ಡಾ ನರಸಾಪೂರ & ಪರಿವಾರ

ಶ್ರೀ ಕೃಷ್ಣವಿಠ್ಠಲಪದಗುಚ್ಛ 2

ಸಂಗರಹಿತನಾಗಿ ಏಕಾಂತದಿ

ಮಾರುತಿರಮಣನ ಧ್ಯಾನದಿ ಮುಳುಗಿಸು | || 1 ||

ಅಪರೋಕ್ಷ ಪಡೆದ ಮುಮುಕ್ಷಗಳನರಿತು

ಸೇವಿಸುವವರ ನಿರುತದಿ ಸೇವೆ ಕೊಡು |

ಪಾಪ-ಪುಣ್ಯಗಳ ಲೆಕ್ಕವಿಡದೆ ಸಕಲವೂ

ಪರಮಾತ್ಮನ ಸೇವೆ ಎಂದರಿತು ||

ಅಪರಿಮಿತ ಭಕ್ತಿಯಿಂ ಶರಣೆಂಬೆ ದೈನ್ಯತೆಯಲಿ ಬೇಡುವೆ |

ಸರ್ಪಶಯನ ನಮ್ಮಪ್ಪ ಶ್ರೀಕೃಷ್ಣವಿಟ್ಠಲ ಚಿತ್ತಕ್ಕೆ ತಂದು ಪಾರುಗಾಣಿಸೋ ||

220. ಏನು ಮಾಡಿದರೆ ಮುಕುತಿಯಾಗುವುದು ಜಗದೊಳು |

ಅಣು, ರೇಣು ತೃಣಕಾಷ್ಟದಿ ನೆಲೆಸಿರುವ ಹರಿಯೆ | || 1 ||

ಏಸು ದೇಹ ದಂಡಿಸಿದರೇನು? ಮಂಡೆಯೂರಿ ನಮಿಸಿದರೇನು? |

ಏಸುವ್ರತ, ಯಾಗ ಮಾಡಿದರೇನು? ಏಸು ಜಪ, ತಪದಿಂದೇನು? | || 2 ||

ದಿನದಿನದಿ ಅನ್ನದಾನ, ಧನ, ಕನಕದಾನದಿ ಒಲಿಯನು |

ಮನಮುಟ್ಟಿ ಮಾಡಿದ ಭಜನೆ, ಸಜ್ಜನ ಸಂಗದಿ ಒಲಿಯನು | || 3 ||

ಅನುದಿನ ಮಾಳ್ಪ ಜ್ಞಾನಸಹಿತ ಕರ್ಮ ಸ್ವೀಕರಿಪ |

ದಾನವಾಂತಕ ಶ್ರೀಕೃಷ್ಣವಿಟ್ಠಲನ ಕೃಪೆಯಾದರೆ ಮಾತ್ರ | || 4 ||

221. ಅವನಿಯೊಳು ಗಂಧವಿಟ್ಟೆ, ಗರ್ಭದಿ ಜೀವವಿಟ್ಟೆ |

ಆ ವನ(ನೀರು)ದೊಳು ರಸವಿಟ್ಟೆ, ಅದರಲಿ ರುಚಿಯಿಟ್ಟೆ ||

ಉಜ್ವಲ ಶಿಖಿಯಲಿ ರೂಪವಿಟ್ಟೆ, ಜೊತೆ ಶಾಖವಿಟ್ಟೆ |

ಪವನನಲಿ ಸ್ಪರ್ಶವಿಟ್ಟೆ, ಅದರಲಿ ಅರಿವುಇಟ್ಟೆ ||

ಭವ್ಯ ಆಗಸದಿ ಶಬ್ದವಿಟ್ಟೆ, ಸುವಿಶಾಲ ಭಾವವಿಟ್ಟೆ |

ಅವ್ಯಕ್ತಾವ್ಯಕ್ತ ಶ್ರೀಕೃಷ್ಣವಿಟ್ಠಲ ಎನ್ನೊಳು ಏನಿಟ್ಟೆ ತಿಳಿಸು ||

ಊಊಊ

ಉಗಾಭೋಗಗಳು

222. ನಿನ್ನ ಗುಣಶ್ರವಣದಿ ಜನುಮ ಸಾರ್ಥಕವೆನಿಸುವುದು |

ನಿನ್ನ ಸ್ಮರಣೆಯಲಿ ಚಿತ್ತದಿ ಹರುಷವಾಗುವುದು ||

ನಿನ್ನ ದರುಶನದಿ ಮನವರಳಿ ಹೂವಾಗುವದು |

ಅನ್ಯಥಾ ಭೇದಿಸದೆ ಸದಾ ಸಕಲರ ಪೊರೆಯುವವನೇ ||

ನಿನ್ನ ನಿಜ ಭಕುತಿಯಲಿ ಮುಳುಗುವ ಸೌಭಾಗ್ಯ ಕೊಡು |

ನೀನೇ ನನಗೆ ಪರಮಾಗತಿ ಶ್ರೀ ಕೃಷ್ಣವಿಟ್ಠಲ ||

223. ಹೊಡಿ, ಬಡಿ, ಜಡಿ, ಕಡಿ, ಸುಡು ಬೇಡುವೆನೊಂದೇ |

ಕಡೆಗೂ ನಿನ್ನ ಬಿಟ್ಟರೆ ಅನ್ಯಗತಿಯಿಲ್ಲ, ಸುಖವಿಲ್ಲ ||

ದಡ ಸೇರಿಸು ನೋಡುವೆ ಒಮ್ಮೆ ಮನ ದಣಿಯಾ |

ಬಿಡದೆ ಪಾಲಿಸೋ ದಯದಿ ಶ್ರೀಕೃಷ್ಣವಿಟ್ಠಲಾ ||

224. ಅನ್ಯರ ದೂಷಿಸಿ, ದ್ವೇಷಿಸೇ ಸಿಗುವುದು ಏನೋ |

ವೈಮನದಿ ಕೋಪ-ತಾಪದಿ ಕಳೆದುಕೊಳ್ಳುವುದೆ ಬಹಳ ||

ಮನಸಾ ಪ್ರೀತಿಸೇ ಶಾಂತಿ ಒಲುಮೆ ಸಿಗುವುದು |

ಕನ್ನಡಿಯಂತಿರ್ಪುದೀ ಜಗ ಶ್ರೀಕೃಷ್ಣವಿಟ್ಠಲನಾಣೆಗೂ ಸತ್ಯ ||

225. ಎಲ್ಲ ದೇಶಗಳಲ್ಲಿ ಭರತ ಖಂಡ ಶ್ರೇಷ್ಠ |

ಎಲ್ಲಯೋನಿಗಳಲ್ಲಿ ಮಾನವ ಜನ್ಮ ಶ್ರೇಷ್ಠ ||

ಎಲ್ಲ ಮನೆಗಳಲ್ಲಿ ದೇವರ ಮನೆ ಶ್ರೇಷ್ಠ |

ಎಲ್ಲ ಅನ್ನಗಳಲ್ಲಿ ನೈವೇದ್ಯನ್ನ ಶ್ರೇಷ್ಠ ||

ಎಲ್ಲ ಸಂಗಗಳಲ್ಲಿ ಸತ್ಸಂಗ ಶ್ರೇಷ್ಠ |

ಎಲ್ಲ ಸಾಧನೆಗಳಲ್ಲಿ ಮೋಕ್ಷ ಸಾಧನೆ ಶ್ರೇಷ್ಠ ||

ಎಲ್ಲ ಗುರುಗಳಲ್ಲಿ ಸಂತೋಷ ತೀರ್ಥರು ಶ್ರೇಷ್ಠ |

ಎಲ್ಲ ದೇವರಲ್ಲಿ ಪುರುಷೋತ್ತಮ ಶ್ರೀಕೃಷ್ಣವಿಟ್ಠಲ ಶ್ರೇಷ್ಠ ||

226. ಭಾಗವತ ಎಂದರೆ ಎನ್ನ ಭಾಗವ-ತಾ |

ಭ ಎಂದರೆ ಭಕ್ತಿ, ಗ ಎಂದರೆ ಜ್ಞಾನ, ವ ಎಂದರೆ ವಿರಕ್ತಿ ||

ಇವುಗಳನ್ನು ಮನೋಬುದ್ಧಿ, ಇಂದ್ರಿಯಗಳಲಿ ತುಂಬಿ ತುಳುಕಿಸಿದಾಗ |

ತ ಎಂದರೆ ತರುವುದು ಭಾಗವತ ತತ್ವ, ಆಗುವುದು ಶ್ರೀಕೃಷ್ಣವಿಟ್ಠಲನ ದರ್ಶನ ||

227. ಆನಂದ ಆನಂದ ಆತ್ಮಪರಮಾತ್ಮ ಸಂಬಂದ ತ್ರಿಶುದ್ಧಿಲಿ ತಿಳಿದವಗೆ |

ಆನಂದ ದೇಹದ ಚತುರ್ವಿಂಶತಿ ತತ್ವ ತಿಳಿದವಗೆ ||

ಆನಂದ ಪಂಚಭೇದ, ತಾರತಮ್ಯ ಕಾರುಣ್ಯವರಿತವಗೆ |

ಆನಂದ ತತ್ತ್ವೇಶರ ಕಾರ್ಯ ಸ್ಥೂಲದಿ ಅರಿತವಗೆ ||

ಆನಂದ ತತ್ತ್ವೇಶರಲ್ಲಿದ್ದ ಮುಖ್ಯಪ್ರಾಣನ ಪಾತ್ರವರಿತವಗೆ |

ಆನಂದ ಪ್ರಾಣನಲ್ಲಿದ್ದ ಶ್ರೀಕೃಷ್ಣವಿಟ್ಠಲನ ಪ್ರಸಾದಿತಗೆ ||

228. ನಿತ್ಯದಲ್ಲಿ ನಿತ್ಯಮಂಗಳ ಚರಿತನಾದ ಪರಮಾತ್ಮನ |

ನಿತ್ಯಚಿಂತನದಿಂದಲೇ ದೊರಕುವುದು ನಿತ್ಯಮಂಗಳ ||

ಸಾತ್ತ್ವಿಕ ಸದ್ವಾಸನಾ ಅಭಿಲಾಷೆಯೇ ಪುಣ್ಯ ಲೋಕಗಳ ಪ್ರಾಪ್ತಿ |

ಸ್ವತಂತ್ರ ಶ್ರೀಕೃಷ್ಣವಿಟ್ಠಲ ಅನುಗ್ರಹಿಪ ಯದೃಚ್ಛಾಲಾಭ ಸಂತುಷ್ಟನ ||

229. ಹಿಂದೆ-ಇಂದು-ಮುಂದೆ ಮಾಡಿದ,

ಮಾಡುವ ಕರ್ಮಫಲ ಅರ್ಪಿಸುವೆ |

ಹಿಂದಿನದು ಗೊತ್ತಿಲ್ಲಾ, ಮುಂದೇ ಈ ಬುದ್ದಿ

ಇರುವುದೊ ಇಲ್ಲವೋ ತಿಳಿಯದು ||

ಮುಂದೇ ಮಾಡುವುದನ್ನು ಇಂದೇ

ನಿನಗೊಪ್ಪಿಸಿರುವೆ ದಯದಿ ಸ್ವೀಕರಿಸು |

ಇಂದಿರಾರಮಣ, ಸದಾನಂದ, ಸಖ ಶ್ರೀಕೃಷ್ಣವಿಟ್ಠಲ ಇಂದೇ

ಎನ್ನ ಒಪ್ಪಿಕೊ ಇಲ್ಲಾ ಅಪ್ಪಿಕೊ ||

230. ಮುಂದೆ ನರಸಿಂಹ ರಕ್ಷಿಸೇ, ಹಿಂದ ನಂದನ ಕಂದ |

ಎಡಬಲದಲಿ ಧನುರ್ಧಾರಿ ಶ್ರೀರಾಮಲಕ್ಷ್ಮಣರಿರೇ ||

ಇಂದಿರಾರಮಣ ಎನಗೇತರ ಭಯವೋ |

ಸದಾ ಎನ್ನ ನಡೆ-ನುಡಿ ಕಾಯ್ವ ಶ್ರೀಕೃಷ್ಣವಿಟ್ಠಲ ||

231. ಆಡಿಸಿದಂತೆ ಆಡುವ | ನುಡಿಸಿದಂತೆ ನುಡಿವ ||

ನಡೆಸಿದಂತೆ ನಡೆವ | ಓಡಿಸಿದಂತೆ ಓಡುವ ||

ಕೂಡಿಸಿದಂತೆ ಕೂಡುವ | ದಡ ಸೇರಿಸಿದರೆ ಸೇರುವ ||

ಹಿಡಿತಕ್ಕೆ ಸಿಗದ ಜಗ್ಗದ (ಲೌಕಿಕದಿ) | ಕಡಲಾಬ್ಧಿವಾಸನ ಕೈಗೊಂಬೆ ||

ಕೊಂಡವರ ವಶವಾಗುವ (ಜನ್ಮದಾತರ) | ಮಂಡೆ ತಗ್ಗಿಸಿ ಹೇಳಿದಂತೆ ಕೇಳುವ || (ಪರಮಾತ್ಮನಧೀನ)

ಕಂಡವರ ಕಡೆಗಣಿಸುವ (ಅಹಂ)| ಗುಂಡಾಕೃತಿಯಲ್ಲಿ ಸುತ್ತುವ || (ಸಂಸಾರದಿ)

ಮಾಡದೆಯೂ ತಾ ಮಾಡಿದಂತೆ | ಒಡೆತನವ ತೊರಿಸಿಕೊಳ್ಳುವ ||

ಕಡೆಗಣಿಸಿದರೂ ಓಲೈಸುವ (ಸಂಸಾರದಿ ಹೀನ ಬದುಕು) | ಭಂಡತನದಿ ಬದುಕುವ ||

ಲಂಡತನದೀ ಜೀವ| ಅಂಡಲೆದರು ಬಿಡದೆ ||

ಉಂಡುಂಡು ತೇಗಿದರೂ| ಕಡಿಮೆಯಾಗದ ಕಾಮ ||

ಬಿಡುಗಡೆಗೆ ಯತ್ನಿಸದೆ| ಮೂಢತನದಿ ತನ್ನನರಿಯದೆ || (ಆತ್ಮ)

ಜಡ ಶರೀರವೇ ತಾನೆಂದು| ಒಡನೆ ಮೆಚ್ಚಿ ಶಾಶ್ವತ ತಾನೆಂದು ತಿಳಿದು ||

ಸಡಗರದಿ ಜನ್ಮ ಕಳೆದು| ಕೊಡಮಾಡಿದವರ ಮರೆತು || (ಪರಮಾತ್ಮನ)

ಪಡೆಯದೆ ಮುನ್ನ ಸುಜ್ಞಾನ| ಕಡೆಗೆ ಪರಿತಪಿಸಿದರೇನು ಬಂತು ಭಾಗ್ಯ ||

ಮುಂಡೆ ಹೂ-ಜಡೆಗತ್ತಂತೆ | ಸೊಡರು ಆರಿದಮೆಲೆ ಸೂಜಿ ಹುಡುಕಿದಂತೆ ||

ಹೆಡೆಮುರಿಗಿ ಕಟ್ಟಿ ಎಳೆದೊಯ್ವಾಗ | ಗಂಡರ ಗಂಡ ಶ್ರೀಕೃಷ್ಣವಿಟ್ಠಲನ ನೆನೆಯದಿರೆ ||

232. ಬಾಧಕಗಳೆಲ್ಲ ಸಾಧಕವಾಗಲಿ ಅನುದಿನ ಸಾಧನೆ ಹೆಚ್ಚಲಿ |

ಬಂಧಕ ವಿಷಯದಿಂದ ವಿಮುಖವಾಗಲಿ ಇಂದ್ರಿಯ ||

ದುರ್ದಿನಗಳೆಲ್ಲಾ ಸುದಿನವಾಗಿ ಸಂತೈಸಲಿ ನಿತ್ಯ |

ಬಿದ್ದು ಹೊಗುವ ಮುನ್ನ ತೀರಲಿ ಪ್ರಾರಬ್ಧವೆಲ್ಲಾ ||

ಬಂಧು ಬಾಂಧವರ ಸಂಗತೊರೆದು ಏಕಾಂತವಾಗಲಿ ಮನ |

ವೃಂದಾವನಸ್ಥ ವರದೇಶ ವರಪ್ರದ ಶ್ರೀಕೃಷ್ಣವಿಟ್ಠಲನ ದಯದಿ ||

233. ಒಂದೇ ಮನದಿ ಬೇಡುವೆ ನಿರ್ಮಲ, ನಿಚ್ಚಳ, ನಿರವಧಿಕ,

ನಿರಂತರ ನಿತ್ಯ, ನಿಜ ಭಕುತಿ ನಿನ್ನ ಪದತಲದಿ |

ಇದೇ ಜ್ಞಾನ ಇರಲಿ ಸಾಕು ಪ್ರತಿ ಜನುಮದಿ,

ಇದನ್ನೇ ದಯಪಾಲಿಸು ಶ್ರೀಕೃಷ್ಣವಿಟ್ಠಲ ||

234. ಅತ್ತ-ಇತ್ತ, ಸುತ್ತ-ಮುತ್ತ ಎತ್ತಲೂ ಪ್ರತೀ ಜನುಮದಿ |

ಕರ್ತೃ ಪ್ರೇರಕ ಶ್ರೀಕೃಷ್ಣವಿಟ್ಠಲನೇ ಕಾಣಲಿ ದಯದಿ ||

235. ಖಾಲಿ ಕೈಲಿ ಬಂದು ಜೀವನದಿ ಸರ್ವಸುಖ |

ಓಲೈಸಿ ಲೀಲೆಯಲಿ ಸಂಸಾರ ಜಯಿಸಿ ||

ಕೆಲಕಾಲ ಸುಖದಿ ಅತಿಥಿಯಂತಿದ್ದು |

ಕಾಲಕರೆದಾಗ ಒಲ್ಲೆಯೆಂದರೆ ಬಿಡದೆ ಒಯ್ವ ಶ್ರೀಕೃಷ್ಣವಿಟ್ಠಲ ||

236. ಹರಿದು ಸುರಿದು ಬಂದಾಗ ಸಂಸಾರದಿ |

ಸರಿಯಾಗಿ ಸರಿದು ಇರದಿದ್ದರೆ ||

ಸರ್ರನೇ ಸರಿಯುವ ಸಮಯದಿ |

ಕರೆಕರೆ ಮಾಡಿದರೆ ಕೇಳುವನೇ ಶ್ರೀಕೃಷ್ಣವಿಟ್ಠಲ||

ಪರರ ಪರಿವೆ ಇಲ್ಲದೆಸ್ವಾರ್ಥಿಯಂತೆ |

ಪರಜ್ಞಾನ ಗಳಿಸದೆ ಪ್ರಾಣಿಯಂತೆ ||

ಹೆರವರ ಉಪಕಾರ ಭಾರಹೊತ್ತಂತೆ |

ಪರೋವರ ಶ್ರೀಕೃಷ್ಣವಿಟ್ಠಲ ಮೆಚ್ಚುವನೇ? ||

ಬಂದಾಗ ಇಲ್ಲದ ಅಹಂ-ಮಮಕಾರ |

ಬಂದ ಮೇಲೆ ಬಿಡದೆ ಗಳಿಸಿದ ಆಸ್ತಿ ||

ಇದ್ದಾಗ ಮೆರೆದು, ತೊರೆಯದೆ |

ಒಯ್ದರೆ ಜೊತೆಯಲಿ ಶ್ರೀಕೃಷ್ಣವಿಟ್ಠಲ ಶಿಕ್ಷಿಸದಿರುವನೇ ||

237. ಪತಿ ಮಾಡಿದ ಪುಣ್ಯದಲಿ ಸತಿಗೆ ಸಮಪಾಲು |

ಸತಿ ಮಾಡಿದ ಪುಣ್ಯದಲಿ ಪತಿಗೆ ಪಾಲಿಲ್ಲ ||

ಪತಿ ಮಾಡಿದ ಪಾಪ ಸತಿಗೆ ಪೊಗದು |

ಸತಿ ಮಾಡಿದ ಪಾಪದ ಪಾಲು ಪತಿಗುಂಟು ||

ಪ್ರತಿಜನುಮದ ಪತಿ ನೀನೆನಗೆ ಶ್ರೀಕೃಷ್ಣವಿಟ್ಠಲ ರಕ್ಷಿಸನವರತ ||

238. ನೆಂಟರೆಲ್ಲಾ ಇಷ್ಟರಲ್ಲಾ |

ಇಷ್ಟರೆಲ್ಲಾ ನೆಂಟರಲ್ಲಾ ||

ಕಂಟಕ ಕಳೆವ ಶ್ರೀಕೃಷ್ಣವಿಟ್ಠಲ |

ಒಂಟಿ ಜೀವಕೆ ನೀನೇ ನೆಂಟ-ಇಷ್ಟ ||

239. ಬಗೆಬಗೆಯ ಉಪದೇಶ ಪೇಳುವರೆಲ್ಲಾ ಆಪ್ತರಲ್ಲಾ |

ಒಗೆತನದ ಮಾತಿನಲ್ಲಿ ಹೊಗೆ ಹಾಕುವರು ||

ಕಂಗೆಡಿಸಿ ಬೇಕೆಂದೆ ದಾರಿ ತಪ್ಪಿಸುವರು |

ಅಗ್ರೇಶ ಶ್ರೀಕೃಷ್ಣವಿಟ್ಠಲನ್ನೇ ನಂಬಿದರೆ ಉದ್ಧರಿಸುವಾ ||

ಸಾಧನೆಯಲ್ಲಿ ಪಂಚಪ್ರಾಣರ ವ್ಯಾಪಾರ ||

240. ಎಲ್ಲ ಕೊಡುವವ ನೀನೇ, ಕೊಡಲು ಬುದ್ಧಿಕೊಡುವವ ನೀನೇ |

ಕಲ್ಪಿಸಿ ಅವಕಾಶ ಕೊಡಿಸುವವ ನೀನೇ ಶ್ರೀಕೃಷ್ಣವಿಠ್ಠಲ ||

ಎಲ್ಲ ಬಲ್ಲಿದ್ದು ಅಹಂ ಮಾತ್ರ ಎನಗೇಕೆ ಕೊಡುವಿ? ||

241. ಮೃತ್ಯುವು ಬಡವ-ಶ್ರೀಮಂತ ಭೇದವಿಲ್ಲದೆ |

ಸತ್ಯದಿ ಸಕಲರಿಗೂ ಸಮಾನದಿ ಬರುವುದು ||

ಮೃತ್ಯುವಿಗೂ ಮೃತ್ಯುವಾದ ಶ್ರೀಕೃಷ್ಣವಿಟ್ಠಲನ |

ನಿತ್ಯದಿ ಸೇವಿಸಿ ಜೀವಿನ ಧನ್ಯವಾಗಿಸಿಕೋ ||

242. ಬೇಡುವವರಿಗೆ ನೀಡದೇ ಮೂದಲಿಸಬೇಡ |

ಕೊಡದಿದ್ದರೆ ಮುಂದೆ ನೀನು ಬೇಡುವವನಾಗುವಿ ||

ಒಡನೆಯೇ ಕೊಡು ಇಲ್ಲದಿದ್ದರೆ ಬುದ್ಧಿ ಬದಲಾಗುವುದು |

ಒಡಲು ಹೊಯ್ಯಲು ಶ್ರೀಕೃಷ್ಣವಿಟ್ಠಲನಿರೆ ನಿನಗೇತರ ಚಿಂತೆ ||

243. ದೊಡ್ಡವರ ಅಪಮಾನಿಸಬೇಡಾ | ನಿಂದೆಯ ಫಲ ವಜ್ರಲೇಪದಂತೆ ||

ಬಿಡದೇ ನಿನ್ನ ಬವಣಿ ಪಡಿಸಿ ಹಾನಿಮಾಳ್ಪುದು ||

ವೇದ, ಬ್ರಾಹ್ಮಣ, ಗೋಪೂಜೆ ಪೂಜಿಸದವರ ಸಾಧನೆ ವ್ಯರ್ಥ ||

ಉದ್ದಾರ ಕರ್ತ, ಶ್ರೀಕೃಷ್ಣವಿಟ್ಠಲನ ಸಂಗ ಬಿಟ್ಟು ಕೆಡಬೇಡ ||

244. ಅಂತರಂಗ ಸಖ, ಸರ್ವಾಂತಯಾಮಿ, ಸರ್ವಪ್ರೇರಕ,

ಮೂಕಪ್ರೇಕ್ಷಕ ಅನವರತ ಸಂಗಾತಿ |

ಇತ್ತೆನಗೆ ಅಮಲ ಭಕುತಿ ಪರಿಪಾಲಿಸೊ ಕರುಣಾಕರನೇ ||

ಸತತ ನಿನ್ನ ಸ್ಮರಣೆಯಲ್ಲಿದ್ದು ಅನ್ಯಾಪೇಕ್ಷೆ

ಇಲ್ಲದಂತೆ ದಯಮಾಡೋ ಶ್ರೀಕೃಷ್ಣವಿಟ್ಠಲ ||

245. ಏಸು ಜನುಮ ಕಳೆದವೋ, ಏಸು ತಾಯಿ, ತಂದೆ,

ಬಂಧುಬಳಗವೋ ಒಡೆಯಾ |

ನೀನೇ ನನ್ನ ಶಾಶ್ವತ ತಾಯಿ ತಂದೆ ಎಲ್ಲ ಜನುಮಕೂ |

ನೀನೆ ನನ್ನ ಬಂಧು ಬಳಗ ||

ನಿನ್ನ ಬಿಟ್ಟು ಅನ್ಯರ ಭಜಿಸದಂತೆ ಮಾಡೋ

ಶ್ರೀಕೃಷ್ಣವಿಟ್ಠಲ ನೀನೆ ನನ್ನ ಪರದೈವ ಸದಾ ||

246. ಲೋಕದಿ ಮನುಜರ ಮೆಚ್ಚಿಸಲರಿಯೇ,

ಎನ್ನ ಮಾಧವನ ಮನವ ಮೆಚ್ಚಿಸಬಹುದು |

ಪರಿಪರಿ ಸ್ತುತಿಸೆ ಪರರಿಂದ ಅಪವಾದ ತಪ್ಪದು,

ಆರ್ತದಿಂದೊಮ್ಮೆ ಕರೆಯೇ ಅನಿಕೇತನೊಲಿವಾ ||

ಪರರ ಆಪೇಕ್ಷೆಗೆ ಮಿತಿಯಿಲ್ಲಾ, ಅಮಿತವಿಕ್ರಮನ ಅವಿರತ

ನೆನೆದೊಡೆ ಶ್ರೀಕೃಷ್ಣವಿಟ್ಠಲನ ಕಾರುಣ್ಯಗೆ ಎಣೆಯಿಲ್ಲಾ ||

247. ನನ್ನ ಕರ್ಮವೆಲ್ಲಾ ನಿನ್ನ ಸೇವೆಯಾಗಲಿ,

ನಿನ್ನ ಸೇವೆಯೇ ನನ್ನ ಕರ್ಮವಾಗಲಿ |

ನಿನ್ನ ಇಚ್ಛೆಯೇ ನನ್ನ ಇಚ್ಛೆಯಾಗಲಿ, ನನ್ನಜೀವ,

ಆತ್ಮ ಎರಡೂ ಪರಮಾತ್ಮನದಾಗಲಿ ||

ನಿರಂತರ ನಿನ್ನ ಧ್ಯಾನ ನನದಾಗಲಿ, ಸದಾನುಗ್ರಹ ಎನಗಾಗಲಿ |

ಶ್ರೀಕೃಷ್ಣವಿಟ್ಠಲನ ಸ್ಮರಣೆ ಸೌಭಾಗ್ಯದಿಂದ ನನದೆಲ್ಲಾ ನಿನ್ನದಾಗಲಿ ||

ನಾನು ಸದಾ ನಿನ್ನವನಾದರೆ ಸಾಕು ಎಂದೆಂದಿಗೂ ಮರೆಯದಿರು ||

248. ಪ್ರತ್ಯಕ್ಷ ಕಂಡು, ಎಲ್ಲಾ ಕೇಳುವ, ಹೇಳುವ |

ಸರ್ವವಿದಿತ ಮನಸ್, ಸರ್ವ ಪ್ರೇರಕನೇ ||

ಪ್ರಾಣ, ಗುಣಪೂರ್ಣನಾದ ಸಂಹಾರಕನೇ |

ಬ್ರಹ್ಮಗಿರಿಯಾದ ನಮ್ಮ ಶ್ರೀಕೃಷ್ಣವಿಟ್ಠಲ ||

249. ಜೀವ-ಈಶ್ವರ ಭೇದ, ಜೀವ-ಜೀವಕೆ ಭೇದ |

ಜಡ-ಈಶ್ವರ ಭೇದ, ಜಡ-ಜಡಕೆ ಭೇದ ||

ಜಡ-ಜೀವಕೆ ಭೇದ ಸತ್ಯವಿದು ಪಂಚಭೇದವು |

ಮುಕ್ತಿ, ಸಂಸಾರದಲ್ಲೂ ಅನ್ಯಥಾ ಹೇಳಿದರೆ ನರಕ ತಪ್ಪದು ||

ಜಗತ್ತು ಮಿಥ್ಯೆಯಾದರೆ ತಾನೂ ಮಿಥ್ಯೆಯೇ |

ನಿಯಾಮಕನಿಲ್ಲವೆಂದು ಅಸತ್ಯವಾದಿ ನುಡಿಯೇ ||

ಅಲ್ಪ ಜ್ಞಾನಿಗಳು ಜನ್ಮಜನ್ಮದಲಿ ಅಸುರಯೋನಿಯಲಿ ಜನಿಸಿ |

ಅನಿಕೇತನ ಪಡೆಯದೇ ನಿತ್ಯನರಕದಲ್ಲಿ ಪೊರಳುವರು ||

ಈ ಜನ್ಮವು ಮುಂದಿನ ಜನ್ಮಕ್ಕೆ ಒಂದು ಸಿದ್ಧತೆ ಮಾತ್ರ |

ಶ್ರೀಕೃಷ್ಣವಿಟ್ಠಲನ ದಯದೀ ಸುಜ್ಞಾನ ನಿತ್ಯವೂ ದೊರಕಲಿ ||

250. ನೀ ಎನ್ನ ಹೃದಯದಲಿ | ನಾ ನಿನ್ನ ಸನಿಹದಲಿ ||

ನಾ ನಿನ್ನ ಧರಿಪೆ | ನೀ ಎನ್ನ ಭರಿಸೋ ಶ್ರೀಕೃಷ್ಣವಿಟ್ಠಲ || ಜೀಯಾ ||

251. ಬೇಡಿದರೂ ಕೊಡಲಾಗದರಿಗೆ ಕರೆದುಕೊಡುವ ಮನಸ್ಸೆಲ್ಲಿ? |

ಮನುಜರಲ್ಲೇ ಕರುಣೆ ತೋರದವಗೆ ಪ್ರಾಣಿಗಳಲ್ಲಿ ದಯೆಯೆಲ್ಲಿ? ||

ಹಸಿದವರ ಮುಂದೆ ಸುಗ್ರಾಸ ಭೋಜನ ಮಾಡುವವ ಕಾಗೆಗಿಂತ ಕಡೆ |

ಹೃದಯವಂತಿಕೆ ಇಲ್ಲದವನ ಜೀವನ ಇಹಪರದಲ್ಲೂ ದು:ಸ್ಸಹ ||

ಶ್ರೀಕೃಷ್ಣವಿಟ್ಠಲನ ಭಜಿಸದಿರುವನ ಜನುಮ ವ್ಯರ್ಥ ||

252. ತಿಳಿಯಬೇಕು ತಿಳಿದು ತಿಳಿಸಬೇಕು |

ಒಳ್ಳೆಯದು ಹೇಳಿದರೆ ಕೇಳಬೇಕು ||

ತಿಳಿಯಾಗಿರುವುದ ನೋಡಬೇಕು |

ಗಿಳಿಯಂತೆ ಶ್ರೀಕೃಷ್ಣವಿಟ್ಠಲ ಹೇಳಿದ್ದು ಕೇಳಬೇಕು ||

253. ನವ ನವದ್ವಾರದಿ ಒಳಬರುವ ಅರಿಷಡ್ವರ್ಗಗಳ |

ನವ ನವರೀತಿಯಿಂ ಕರ್ಮಬಂಧಕವಾಗದಂತೆ ||

ನವವಿಧ ಭಕುತಿ ಅಹರ್ನಿಶಿ ಮಾಡಲು |

ನವೋದಯದಿ ಆತ್ಮಶುದ್ಧಿಯಾಗುವುದು ||

ಸರ್ವಸಮರ್ಪಣವೆನೆ ಶುದ್ಧಜ್ಞಾನ ಪ್ರಾಪ್ತಿ |

ನಾವೆ ತೀರ ಸೇರುವಂತೆ ಸುಜ್ಞಾನ ಕಾರಣ ಮುಕುತಿಗೆ ||

ಯಾವತ್ತೂ ಮಾಡುವ ಕಾರ್ಯ, ಕರ್ಮ, ಕಾರಣ ಕರ್ತೃ |

ಅವಿನಾಶಿ ಶ್ರೀಕೃಷ್ಣವಿಟ್ಠಲನಲ್ಲದೆ ಬೇರಾರುಂಟು ||

254. ನಮ್ಮ ಉಸಿರು ನಾವೇ ತೆಗೆದುಕೊಳ್ಳುವಂತೆ |

ನಮ್ಮ ಕಣ್ಣೇ ನಮಗೆ ನೋಟ ತೋರುವಂತೆ ||

ನಮ್ಮ ಹಸಿವಿಗೆ ನಾವೇ ಉಣ್ಣುವಂತೆ |

ನಮ್ಮ ಹೃದಯ ಮಿಡಿದರೆ ನಾವೇ ಜೀವಿಸುವಂತೆ ||

ನಮ್ಮ ಸಾಧನೆ ನಾವೇ ಮಾಡಿದಾಗ ಮಾತ್ರ |

ನಮ್ಮ ಜೀವನ ಸಾರ್ಥಕತೆ ಪಡೆಯುವುದು ||

ನಮ್ಮ ದೇಹದಿ ದೇವ ಶ್ರೀಕೃಷ್ಣವಿಟ್ಠಲ ಇರುವರೆಗೂ |

ನಮ್ಮ ಜೀವ, ಜೀವನ, ನಂತರ ಯಾವುದು ಏನಾದರೇನು ||