾಪೂರ & ಪರಿವಾರ

ಶ್ರೀ ಕೃಷ್ಣವಿಠ್ಠಲಪದಗುಚ್ಛ 2

ಆರುತಿ ಪದಗಳು

401. ಜಯ ಮಂಗಳಂ ನಿತ್ಯ ಶುಭಮಂಗಳಂ |

ರಂಗನರ್ಧಾಂಗಿಗೆ ಮಂಗಳೆ ಶುಭಾಂಗಿಗೆ || ತಾಯೇ ||

ಪುಂಡರಿಕಾಕ್ಷನರಾಣಿಗೆ, ನಿತ್ಯಶುಭವ ತೋರುವಳಿಗೆ |

ನಿತ್ಯಮುಕ್ತಳಿಗೆ, ನಿತ್ಯವಿನೂತಳಿಗೆ | || 1 ||

ಪುರುಷೋತ್ತಮನ ವಕ್ಷನಿವಾಸಿನಿ ತೋಯಜಾಕ್ಷಿಗೆ|

ಹರಿಯಸೇವೆಯ ನಿರುತ ಮಾಡುವ ಸರಸಿಜಾಕ್ಷಳಿಗೆ || || 2 ||

ಭಕ್ತವತ್ಸಲೆ ತ್ರೀಜಗನ್ಮಾತೆ ಮಹಾಲಕ್ಷ್ಮಿಗೆ |

ಜಗನ್ನಾಥ ಶ್ರೀಕೃಷ್ಣವಿಟ್ಠಲ ಪ್ರಿಯಳಿಗೆ | || 3 ||

ಎಎಎ

402. ಜಯಮಂಗಳಂ, ನಿತ್ಯಶುಭಮಂಗಳಂ |

ಹರೇ ಶ್ರೀನಿವಾಸಗೆ, ಶ್ರೀಲಕ್ಷ್ಮೀನಿವಾಸಗೆ ||

ನಿತ್ಯನವನೂತನಗೆ, ಜಯಮಂಗಳಂ |

ಮಾವನಕೊಂದವಗೆ, ಮನುಜೋದ್ಧಾರನಿಗೆ ||

ಗೋವಳಕಾಯ್ದವಗೆ, ಗೋವರ್ಧನಧಾರಿಗೆ |

ಕಾಳಿಯಮರ್ದನಗೆ, ಕಲಿಯಭಂಜಕನಿಗೆ ||

ಪೂತನಿಸಂಹಾರಕಗೆ, ಪರಮಪವಿತ್ರಗೆ |

ಬೆಣ್ಣೆಯಕದ್ದವಗೆ, ಮೊಹಿನಿರೂಪದವಗೆ ||

ರುಕ್ಮಿಣಿಯಗೆದ್ದವಗೆ, ಗೋಪಿಜನಪ್ರಿಯಗೆ |

ಪಾರ್ಥಸಾರಥಿಗೆ, ಪುರುಷೋತ್ತಮನಿಗೆ ||

ದುಷ್ಟರಸಂಹಾರಿಗೆ, ಶಿಷ್ಟರ ಪರಿಪಾಲಕಗೆ |

ಪ್ರೀಯ ಶ್ರೀಕೃಷ್ಣವಿಟ್ಠಲಗೆ, ಮಂಗಳಮೂರುತಿಗೆ ||

ಎಎಎ

403. ಜಯಮಂಗಳಂ, ಜಯಮಂಗಳಂ, ನಿತ್ಯಮಂಗಳಂ |

ಮನೋನಿಯಾಮಕನಿಗೆ, ಮನುಜೋದ್ಧಾರಗೆ ಮಂಗಳಂ, ಜಯಮಂಗಳಂ ||

ಮತ್ಸ್ಯಾವತಾರಿಗೆ, ಮಂದರೋದ್ಧಾರಕನಿಗೆ ||

ಬ್ರಹ್ಮಾಂಡವನೆ ಪೊತ್ತವನಿಗೆ, ಮೂರುಪಾದ ಅಳೆದವಗೆ |

ಮಗುವಿಗೆ ಅಭಯವಿತ್ತವಗೆ, ಮಾತೆಯ ಶಿರ ತರಿದವಗೆ ||

ಮಾತೃವಾಕ್ಯಪರಿಪಾಲಕಗೆ, ಮುರಹರ ಮುರಳಿವಾದಕಗೆ |

ಮನವ ಕೆಡಿಸಿದ ಮನುಜಗೆ, ಮದವ ಹೆಚ್ಚಿಸುವ ವಾಜಿಗೆ ||

ಮಂಗಳಾಂಗನಿಗೆ ಶ್ರೀಕೃಷ್ಣವಿಟ್ಠಲಗೆ ಮಂಗಳಂ ||

ಎಎಎ

404. ಜಯಮಂಗಳಂ ನಿತ್ಯ ಶುಭಮಂಗಳಂ || ಪ ||

ಭೂವೈಕುಂಠದಿ ನಿಂತವಗೆ ಶುಭಮಂಗಳಮಂ |

ಭೂವರಾಹಗೆ ಧರಣಿ ಬೇಡಿದವಗೆ ಶುಭಮಂಗಳಂ ||

ಸರ್ವಜ್ಞ ಹಯವನೇರಿ ಬೇಟೆಗ್ಹೋದವಗೆ ಶುಭಮಂಗಳಂ |

ಶ್ರೀವನಿತೆ ಪದ್ಮಾವತಿಯ ಕಂಡವಗೆ ಶುಭಮಂಗಳಂ || 1 ||

ಗಗನ ರಾಜ ಪುತ್ರಿಯ ಮೋಹಿಸಿದವಗೆ ಶುಭ ಮಂಗಳಂ |

ಮಗಳನ ಕೊಡುವಂತೆ ಧರಣಿದೇವಿಗ್ಹೇಳಿದವಗೆ ಶುಭಮಂಗಳಂ ||

ಜಗದೊಡೆಯ ಕನ್ಯೆಯ ಬೇಡಿದವಗೆ ಶುಭಮಂಗಳಂ |

ಆಗಸಪುರಕೆ ಬಕುಲಾವತಿಯ ಕಳುಹಿದವಗೆ ಶುಭಮಂಗಳಂ || 2 ||

ಶ್ರೀಲಕುಮಿಪತಿ ಕೊರವಿ ವೇಷಧರಿಸಿದವಗೆ ಶುಭಮಂಗಳಂ |

ಮೊಲೆಯುಡುವ ಕಂದನ ಪಿಡಿದವಗೆ ಶುಭಮಂಗಳಂ ||

ಕೋಲನೆ ಪಿಡಿದು ಬುಟ್ಟಿಯ ಧರಿಸಿದವಗೆ ಶುಭಮಂಗಳಂ |

ಲಲನೆಯನೊಲಿಸಲು ತಾನೇ ಪೋದವಗೆ ಶುಭಮಂಗಳಂ || 3 ||

ತರಣಿಯ ಕಂಡು ಸಂತೋಷಗೊಳಿಸಿದವಗೆ ಶುಭವಂಗಳಂ |

ಗಿರಿಮಾತೆಯ ಬರುವುದ ತಿಳಿಸಿದವಗೆ ಶುಭಮಂಗಳಂ ||

ಭರದಿ ತನ್ನ ಬಳಗ ಕರೆಸಿದವಗೆ ಶುಭಮಂಗಳಂ ||

ಶ್ರೀರಮಣಿ ಇಂದಿರೆಯ ಕರೆಸಿದವಗೆ ಶುಭಮಂಗಳಂ || 4 ||

ಎತ್ತ ನೋಡಿದರೂ ಪರಿವಾರದ ಸಂಭ್ರಮ ಕಂಡವಗೆ ಶುಭಮಂಗಳಂ |

ಚಿತ್ತಜನಯ್ಯ ಸರ್ವರಿಗೂ ಭೂರಿಭೋಜನ ನೀಡಿದವಗೆ ಶುಭಮಂಗಳಂ ||

ಉತ್ತರಾಣಿ ತಿಂದ ನಿತ್ಯ ತೃಪ್ತನಿಗೆ ಶುಭಮಂಗಳಂ |

ಸುತ್ತ ಪರಿವಾರದೊಡನೆ ದಿಬ್ಬಣ ಬೆಳೆಸಿದವಗೆ ಶುಭಮಂಗಳಂ || 5 ||

ಪದ್ಮಾವತಿಯ ಮದುವೆ ಮಾಡಿಕೊಂಡವಗೆ ಶುಭಮಂಗಳಂ |

ಪದ್ಮಾನಾಭ ಶ್ರೀದೇವಿಸಹಿತ ಬೆಟ್ಟದಲಿ ನಿಂತವಗೆ ಶುಭಮಂಗಳಂ ||

ಮಾಧವನ ಪಾದನಂಬಿದವರಿಗೆ ಅಭಯನಿವಗೆ ಶುಭಮಂಗಳಂ |

ಸದಾ ಶ್ರೀಕೃಷ್ಣವಿಟ್ಠಲನ ನೆನೆವರಿಗೆ ಮಂಗಳಮಾಳ್ಪಗೆ ಶುಭಮಂಗಳಂ || 6 ||

ಎಎಎ

405. ಜಯಮಂಗಳಂ, ನಿತ್ಯ ಶುಭಮಂಗಳಂ |

ಹರೇ ಶ್ರೀನಿವಾಸಗೆ, ಶ್ರೀಲಕ್ಷ್ಮೀನಿವಾಸಗೆ ||

ನಿತ್ಯ ನವನೂತನಗೆ, ಜಯಮಂಗಳಂ |

ಮಾವನ ಕೊಂದವಗೆ, ಮನುಜೋದ್ಧಾರನಿಗೆ ||

ಕಾಳಿಯಮರ್ದನಗೆ, ಕಲಿಯ ಭಂಜಕನಿಗೆ |

ಪೂತನಿ ಸಂಹಾರಕನಿಗೆ, ಪರಮಪವಿತ್ರಗೆ ||

ಬೆಣ್ಣೆಯಕದ್ದವಗೆ, ಮೋಹಿನಿ ರೂಪದವಗೆ |

ರುಕ್ಮಿಣಿಗೆದ್ದವಗೆ, ಗೋಪಿ ಜನಪ್ರಿಯಗೆ ||

ಪಾರ್ಥಸಾರಥಿಗೆ, ಪುರುಷೋತ್ತಮನಿಗೆ |

ದುಷ್ಟರ ಸಂಹಾರಿಗೆ, ಶಿಷ್ಟರ ಪರಿಪಾಲಕಗೆ ||

ಪ್ರಿಯ ಶ್ರೀಕೃಷ್ಣವಿಟ್ಠಲ ಮಂಗಳಮೂರುತಿಗೆ ||

ಎಎಎ

406. ಶಂಖಚಕ್ರಪದ್ಮಧಾರಿ ಪದ್ಮನಾಭಗೆ ಮಂಗಳಂ |

ಉರಗಶಯನ ಉತ್ತಮ ಶ್ಲೋಕಗೆ ಮಂಗಳಂ ||

ಜಾನು ಜಂಘ ಸುಂದರ ಜನಾರ್ದನಗೆ ಮಂಗಳಂ |

ಉದರದಿ ತ್ರಿಲೋಕ ಧರಿಪ ತ್ರಿವಿಕ್ರಮಗೆ ಮಂಗಳಂ ||

ನಾಭೀಯಿಂ ಜನಿಪ ಬ್ರಹ್ಮ ಪಿತಗೆ ಮಂಗಳಂ |

ವಕ್ಷದಿ ವಾಸಿಪ ಲಕ್ಷ್ಮೀರಮಣಗೆ ಮಂಗಳಂ ||

ಮೌಕ್ತಿಕಹಾರ ಸುಶೋಭಿತ ಕಂಠದ ಅನಿಕೇತಗೆ ಮಂಗಳಂ |

ಅಭಯ ಹಸ್ತ ಪೊತ್ತ ಹೃಷಿಕೇಶಗೆ ಮಂಗಳಂ ||

ಕಂಕಣಧರಿತ ಕರದಿಂ ವರವೀವ ಅನಂತಗೆ ಮಂಗಳಂ |

ನಿಮಿಲನೇತ್ರ ನಳಿನಾಕ್ಷ ಶ್ರೀವಿಷ್ಣುವಿಗೆ ಮಂಗಳಂ ||

ತುಟಿಯಲಿ ಮಂದಹಾಸ ಬೀರಿದ ಮೋಹನಗೆ ಮಂಗಳಂ |

ಮಕರಕುಂಡಲಧರಿತ ಖಗವಾಹನ ಶ್ರೀಹರಿಗೆ ಮಂಗಳಂ ||

ವಿಶಾಲಕೇಶರಾಶಿಯ ಕೇಶವನಿಗೆ ಮಂಗಳಂ |

ಕಿರೀಟಧಾರಿ ಕ್ಷಿತಿಜನ ಪಾಲಿಪ ಗೋವಿಂದಗೆ ಮಂಗಳಂ ||

ಅಚ್ಯುತ ನಾರಸಿಂಹ ಪುರುಷೋತ್ತಮಗೆ ಮಂಗಳಂ |

ಅಡಿಯಿಂ ಮುಡಿವರೆಗೆ ಸರ್ವಾಂಗ ಸುಂದರನಾದ ||

ಶ್ರೀಕೃಷ್ಣವಿಟ್ಠಲಗೆ ಮಂಗಳಂ ಜಯಮಂಗಳಂ |