ಡಾ ನರಸಾಪೂರ & ಪರಿವಾರ

ಶ್ರೀ ಕೃಷ್ಣವಿಠ್ಠಲಪದಗುಚ್ಛ 2

ಉ-ಕಾರನಾಮದ ಪರಮಾತ್ಮ

177. ಊಧ್ರ್ವಮೂಲಂ ವೈಕುಂಠಸ್ಥ ಉಪಸ್ಥ ಪರಮಪವಿತ್ರಂ |

ಉದೀರ್ಣ ಉದಾರಧೀಃಯ ಉತ್ಕಷ್ಟ ಊರ್ಜಿತ ||

ಉತ್ತಮ ಶ್ಲೋಕ ಊಚ ಉರುಕ್ರಮ ಉದಾರಿ |

ಉರುಗಶಾಯಿ ಉಪರಾಧೀಶ ಉನ್ನತ ಉದ್ವಾಹನ ||

ಉನ್ನತ ಪ್ರಾರ್ಥಿತ ಉನ್ಮೀಲಿತ ಉನ್ನತೋನ್ನತ |

ಉದ್ಗಂಧ ಉದ್ಗಮಸಾರ ಉದ್ಧಾರಕ ಉದ್ಯೋತ ||

ಉತ್ಪಲನೇತ್ರ ಉತ್ತಮಾಂಗ ಉತ್ಕಟ ಭಕ್ತವತ್ಸಲಂ |

ಉರ್ವಿಪತಿ ಉಪೇಂದ್ರಾಭಿನ್ನ ಶ್ರೀಕೃಷ್ಣವಿಟ್ಠಲ ನಮಃ ||

(ಊಚ-ಉಚ್ಚ, ಉದ್ವಾಹನ-ಮೇಲೆರುವ ಸಾಧನ, ಉನ್ಮೀಲ- ಅರಳುವ, ಉದ್ಗಮ- ಹೊರಹೊಮ್ಮುವ, ಉತ್ಪಲ-ಕನ್ನೆದಿಲೆ, ಉದ್ಯೋತ-ಹೊಳೆಯುವ)

178. ಒಂದೂರಿನಿಂದ ಇನ್ನೊಂದೂರಿಗೆ ಹೊಗುವಾಗ |

ಸದಾ ಜೊತೆ ನೀನಿರಲು ಎನಗೇಕೆ ಭಯ? ||

ಮುಂದೆ ನರಸಿಂಹನಾಗಿ ಹಿಂದೆ ಶ್ರೀಕೃಷ್ಣನಾಗಿ |

ಎಡಬದಿ ಧನುರ್ಧಾರಿ ಶ್ರೀರಾಮ-ಲಕ್ಷ್ಮಣರಾಗಿ ಕಾಯಲು ||

ಬಂಧು ಬಳಗ ಎಲ್ಲಾ ನೀನೇ ಬೇರೊಬ್ಬರು ಯಾಕೆ ಬೇಕು? |

ಹಾದಿಯಲಿ ಸಿಗುವ ಆಪತ್ತಿನಿಂದ ರಕ್ಷಿಸುವವ ನೀನೇ ||

ಬದಿಯಲ್ಲಿದ್ದು ಬೀಳದಂತೆ ತಡೆಯುವವ ನೀನೇ |

ಬಿದ್ದರೂ ಎಬ್ಬಿಸಿ ಕೈ ಪಿಡಿದು ಮುನ್ನಡೆಸುವವ ನೀನೇ ||

ಬುದ್ಧಿ ಇತ್ತು ಸುಖದ ದಾರಿಯ ತೋರಿಸುವ |

ಹೃದ್ಗುಹಾವಾಸಿಯೇ ಬಂಧಮೋಚಕನೆಂದು ನಂಬಲು ||

ಉದ್ಧಾರಕರ್ತ ಎನ್ನ ಸ್ವಾಮಿ ಶ್ರೀಕೃಷ್ಣವಿಟ್ಠಲ ಸದಾ ಕಾಯ್ವ ||

179. ಅಣು ಅಣುವಿನಲ್ಲಿರುವನ ಕ್ಷಣ ಬಿಡದೆ ಧ್ಯಾನಿಸಿ |

ಹಣ ಜಂಬ, ಬಂಧು ಮೋಹ ಬಿಟ್ಟು ಉಸಿರಿಗೊಮ್ಮೆ ||

ದೊಣ್ಣೆನಾಯಕ ನಂದದಿ ತಪ್ಪಿದರೆ ಶಿಕ್ಷಿಸುವ |

ಕಣ್ಣಿಗೆ ರೆಪ್ಪೆಯಂದದಿ ಸತತ ರಕ್ಷಿಸುವ ||

ಹಣಿಯನು ಯಾರನು ಪ್ರೀತಿ, ದ್ವೇಷದಿ |

ದಣಿಯನು ಎಂದೂ ಆರಾಮ ಬಯಸನು ||

ಮಣಿಯುವ ಜ್ಞಾನ ಸಹಿತ ನಿರ್ಮಲ ಭಕುತಿಗೆ |

ಗಣ ನಾಯಕ ಶ್ರೀಕೃಷ್ಣವಿಟ್ಠಲ ಕರುಣೆಗೆ ಎಣಿಯುಂಟೆ? ||

180. ಭಕುತಿ ಸುಖದ ನಿಜವ ತಿಳಿಯಿರೋ |

ಸಕಲಪ್ರದಾತಾ ಶಕುತವಂತ ||

ಮುಕುತಿ ಹೊರತು ಬೇರೇನೂ ಬಯಸದೆ |

ಏಕಾಂತದಿ ಭಜಿಸಿ ಶ್ರೀಕೃಷ್ಣವಿಟ್ಠಲನ ಪೊಂದಿರೋ ||

181. ನಿನ್ನಂತಹ ದಾನಿಯು ಬೇರಾರಿಲ್ಲ ಜಗದೊಳು |

ಎನ್ನ ಹಾಗೆ ಬೇಡುವವರೇನು ಕಡಿಮೆ ಇಲ್ಲ | || ಪ ||

ಕೂಡಾ ಹುಟ್ಟಿದವರಂತೆ ಜೊತೆಗಿದ್ದು |

ಒಡಲಿಗ್ಹಾಕಿ ಉಡಲು ಕೊಟ್ಟು ಬಿಡದೆ ||

ವಿದ್ಯೆ, ಬುದ್ಧಿ ನೀಡುವುದಲ್ಲದೆ |

ಬಂಧು, ಬಾಂಧವರನ್ನೂ ಸಲುಹುವೆ | || 1 ||

ಕೇಳಿದ್ದೆಲ್ಲಾ ಸಕಾಲಕೆ ಕೊಡುವಿ |

ಇಲ್ಲವೆನ್ನದೇ ಸದಿಚ್ಛೆ ಪೂರ್ಣ ಮಾಡುವಿ ||

ತಿಳಿಯದು ನಿನ್ನ ಲೆಕ್ಕಾಚಾರ (ಯಾರಿಗೂ) |

ಒಲ್ಲೆನೆಂದರೂ ಫಲಾನುಸಾರ ಮುಟ್ಟಿಸುವಿ | || 2 ||

ಬಲ, ಆರೋಗ್ಯ,ಆಯುಷ್ಯ ಪ್ರದಾತಾ |

ಒಳ-ಹೊರಗೂ ಸದಾಕ್ರಿಯೆ ಶೀಲದಿ ||

ಅಳಸಿ ಕಷ್ಟ, ನೀಡುವೆ ಸುಖವ |

ಒಲವಿಂದ ಸಲಹುವ ಆಪದ್ಬಾಂಧವ ಶ್ರೀಕೃಷ್ಣವಿಟ್ಠಲನೇ | || 3 ||

182. ಸೇವೆಯ ಪರಿ ತಿಳಿಯೆನೋ ದೇವಾ |

ವಿವಿಧ ಸೇವೆಯಲಿ ಯಾವ ಸೇವೆ ಮಾಡಲಿ | || ಪ ||

ತಪ, ಯಜ್ಞ ಮಾಡಲರಿಯೆ |

ಕೋಪ, ಕಾಮಗಳ ಬಿಡಲರಿಯೆ ||

ಪಾಪ-ಪುಣ್ಯಗಳ ಲೆಕ್ಕ ತಿಳಿಯದು |

ಪೋಪುತಿದೆ ಬರಿದೇ ಆಯುಷ್ಯ | || 1 ||

ಅನ್ನ, ವಸ್ತ್ರ, ಭೂಮಿದಾನ |

ಧನ, ಕನಕ, ಗೋದಾನವೇ ||

ದೀನ, ದೂನ ಅನಾಥರ ಸೇವೆಯೇ |

ದಾನದಿ ಶ್ರೇಷ್ಟವಾದ ದಾನ ಯಾವುದು | || 2 ||

ವ್ರತ, ನಿಯಮಗಳ ಗೊಜಲು ತಿಳಿಯದು|

ಸತತ ನಾಮಸ್ಮರಣೆ ಮನದಿ ಇರಲು ||

ತೀರ್ಥಯಾತ್ರೆಯಲಿ ತನು ಸಹಕರಿಸದು |

ಸಾರ್ಥಕತೆಗೆ ಸೇವೆ ಯಾವುದು? | || 3 ||

ವರ್ಣಪ್ರತಿಪಾದ್ಯ ಸುವರ್ಣ ನಾಮಕ? |

ವಾಣಿಪತೀಶನೇ ತೋರಿದ ಸೇವೆಯೆಂದು ||

ಬಣ್ಣಿಸಿ ಬರೆದ ಲೀಲೆಗುಣ ಪದಗಳನು |

ಗುಣಾರ್ಣವ ಶೀಕೃಷ್ಣವಿಟ್ಠಲನಿಗೆ ಸಮರ್ಪಿಸುವೇ ಸ್ವೀಕರಿಸೋ | || 4 ||

183. ಸರ್ವರಕ್ಷಕ ನೀನಲ್ಲದೆ ಮತ್ತ್ಯಾರು ಇಹಪರದೊಳು |

ಸರ್ವತ್ರ, ಸರ್ವಪರಿಯಲಿ ಸಂದೇಹವಿಲ್ಲದೆ ರಕ್ಷಿಪೆ | || ಪ ||

ಅವನಿಯೊಳು ಮತ್ತೆ ಮತ್ತೆ ಅವತರಿಸಿ ಸಲಹುವ | || ಅಪ ||

ಪ್ರಳಯದಿ ಸತ್ಯವ್ರತನ ರಕ್ಷಿಸಿದೆ |

ಮುಳುಗುವ ಮಂದರಗಿರಿ ಎತ್ತಿಪಿಡಿದೆ ||

ಇಳೆಯನು ಕೋರೆಯಲ್ಲೆತ್ತಿ ಕಾಪಾಡಿದೆ |

ಉಳುಹಿದೆ ಬಾಲಕನ ಭಕ್ತಿಯಲಿ ಮೆಚ್ಚಿ ||

ಕೇಳಿದಾನವ ದಾನವನ ಪಾತಾಳಕ್ಕೊತ್ತಿದೆ | || 1 ||

ಪಾಲಿಸಲು ಪಿತೃವಾಕ್ಯ ಮಾತೆಯ ಶಿರ ಕಡಿದೆ |

ಶಿಲೆಯಂತಾದ ಬಾಲೆಯನುದ್ಧರಿಸಿದೆ ||

ಬಾಲ ಲೀಲೆ ತೋರಿ ಗೋಪಿಯರ ಹರಸಿದೆ |

ಒಲಿಸಲು ಮನವ ದುರ್ಮತ ಬೋಧಿಸಿದೆ ||

ಕಾಲನ ರಕ್ಷಿಸಲು ಹಯವನೇರಿ ಬರುವಿ | || 2 ||

ಶಿಶುವು ರಕ್ಷಿಸಿದೆ ಜನನಿಯ ಗರ್ಭದಿ |

ಖುಷಿ ಕೃತ್ಯೆಯಿಂದ ರಕ್ಷಿಸಿದೆ ವ್ರತಸ್ಥನ ||

ದುಷ್ಟರ ತರಿದು ಶಿಷ್ಟರ ರಕ್ಷಕನಾದೆ ||

ಅಕ್ಷಯಾಂಬರವಿತ್ತು ಮಾನವ ಕಾಯ್ದೆ |

ಕಷ್ಟಕಾಲಕೆ ಒದಗುವ ಸಖ ಶ್ರೀಕೃಷ್ಣವಿಟ್ಠಲ | || 3 ||

184. ಉಡುಪಿಯ ಅನ್ನಬ್ರಹ್ಮ-ಶ್ರೀಕೃಷ್ಣ |

ಪಂಢರಿಯ ನಾದಬ್ರಹ್ಮ-ವಿಟ್ಠಲ ||

ಗೂಢಾಕಾರದ ಶ್ರೀಕೃಷ್ಣವಿಟ್ಠಲನೇ |

ಗುಡ್ಡದ ಮೇಲಿನ ಶ್ರೀನಿವಾಸ ||

ಒಡೆಯಾ ಅಡಿಗಡಿಗೆ ವಂದಿಪೆ |

ಎಡಬಿಡದೆ ರಕ್ಷಿಸು ಅನವರತ ||

185. ಲಕ್ಷಕೊಡುವವ ನೀನೆ |

ಭಿಕ್ಷೆ ಬೇಡಿಸುವವ ನೀನೇ ||

ಲಕ್ಷಣದಿ ಪೀತಾಂಬರ ಉಡುಸುವ ನೀನೆ |

ತಕ್ಷಣದಿ ಹರಕು ಉಡಿಸುವವ ನೀನೇ ||

ಭಕ್ಷ್ಯ ತಿನಿಸುವವ ನೀನೇ |

ಲಕ್ಷಿಸದೆ ಉಪವಾಸ ಬೀಳಿಸುವವ ನೀನೇ ||

ಕುಕ್ಷಿಯೊಳಗೆ ಸಕಲ ಜಗತ್ ಧರಿಸಿ |

ಸಾಕ್ಷಿಯಾಗಿ ಇರುವೆ ಶ್ರೀಕೃಷ್ಣವಿಟ್ಠಲ ||

186. ಶಾಪವೂ ಅನುಗ್ರಹವಾಗುವುದು |

ಪಾಪವೂ ಕಳೆದು ಹರುಷವಾಹುದು | || ಪ ||

ನಾರಿಶಾಪದಿ ಶಿಲೆಯಾದಾಗ |

ಶ್ರೀರಾಮನ ದರುಶನವಾಯಿತು ||

ಕರಿಯ ಪಾದ ಮಕರ ಪಿಡಿದಾಗ |

ಹರಿಯ ದರುಶನವಾಯಿತು | || 1 ||

ಊರ್ವಶಿಯ ಶಾಪಕಳೆದು |

ಮರಳಿ ಕಳುಹಿದ ಇಂದ್ರ ನಡೆಗೆ ||

ಮರವಾದ ಗಂಧರ್ವರ ಮನ್ನಿಸಿ |

ಒರಳಿಂದ ತಾಕಿಸಿ ದರುಶನವಿತ್ತ | || 2 ||

ವಿಪತ್ತು ಸದಾ ಬೇಡಿದಳು ಕುಂತಿ |

ಆಪದ್ಬಾಂಧವನ ದರುಶನವಾಹುದೆಂದು ||

ಆಪತ್ತು ಬರಲೀಸ ತನ್ನ ಭಕುತರಿಗೆ |

ತಪ್ಪದೇ ಕಾಯುವ ಶ್ರೀಕೃಷ್ಣವಿಟ್ಠಲ | || 3 ||

187. ಅದ್ಭುತ! ತಮದ್ಭುತ | ಜಗತ್ ಸೃಷ್ಟಿ |

ಸದ್ಭಾವೇ, ಸಾಧುಭಾವೇ ವೀಕ್ಷಿಸೇ ಅತಿ ಸುಂದರ ||

ಉದ್ಭವ ವಸ್ತು ಚಿತ್ರ ವಿಚಿತ್ರ ವಿನ್ಯಾಸ |

ಸ್ವಭಾವ, ಸ್ವರೂಪ ಭಿನ್ನಾಭಿನ್ನದಿ ತೋರ್ಪ ||

ಗಂಭೀರ, ಪರೇಶ ಶ್ರೀಕೃಷ್ಣವಿಟ್ಠಲನ ಚಾತುರ್ಯಫಲ ||

188. ಸಲಹೋ ಎನ್ನ ಸ್ವಾಮಿ ಸದಾ ಸಲಹೋ |

ಒಲವಿಂದ ಎಡ ಬಿಡದೆ ಸಲಹೋ | || ಪ ||

ಜ್ಞಾನ ಸ್ವರೂಪಿ ಜ್ಞಾನವಿತ್ತು ಸಲಹೋ |

ಆನಂದರೂಪಿ ಆನಂದವಿತ್ತು ಸಲಹೋ ||

ಮಾನ್ಯತೆ ಇತ್ತು ಮಾನದಿಂ ಸಲಹೋ |

ಅನ್ಯನೆನಿಸದೆ ನಿನ್ನವನೆಂದೆಣಿಸೋ | || 1 ||

ಹತ್ತು ಮಂದಿ ಕೈವಶ ಮಾಡದಿರೋ |

ಎತ್ತಿನಂತೆ ದುಡಿಸಿ ದಂಡಿಸುವರೋ ||

ಮತ್ರ್ಯ ನಾನು ನ್ಯೂನ್ಯತೆಯೇ ತುಂಬಿದೆ |

ಕರ್ತೃ ಶ್ರೀಕೃಷ್ಣವಿಟ್ಠಲ ಮುಕ್ತಿಯ ತನಕ ಸಲಹೋ | || 2 ||

189. ಸೃಷ್ಟಿಯ ಅಗಾಧತೆ ಕಂಡು ದಂಗಾದೆ |

ಸ್ಪಷ್ಟ ಅಸ್ಪಷ್ಟತೆಯ, ಚಿತ್ರವಿಚಿತ್ರದ ಗೂಡು ||

ಅಷ್ಟೂ ಅಚಿಂತ್ಯಾದ್ಭುತ ವೈವಿಧ್ಯತೆಯಲಿ |

ಇಷ್ಟ ದೈವ ಶ್ರೀಕೃಷ್ಣವಿಟ್ಠಲನ ಕರ್ತೃತ್ವ ಶಕ್ತಿ ಆಳ ಅರಿಯದಾದೆ ||

190. ತಳಮಳಿಸದಿರು, ಎಲೈ, ಮನವೇ |

ವ್ಯಾಳವ್ಯಾಳಕೆ ಸಲಹುವ ಸಂಶಯ ಬೇಡಾ | || ಪ ||

ಪುಟ್ಟಿಸುವವ ಸಕಲ ಜೀವಿಯ |

ಹೊಟ್ಟೆಗೆ ಹಾಕುವವ ಸಕಾಲಕೆ ||

ಬಟ್ಟೆಕೊಟ್ಟು ಮಾನ ಕಾಯುವ |

ಒಟ್ಟಿನಲಿ ಸರ್ವ ಭಾರಹೊತ್ತಿರುವ | || 1 ||

ಯಾವಾಗ ಯಾರಿಗೆ ಏನು ಕೊಡಬೇಕೆಂದು |

ಪೂರ್ವ ನಿರ್ಧಾರಿತವಾಗಿರುವಾಗ ||

ಜಾವಜಾಗರದಿ ಕಣ್ಣುರೆಪ್ಪೆಯೆಂದದಿ ಕಾಯ್ವ |

ಅವ್ವೆ ಕೂಸಿಗೆ ಉಣಿಸುವಂದದಿ ಉಣಿಸುವ | || 2 ||

ಚರಾಚರರಗಳ ಬಾಧ್ಯತೆ ಹೊತ್ತಿರುವ |

ಮಾ-ರಮಣನ ಪಾದಗಳ ಭಜಿಸಿ ||

ಸ್ವರಮಣ ಶ್ರೀಕೃಷ್ಣವಿಟ್ಠಲನೇ ಸದಾ ಪೊರೆವನೆಂದು |

ಸ್ಥಿರನಂಬಿಕೆಯಲಿ ಸಂತೈಸಿಕೋ | || 3 ||

191. ನಾನ್ಯಾರೆಂಬುದು ಗೊತ್ತಿಲ್ಲಾ |

ನಾನೆಲ್ಲಿಂದ ಬಂದೆ ಎಂಬುದು ತಿಳಿದಿಲ್ಲ ||

ನಾನ್ಯಾತಕೆ ಬಂದೆ ಕಾರಣ ಹೊಳೆದಿಲ್ಲ |

ನಾನೆಷ್ಟು ದಿನ ಇರುವೆ ಅರಿವಿಲ್ಲ ||

ನನ್ನ ಕೆಲಸವೇನು ಗುರುತಿಲ್ಲ |

ನನ್ನ ಪಾಲಿಗೆ ಬಂದಷ್ಟೇ ಏಕೆ ಮಾಡುತ್ತಿರುವೆ ||

ನಾನು ಬಯಸಿದಂತೇಕೆ ಆಗುವುದಿಲ್ಲ |

ನನ್ನತನ ಏಕೆ ನನ್ನ ವಶದಲ್ಲಿಲ್ಲಾ? ||

ನಾನು-ನಾನಲ್ಲವೆ? ನನ್ನದಲ್ಲವೆ? |

ನಾನೊಬ್ಬಳೇ ಹೀಗೋ ಅಥವಾ ಸರ್ವವೂ ಹೀಗೇಯೋ ||

ನಾನು ನನ್ನೊಳವನ್ನು ತಿಳಿವುದ್ಹ್ಯಾಂಗೆ |

ನಾನು ನಾನೆಂದು ಆಗುವೆ ತಿಳಿಯದು ||

ನನ್ನನ್ನು ನನಗೇ ಪರಿಚಯಿಸು ದಯಾನಿಧೆ |

ನಿನ್ನನ್ನೇ ನಂಬಿರುವೆ ಶ್ರೀಕೃಷ್ಣವಿಟ್ಠಲ ||

192. ಎಂಟದೆಯ ಬಂಟ ನಂಬಿದವರ ಕಂಟಕ ಕಳೆವ |

ಎಂಟು ದಳದಲಿ ಸ್ವಾನಿಯೊಡನೆ ಒಂಟಿಯಾಗಿ ತಿರುಗುವ ||

ಒಟ್ಟಿನಲಿ ಸಕಲೇಂದ್ರಿಯಗಳಲ್ಲಿದ್ದು ತಾ ನಡೆಸುವ |

ಸೃಷ್ಟೀಶನಾಜ್ಞೆಯಲಿ ಜೀವಿಗಳಲಿ ಸಂಚೇತನ ತಾನಾಗಿ ||

ಸುಟ್ಟು ಪಾಪ, ಕಷ್ಟ ಕಳೆದು ಹರುಷವೀವ |

ದುಷ್ಟರ ಕುಟ್ಟಿ ಸದೈವ ಶಿಷ್ಟರ ಪೊರೆವ ||

ಗುಟ್ಟಾಗಿ ಸಾಧನೆ ಮಾರ್ಗದಿ ಮುನ್ನಡೆಸುವ |

ಬಿಟ್ಟು ಬಿಡದೆ ಶ್ರೀಕೃಷ್ಣವಿಟ್ಠಲನ ಹೊತ್ತು ತಿರುಗುವನ್ಯಾರು ಪೇಳೆ? ||

193. ದುಃಖ ಭಂಜಕ, ಸುಖ ಪ್ರದಾಯಕ, ಅಖಿಲ ಜಗತ್ರಾತ |

ಖಗವಾಹನ, ಸಖ ಶ್ರೀಕೃಷ್ಣವಿಟ್ಠಲ ವಿಶ್ವಬಂಧು: ||

194. ನೀನೇ ಎಲ್ಲಾ, ನೀನಿಲ್ಲದೇನಿಲ್ಲ |

ಎನ್ನದೆಲ್ಲ ನಿನ್ನದೇ ಸ್ವೀಕರಿಸೋ || ಸ್ವಾಮಿ ಸ್ವೀಕರಿಸೋ | || ಪ ||

ನಿನ್ನ ಕರುಣೆ ಕಂದ ಸದಾ ನಾನಾಗಿರಲಿ |

ನಿನ್ನೊಲುಮೆ ಸವಿಗೆ ಸಮಾನ ಯಾವುದೂ ಇಲ್ಲ ||

ಎನ್ನನು ನಿನ್ನವಳಾಗಿಸು ಇಲ್ಲ ನೀ ಎನ್ನವನಾಗು |

ಎನ್ನೊಡೆಯ ನೀ ಆಡಿಸಿದಂತಾಡುವೆ ಬೇರಿಲ್ಲ | || 1 ||

ನನ್ನ ಭಾಗ್ಯದಿಂದ ಈ ಪರಿ ಆಗಿದ್ದೇನು? |

ನಾನಾಗಿ ಬೇಡಿ ಬಯಸಿ ಮಾಡಿದ್ದೇನು? ||

ದಿನ-ದಿನವೂ ದಿವಾ-ರಾತ್ರಿಲಿ ಎಡಬಿಡದೆ |

ಎನ್ನಿಂದ ಮಾಡಿಸಿದ್ದು ಎನ್ನಿಚ್ಛೆಯಂತಲ್ಲ | || 2 ||

ಆನಂದತೀರ್ಥರು ಗುರುವಾಗಿರಲು |

ಆನಂದ ಶಾಸ್ತ್ರ ತಿಳಿಯುವ ಹಂಬಲವಿರಲು ||

ಅನವರತ ಶ್ರೀಕೃಷ್ಣವಿಟ್ಠಲ ಹೆದ್ದೈವನಿರಲು |

ನನಗೇನು ಭಯ ಇಹ-ಪರದೊಳು | || 3 ||

195. ನಾ ಅನ್ಯನಲ್ಲವೋ, ನೀನೆನ್ನ ಅನ್ಯನೆಂದೆಣಿಸಬೇಡಾ |

ನಾ ಅವರಳಾದರೇನು, ನಿನ್ನಂಶ ನಾನಲ್ಲವೇ? ||

ನೀ ಅವುಚಿಕೋ ಸದಾ ಮಾತೆ ಶಿಶುವನ್ನೆತ್ತಿಕೊಂಡಂತೆ |

ಎನ್ನಂತರ್ಯಾಮಿ ಸ್ವಾಮಿ, ಶ್ರೀಕೃಷ್ಣವಿಟ್ಠಲ ಬಿಡದೆ ಸಲಹು ||

196. ಈರ್ವರೂ ನಾರಾಯಣನ ಅಂತರಂಗ ಭಕ್ತರಿಹರು | || ಪ ||

ಸ್ವರೂಪದಿ ಸಾತ್ತ್ವಿಕರು ಸದಾ ಹರಿ ಸಮೀಪವಿದ್ದರೂ ಶಾಪಗ್ರಸ್ತರಾದರು || ಅಪ ||

ಮೂರು ಅಸುರ ಜನುಮವೆತ್ತಿದರು ಈ ಭುವಿಯಲಿ |

ಧರ್ಮಬೋಧಕರು ಸನೀಹದಿ ಪ್ರತಿ ಜನುಮದಿ ಇದ್ದರೂ ||

ಪ್ರಾರಬ್ಧಕರ್ಮ ತೀರದು ಅನುಭವಿಸುವತನಕ |

ಯಾರನ್ನೂ ಬಿಡದು ದೇವ-ಮಾನವರ ಸಹಿತ | || 1 ||

ಹಿರಣ್ಯಕಶ್ಯಪನಿಗೆ ಸುತ ಪ್ರಲ್ಹಾದನಿದ್ದ ಹಿತೋಪದೇಶಕೆ |

ಎರಡನೇ ಜನುಮ ರಾವಣ-ಕುಂಭಕರ್ಣರಿಗೆ ವಿಭೀಷಣನಿದ್ದ ||

ಮೂರನೇ ಜನುಮ ಶಿಶುಪಾಲ-ದಂತವಕ್ತ್ರರಿಗೆ ಉಪದೇಶಿಸಲು |

ಶ್ರೀಕೃಷ್ಣವಿಟ್ಠಲನೇ ಸ್ವಯಂ ಎದುರಲಿ ನಿಂತು ಪೇಳಿದರೂ ಕೇಳಲಿಲ್ಲ | || 2 ||

197. ಎಲ್ಲಿ ಹರಿಯೋ ಮತ್ತಲ್ಲಿ ಪ್ರಾಣನಿರುವ || ಅಲ್ಲಿ ಪ್ರಾಣನಿರುವ ||

ಶ್ರೀಕೃಷ್ಣವಿಟ್ಠಲನ ನಿರುತ ಸೇವಿಸುತ | || 1 ||

ದೇಹದೊಳು ಪ್ರಾಣನಿರುವ ತತ್ತ್ವೇಶರೊಡಗೂಡಿ ಪ್ರೇರ್ಯಪ್ರೇರಕನಾಗಿ |

‘ಪ್ರೇರ್ಯ ಪ್ರೇರಕ’ನಾಗಿರುವ || ಶ್ರೀಕೃಷ್ಣವಿಟ್ಠಲನ ಅಣತಿಯಿಂದ | || 2 ||

ಸಕಲಕಾರ್ಯಗಳನು ಬಿಡದೆ ಮುಖ್ಯಪ್ರಾಣಾಂತರ್ಗತ ಸಮರ್ಪಿಸಿದರೆ |

‘ಸಮರ್ಪಿಸಿದರೆ’ || ಸದೈವ ಶ್ರೀಕೃಷ್ಣವಿಟ್ಠಲನೊಲಿವ | || 3 ||

ಒಂದು ರೂಪದಿಂ ಚತುರ್ರೂಪ ತಳೆದು|| ‘ತಳೆದು’ ||

ಸಹಸ್ರಾರು ರೂಪದಿಂ ಸಹಜದಿ ಜಗವ ಸಲಹುವ ಶ್ರೀಕೃಷ್ಣವಿಟ್ಠಲ || 4 ||

ಬ್ರಹ್ಮಾಂಡ-ಪಿಂಡಾಂಡದಿ ಬಹಿರಂತರ್ಗನಾಗಿ || ‘ಬಹಿರಂತರ್ಗತ’ನಾಗಿ ||

ತನ್ನಾಮ, ತದ್ರೂಪ, ತತ್ತದಾಕಾರನಾಗಿ ಶ್ರೀಕೃಷ್ಣವಿಟ್ಠಲ ವ್ಯಾಪ್ತನು ಎಂದುತಿಳಿ || 5 ||

ಒಂದು ರೂಪದಿ ಅನಂತರೂಪಗಳು || ‘ಅನಂತರೂಪಗಳು’ ||

ಅನಂತ ಗುಣಗಣ ಸಹಿತದಿ ಇರುವ ಶ್ರೀಕೃಷ್ಣವಿಟ್ಠಲಗೆ ಸರಿ-ಮಿಗಿಲಾರಿಲ್ಲ ||6||

ಪರ-ಅಪರ ತತ್ತ್ವಗಿಂತ ಪರಲೋಕ ವೈಕುಂಠಾಧಿಪತಿ || ‘ವೈಕುಂಠಾಧಿಪತಿ’ ||

ಶ್ರೀಕೃಷ್ಣವಿಟ್ಠಲನೇ ಪರತಮ ಪರತತ್ವ | || 7 ||

198. ಅಂಗಡಿಯ ಸರಕು ಇನ್ನೂ ಎಷ್ಟಿರುವುದು ಪೇಳಯ್ಯಾ | || ಪ ||

ಮುಗಿಯುವುದೆಂದು ಎನ್ನ ಪಾಲಿನ ಕರ್ಮಫಲ | || ಅಪ ||

ಬೇಗ ತೀರಿಸೆನ್ನ ಪೂರ್ವ ಜನುಮದ ವ್ಯಾಪರವಾ |

ಸಾಗರದಡಿಯ ಮುತ್ತು-ರತ್ನ ಬೊಗಸೆಗೆ ಬರುವುದೆಂದು ||

ಲಿಂಗದೇಹ ಭಂಗವಾಗುವ ಪರಿ ಅರುಹಯ್ಯಾ |

ಜಾಗ್ರತ, ಸ್ವಪ್ನ, ಸುಷುಪ್ತಿಯಲಿ ಕೊಡು ನಿನ್ನಧ್ಯಾನ ||

ಆಗಲಿ ಸದಾ ನಾಮ, ರೂಪ, ಕ್ರಿಯಾ ಚಿಂತನ | || 1 ||

ಬಗೆ ಬಗೆಯ ಸರ್ವಾವತಾರಗಳ ಲೀಲೆಗಳು |

ಜಗತ್ತಿನ ಹೊರ-ಒಳ ವ್ಯಾಪುತನ ದರುಶನ ||

ಈಗಲೂ-ಯಾವಾಗಲೂ ಸಂತತದಿ ಇದೇ ಕರುಣಿಸು |

ಪೋಗುತಿದೆ ಆಯುಷ್ಯ, ಉಳಿದಿದ್ದಾದರೂ ಸಾರ್ಥಕಗೊಳಿಸು ||

ಜಗನ್ನಾಥ ಶ್ರೀಕೃಷ್ಣವಿಟ್ಠಲ ಎಮಗೆಲ್ಲರಿಗೂ ಈ ಸುಖವೇ ನೀಡು | || 2 ||