ಡಾ ನರಸಾಪೂರ & ಪರಿವಾರ

ಶ್ರೀ ಕೃಷ್ಣವಿಠ್ಠಲಪದಗುಚ್ಛ 3.2

ಮುಳುಗಿಸೆನ್ನ ಈ ಜೀವನದಿ ಮುಳುಗಿಸು |

ಏಳದಂತೆ ಕುತ್ತಿಗೆ ಒತ್ತಿ ಮುಳುಗಿಸು ||ಪ||

ಒಪ್ಪಿದವರು ಮೆಚ್ಚುವಂತೆ ಸದಾ |

ಸಪ್ತಕ್ರಮದಲ್ಲೇ ಮುಳುಗಿಸು ||ಅಪ||

ಸುಪಾವಕ ಚಿನ್ಹೆ ಧರಿಸಿ ಮೆರೆವಲ್ಲಿ |

ಸುಪಥದಿ ಸಾಗಿ ಸಂದರ್ಶಿಸುವಲ್ಲಿ ||

ಕೃಪೆಯಿಂ ಸ್ವೀಕರಿಸುವ ತೀರ್ಥ-ಪ್ರಸಾದದಿ |

ಒಪ್ಪವಾಗಿ ಸತತ ನಾಮಸ್ಮರಣೆಯಲಿ ||

ಸುಪ್ತೇಶನ ರಂಗಿನ ಕಥಾಸಾಗರದಿ |

ಅಪ್ಯಾಯವಾದ ಆಳದ ಧ್ಯಾನದಲಿ ||

ಸುಪೂಜೆಯ ಮೌನದ ಆನಂದದಿ |

ಅಪ್ಪ ಶ್ರೀಕೃಷ್ಣವಿಠ್ಠಲ ನೀ ಮುಳುಗಿಸಿದಷ್ಟೂ ನಾ ತೇಲುವೆ ||2||

102. ಧರ್ಮ ಬೇರೆ, ದಾನ ಬೇರೆ |

ಧರ್ಮವೆಂದರೆ ಮನುಜ ಸಹಜ ||

ಕರುನದಿ ನೀಡುವ ಅನ್ನ-ವಸನ |

ಬೀರುವ ಸಹಾಯ ದೈನ್ಯರಿಗೆ ||

ಸರ್ವರ ಕಷ್ಟದಿ ಮನಮಿಡಿಯುವುದು |

ದಾನವೆಂದರೆ ಕೈಎತ್ತಿ ಪಾತ್ರರಿಗೆ ||

ನನ್ನದಲ್ಲ ಇದು ನಿಮ್ಮದೇ ಎಂದು |

ಮನಕೆ ಪ್ರೀತಿ ಕರವಾಗಿದ್ದು ಕೊಡುವುದು ||

ಪುಣ್ಯ ವಿಶೇಷ ಪಡೆಯಲು ದಕ್ಷಿಣೆ ಜೊತೆ |

ಎನ್ನ ಶ್ರೀಕೃಷ್ಣವಿಠ್ಠಲಗರ್ಪಿಸುವುದು ||

103. ದಾನದಿ ತ್ರಿವಿಧ ಉತ್ತಮ, ಮಧ್ಯಮ, ಅಧಮ |

ಮೌನದಿ ಸಕಾಲಕೆ ಪಾತ್ರರಿಗೆ ದಕ್ಷಿಣೆ ||

ಮನದಿ ಫಲಪೇಕ್ಷೆ ಇಲ್ಲದೆ ಕೊಡುವುದು ಉತ್ತಮ |

ದಾನಿಸಿದ ಮೇಲೂ ವಸ್ತುವಿನ ಮಮಕಾರ ||

ಮನದಿ ಪ್ರತಿ ಫಲಾಪೇಕ್ಷೆ ಇದ್ದರೆ ಮಧ್ಯಮ |

ತನಗೆ ಬೇಡವಾದ ತಿರಸ್ಕೃತ ವಸ್ತು ||

ತನ್ನ ಪ್ರಶಂಸನೆಗಾಗಿ ದಕ್ಷಿಣೆ ರಹಿತ ಇತ್ತರೆ ಅಧಮ |

ದಾನಿಸಿದರೆ ಶ್ರಿಕೃಷ್ಣವಿಠ್ಠಲ ಮೆಚ್ಚುವಂತಿರಬೇಕು ||

ಮನ್ನಿಸಿ ತನ್ನಾಲಯದಿ ಇರಿಸುವಂತಿರಬೇಕು ||

104. ಕಾಲಕೂ ಮುಂಚೆ ಕಾಣಿಸಿದಿರೆ |

ಫಲವೇನು ನಿನ್ನ ಪಾಡಿ-ಕೊಂಡಾಡಿದುಕೆ ||

ಬಲವಿಲ್ಲದೆನ್ನಲಿ, ಛಲ ತೋರದೆ |

ಅಲ್ಪ ದೃಷ್ಟಿಯ ಮಂದ ಭಾಗ್ಯಳೆನ್ನದೆ ||

ಅಲ್ಲಲ್ಲಿ ಸ್ವಲ್ಪವಾದರೂ ಕಂಡರೆ |

ಒಲುಮೆಯಲಿ ಶ್ರೀಕೃಷ್ಣವಿಠ್ಠಲ ನಿನ್ನ ಒಪ್ಪುವೆನಯ್ಯಾ ||

105. ಎಂದು ಒಲಿಯುವೆ ಎನಗೆ ಎಂದು ಕಾಂಬುವೆ |

ಎಂದಿಗೆ ಬಂದು ಬೇಗ ಸಂದರುಶನವೀವೆ ||ಪ||

ಸುತ್ತಮುತ್ತ ನೀನಿದ್ದರೂ ಎಲ್ಲೂ ಕಾಣೆನೂ |

ಪ್ರತಿ ವಸ್ತುವಲ್ಲಿದ್ದರೂ ಎಂದೂ ತೋರಲಿಲ್ಲ ||

ತತ್ತದಾಕಾರದಲ್ಲಿದ್ದರೂ ಎಂದೂ ಗುರುತಿಸಲಿಲ್ಲ |

ಕತ್ತಲೆ ತುಂಬಿದೆ ಬೆಳಕಿನ ಕಿರಣ ಬೀರೆಯಾ ||1||

ವೇದಶಾಸ್ತ್ರವ ಖಚಿತದಿ ತಿಳಿಯಲಿಲ್ಲ |

ಬುದ್ಧಿ ಮನದಿ ಪೂರ್ಣದಿ ಅರಿಯಲಿಲ್ಲ ||

ಬುಧ-ಜನರ್ಯಾರೂ ಸಹಾಯವಾಗಲಿಲ್ಲ |

ಮಂದ-ಅಯೋಗ್ಯಳೆಂದು ತಿರಸ್ಕರಿಸಬೇಡಾ ||2||

ಅರಿತಷ್ಟು ಜ್ಞಾನದಿ ಸಾಧಿಸಿ ನೊಡದಾದೆ |

ಬರಿದೇ ಭಕ್ತಿಲಿ ಪೂಜಿಸಲು ಅರಿಯೆ ||

ವೈರಾಗ್ಯವೆನಿತೂ ಬಾರದೀ ಜನುಮದಿ |

ಕರುಣೆಯಲಿ ಶ್ರೀಕೃಷ್ಣವಿಠ್ಠಲ ನೀನೇ ಕಾಣಿಸೆಯಾ ||3||

106. ನೀನಿದ್ದರೆ ಸಕಲವೂ ಹಿತವೆನಿಸುವುದು |

ನೀನೆದ್ದರೆ ಹಿತವೂ ಅಹಿತವೆನಿಪುದು ||

ನೀನೊದ್ದರೆ ಬರುವುದೂ ಬಾರದು |

ನೀನೇ ನನ್ನಹಿತ, ನನ್ನ ಭಾಗ್ಯ ಶ್ರೀಕೃಷ್ಣವಿಠ್ಠಲ ||

107. ಇರುಳಲಿ-ಹಗಲಲಿ ನೀನು |

ಸುರಿವ ಮಳೆ-ಮಿಂಚಲಿ ನೀನು ||

ಕಣ್ಣಿಗೆ ಕಾಣುವುದರೆಲ್ಲೆಲ್ಲಾ ನೀನು |

ಮಣ್ಣಿನ ಕಣ-ಕಣದಲಿ ನೀನು ||

ಆಕಾಶದ ಅವಕಾಶದಿ ನೀನು |

ಪ್ರಕಾಶದ ಸೂರ್ಯನಲಿ ನೀನು ||

ಬೀಸುವ ಗಾಳಿಯಲಿ ನೀನು |

ಸೂಸುವ ತಂಪಿನಲಿ ನೀನು ||

ದಾಹ ತಣಿಸುವ ನೀರಲಿ ನೀನು |

ದಾಹಕ ಅಗ್ನಿಯಲಿ ನೀನು ||

ನೋಡುವ ದೃಷ್ಟಿಯಲಿ ನೀನು |

ಪಾಡುವ ಪದದಲಿ ನೀನು ||

ಪ್ರತಿ ಉಸಿರಿನಲಿ ನೀನು |

ಪ್ರತಿ ತುತ್ತು ಅನ್ನದಿ ನೀನು ||

ಮಾಡುವ ಕರ್ಮದಲಿ ನೀನು |

ಬಡಿಯುವ ಮಿಡಿತದಿ ನೀನು ||

ಮೊಳಕೆಯ ಅಂಕುರದಿ ನೀನು |

ಸೆಳೆಯುವ ಪ್ರಾಣನಲಿ ನೀನು ||

ಸರ್ವಕಾಲದಿ ಸಕಲದಿ ನೀನು |

ಶ್ರೀಕೃಷ್ಣವಿಠ್ಠಲ ನೀನಿಲ್ಲದೇನಿಲ್ಲ ||

108. ಜೊತೆ ಬಾರದು ಎಂದಿಗೂ ಜೊತೆ ಬಾರದು |

ಮತ್ತೆ ಮಾಡಿದ ಪಾಪ-ಪುಣ್ಯ ಬಿಟ್ಟು ಬೇರೇನೂ ಬಾರದು ||ಪ||

ಉಂಡುಟ್ಟು ಮೆರೆದ ದೇಹಸುಖ |

ಗಂಡು ಗಲಿಯಂತೆ ಮಾಡಿದ ಅಧಿಕಾರ ||

ಬಿಡದೇ ಗಳಿಸಿದ ಆಸ್ತಿ-ಅಂತಸ್ತು |

ಒಡನಾಡಿಗಳು ಯಾರು ಸಂಗಡ ಬಾಹರು ||1||

ಅನ್ಯಾಯ-ಮೋಸದಿ ಗಳಿಸಿದ ಹಣ |

ದಾನಿಸದೇ ಜಿಪುಣತನದ ಹಣ ||

ಅನ್ನ-ವಿದ್ಯೆ-ಮಕ್ಕಳ ಮಾರಿದ ಹಣ |

ಮನೆ-ಮಡದಿ,ಬಂಧುಗಳ್ಯಾರೂ ಬಾಹರು ||2||

ಗುರು-ಹಿರಿಯರಿಗೆಸೆದ ದ್ರೋಹ |

ಕಿರಿಯರಿಗೆ, ದು:ಖಿತರಿಗೆ ಮಾಡದ ಸಹಾಯ ||

ಪರಮ ಪ್ರಿಯ ಶ್ರೀಕೃಷ್ಣವಿಠ್ಠಲನ ಸ್ಮರಿಸದಕಾಲ |

ವಜ್ರಲೇಪದಂತೆ ಬಿಡದೆ ಹಿಂಬಾಲಿಸುವುದು ||3||

109. ನೀನು ಸಕಲರಿಗೂ ಆಶ್ರಯನಾದರೆ |

ನಾನೂ ಆಶ್ರಯದಾತೆ ನಿನ್ನ ಒಲುಮೆಯಲಿ ||ಪ||

ನೀನು ಒಂಟಿ ನಿನ್ನಿಂದ ಎಲ್ಲರೂ ಇಹರು |

ನಾನು ಸಂಘ ಜೀವಿ ಇವರಿಲ್ಲದೆ ಬದುಕಲಾರೆ ||ಅ.ಪ||

ಎನ್ನೊಳಗೊಬ್ಬ ಆಸೆಬುರುಕನಿರುವ |

ಎನ್ನೊಳಗೊಬ್ಬ ಸುಳ್ಳನಿರುವ ||

ಎನ್ನೊಳಗೊಬ್ಬ ಕಳ್ಳನಿರುವ ||1||

ಎನ್ನೊಳಗೊಬ್ಬ ಸಮಯ ಸಾಧಕನಿರುವ |

ಎನ್ನೊಳಗೊಬ್ಬ ವಂಚಕನಿರುತ ||

ಎನ್ನೊಳಗೊಬ್ಬ ಕ್ರೋಧನಿರುವ ||2||

ಎನ್ನೊಳಗೊಬ್ಬ ಕಾಮುಕನಿರುವ |

ಎನ್ನೊಳಗೊಬ್ಬ ಮತ್ಸರನಿರುವ ||

ಎನ್ನೊಳಗೊಬ್ಬ ಅಸಹನನಿರುವ ||3||

ಎನ್ನೊಳಗೊಬ್ಬ ದ್ವೇಷಿ ಇರುವ |

ಎನ್ನೊಳಗೊಬ್ಬ ದು:ಖಿ ಇರುವ ||

ಎನ್ನೊಳಗೊಬ್ಬ ಅಸಂತೃಪ್ತಿ ಇರುವ ||4||

ಎನ್ನೊಳಗೆಲ್ಲ ಇವರೇ ಇರಲಾಗಿ |

ನಿನಗೆಲ್ಲಿದೆ ಜಾಗ ಶ್ರೀಕೃಷ್ಣವಿಠ್ಠಲ ||

ನಿನ್ನೊಳಗೇ ಸದಾ ಎನ್ನಿರಿಸಿಕೋ ಸ್ವಾಮಿ-ದಯಾನಿಧೇ ||5||

110. ವಿಷ ವಿಷಯಗಳಿಂದ ದೂರ ವಿಶೇಷ |

ಅಶೇಷ ದೋಷದೂರ ಶೇಷಶಾಯಿ ||

ಈಶ ಸುರಾದಿ ನರರಿಗೂ ಲಕ್ಷ್ಮೀಶ |

ಶುಚಿಪ್ರಿಯ ಶುಭದಾಯಿ ಶ್ರೀಕೃಷ್ಣವಿಠ್ಠಲ ||

111. ಶಾಂತ, ಅತೀಶಾಂತ, ಸುಶಾಂತನಿವ ||ಪ||

ಭ್ರಾಂತನಲ್ಲ ಲಕ್ಷ್ಮೀಕಾಂತ ಸುಕಾಂತ ||ಅ.ಪ||

ಅಂತ್ಯ ಆದಿ ಇಲ್ಲದವ ಪ್ರಶಾಂತ |

ಸ್ವತಂತ್ರ ತಾನಿರುವ ಸದಾ ಸ್ವರತ ||

ಮತ್ಸ್ಯಾದಿ ರೂಪದಿ ಅವತರಿಪ |

ಅಂತರ್ಬಹಿರ ಬ್ರಹ್ಮಾಂಡದಿ ವ್ಯಾಪುತ ||1||

ಸತತ ಸೃಷ್ಟಿ-ಲಯ ಲೀಲೆಯಲಿ ಮಾಳ್ಪ |

ಸ್ಥಿತಿ-ನಿಯಮನದಿ ತಲ್ಲೀನ ಗುಣಪೂರ್ಣ ||

ಭಕ್ತವತ್ಸಲ ದು:ಖಾರ್ತ-ಭೀತರ ಕಾಯ್ವ |

ಮೂರ್ತಿಮಾನ್ ಸಚ್ಚಿದಾತ್ಮ ಶ್ರೀಕೃಷ್ಣವಿಠ್ಠಲ ||2||

112. ನಮ್ಮವರೆಂಬುವರು ಹೊತ್ತಿಗೆ ಒದಗರು |

ಸುಮನದಿ ಹೊತ್ತಿಗಾಗುವರೇ ನಮ್ಮವರು ||

ನಮ್ಮವರು-ಪರರೆನ್ನದೆ ಸೇವಿಸು ಸರ್ವರ |

ನಮ್ಮವರಲ್ಲದವರೂ ನಮ್ಮವರಾಗುವರು ||

ನಮ್ಮವನಾಗೇ ಸದಾ ಇರುವವನೊಬ್ಬನೇ |

ನಮ್ಮ ಸಹೃದಯಿ, ಅವನೇ ಶ್ರೀಕೃಷ್ಣವಿಠ್ಠಲ ||

113. ಯಾರೋ ಹೆತ್ತವರು, ಯಾರೋ ಅನ್ನವಿತ್ತವರು |

ಯಾರೋ ವಿತ್ತ ವಿತ್ತವರು, ಯಾರೋ ವಿದ್ಯೆ ವಿತ್ತವರು ||

ಯಾರೋ ಜೊತೆಯಲ್ಲಿದ್ದವರು, ಯಾರೋ ಬಿಟ್ಟುಹೋದವರು |

ಯಾರೋ ಹೊತ್ತಿಗಾದವರು, ಯಾರೋ ಧೈರ್ಯವಿತ್ತವರು ||

ಯಾರೋ ಸುಖವಿತ್ತವರು, ಯಾರೋ ದು:ಖವಿತ್ತವರು ||

ಯಾರೋ ಗೊತ್ತಿದ್ದವರ, ಗೊತ್ತಿಲ್ಲದವರ ಕೈವಾಡ ||

ಯಾರೋ ಸ್ಮಶಾನಕೊಯ್ಯುವರು, ಪರರ ಸ್ವತ್ತು ಈ ಜೀವನ |

ಯಾರೂ ಮೊದಲಿಂದ ಕಡೆವರೆಗೆ ಇರಲಿಲ್ಲ ||

ಯಾರು ಯಾರೋ ಗೊತ್ತಿಲ್ಲ ಆದರೆ ಎಲ್ಲರೊಳಗಿರುವ |

ಪರಾತ್ ಪರ ಶ್ರೀಕೃಷ್ಣವಿಠ್ಠಲನಂತೆ ನಡೆವುದು ಸದಾ ||

114. ಎಲ್ಲಿ ಹುಡಕಲಿ ರಂಗಯ್ಯಾ ನಿನ್ನ ಎಲ್ಲಿ ಕಾಣಲಿ |

ಎಲ್ಲೆಡೆ ನೀನಿರುವಿ ಎಂಬುವರು ಬಲ್ಲವರು ||ಪ||

ಕಲ್ಲಿನಲ್ಲೂ ಕಾಣೆನಲ್ಲ-ಎಲ್ಲರಲ್ಲೂ ಕಾಣೆನು |

ಸಲ್ಲುವರಲ್ಲೂ ಕಾಣಸಿಗದೇ ಎಲ್ಲಿ ಇರುತಿಹಿ ||

ಮೇಲ್ನೋಟಕೆ ಕಂಡಿರುವೆ ನಿನ್ನ ಎಂಬುವರ |

ಸೊಲ್ಲ ಕೇಳಿ ಹುಡುಕಿ ಹುಡುಕಿ ಮೋಸಹೋದೆ ||1||

ಹೊರಗಣ್ಣಿನಿಂದ ಗುರುತಿಸದಾದೆ |

ಅರಿಯ ದಾದೆ ಅಂತರಂಗದಲಿ ||

ಸರಿದ ಸಮಯ ಸರಿದು ಹೋಯಿತು |

ಬರುವ ಸಮಯ ಸಾರ್ಥಕಗೊಳಿಸು ||2||

ಬುದ್ಧಿಗೆ ನಿಲುಕದ, ದೃಷ್ಟಿಗೆ ಎಟುಕದ |

ಒಂದು ಕ್ಷಣವೂ ಮನದಿ ನಿಲ್ಲದವನ ||

ಎಂದೂ ಕಾಣದೆ ವ್ಯರ್ಥ ಪ್ರಯತ್ನಿಸಿದೆ |

ಹೃದಯದಿ ವಾಸಿಪ ಶ್ರೀಕೃಷ್ಣವಿಠ್ಠಲ ಇನ್ನೂ ಕಾಣಲಿಲ್ಲ ||3||

115. ನಿನ್ನ ಭಕ್ತರ ಪಟ್ಟಿಯಲ್ಲಿ |

ಅನ್ನ-ದಾನ ಕೊಟ್ಟವರಲ್ಲಿ ||

ಅನ್ಯರಲ್ಲಿ ದಯೆ ಇಟ್ಟವರಲ್ಲಿ |

ಜ್ಞಾನಿಗಳ ಸಾಲಿನಲ್ಲೂ ಎನ್ನ ಹೆಸರಿಲ್ಲ ||

ನಿನಗಾಗಿ ವ್ರತ ಮಾಡದವರ |

ನಿನ್ನ ಪ್ರೀತ್ಯರ್ಥಶಾಸ್ತ್ರ ಓದದವರ ||

ನಿನ್ನ ಹೊರತು ಅನ್ಯರತರಲ್ಲಿ |

ಎನ್ನ ಹೆಸರೇ ಮೊದಲಿದೆ ||

ಚೆನ್ನ ಶ್ರೀಕೃಷ್ಣವಿಠ್ಠಲ ಸರಿಯೋ ತಪ್ಪೋ ತಿಳಿಯದು |

ನೀನಿಟ್ಟಂತೆಯೇ ಸದಾ ನಾನಿರುವೆ ||

116. ಎಷ್ಟು ದಿವ್ಯ, ಎಷ್ಟು ಭವ್ಯ- ಶ್ರೀಕೃಷ್ಣಗಾಥಾ |

ಎಷ್ಟು ರಮ್ಯ, ಎಷ್ಟು ರೋಚಕ - ಶ್ರೀಕೃಷ್ಣಗಾಥಾ ||

ಶಿಷ್ಟ ವಿಶಿಷ್ಟ, ನಿತ್ಯ ಸತ್ಯ - ಶ್ರೀಕೃಷ್ಣಗಾಥಾ |

ನಿಷ್ಠೆಯಲಿ ಧರ್ಮಪರಿಪಾಲಕ- ಶ್ರೀಕೃಷ್ಣಗಾಥಾ ||

ಪುಟ್ಟವನಾಗಿ ಗೈದ ಮೇರು ಸಾಹಸದ- ಶ್ರೀಕೃಷ್ಣಗಾಥಾ |

ದುಷ್ಟರ ದಮನ ಗೈದು ರಕ್ಷಿಸಿದ - ಶ್ರೀಕೃಷ್ಣಗಾಥಾ ||

ಕಷ್ಟಕಾಲದಿ ಸಕಲರ ಸಲುಹಿದ - ಶ್ರೀಕೃಷ್ಣಗಾಥಾ |

ದಿಟ್ಟ ಸದಾ ಆಪದ್ಬಾಂಧವನ- ಶ್ರೀಕೃಷ್ಣಗಾಥಾ ||

ಇಷ್ಟದಿ ತತ್ವಜ್ಞಾನ ಬೋಧಿಸಿದ - ಶ್ರೀಕೃಷ್ಣಗಾಥಾ |

ದೃಷ್ಟಿಯಲಿ ವಿರಾಟರೂಪ ತೋರಿದ - ಶ್ರೀಕೃಷ್ಣಗಾಥಾ ||

ಚೇಷ್ಟೆಯಲಿ ಸ್ವಕುಲ ನಾಶಗೈದ- ಶ್ರೀಕೃಷ್ಣಗಾಥಾ |

ಹೃಷ್ಟನಾದ ವೀರ ಶ್ರೀಕೃಷ್ಣವಿಠ್ಠಲನ- ಶ್ರೀಕೃಷ್ಣಗಾಥಾ ||

117. ಸಕಲರ ಬದುಕಿನ ದಾರಿದೀಪ ಶ್ರೀಕೃಷ್ಣನಕಥೆ |

ಸಕಲ ಕಲಾವಲ್ಲಭ ತಾ ನಡೆದು ತೋರಿದ ||

ಸುಕರ್ಮ-ಕುಕರ್ಮಗಳ ಫಲವೀವ ನಿತ್ಯ |

ಸಂಕಲ್ಪ-ವಿಕಲ್ಪ, ಭಕ್ತ-ಅಭಕ್ತರ ಪೋಷಿಪ ||

ಶ್ರೀಕೃಷ್ಣವಿಠ್ಠಲ ಯದುಕುಲ ಲಲಾಮ ಸತ್ಯಸ್ಯಸತ್ಯ ||

118. ನಂಬಿದರಿಗೆ ಇಂಬುನೀಡುವ |

ನಂಬದವರಿಗೆ ಚೊಂಬು ಕೊಡುವ ||

ನಂಬಿಯೂ-ನಂಬದವರಿಗೆ ಕಂಬದಂತಿರುವ |

ನಿಭತ್ಕಾಯ ಶ್ರೀಕೃಷ್ಣವಿಠ್ಠಲ ಅವರವರ ತೆರನಾಗಿರುವ ||

119. ಸತತ ಮಾಡುವ ಕೆಲಸ ಸರಾಗವಾಗುವಂತೆ |

ಚಿಂತಿಸುವುದು ಅಂತೆಯೇ ಸುರಾಗವಾಗುವುದು ||

ಅಂತ್ಯಕಾಲದಿ ಶ್ರೀಕೃಷ್ಣವಿಠ್ಠಲನ ಚಿಂತನೆ ಬರಬೇಕೆಂದರೆ |

ಸತತ ಚಿಂತನೆಯ ಸುರಾಗವಿದ್ದರೆ ಸರಾಗದಿ ಆಗುವುದು ||

120. ದುರ್ಗಂಧ ಒಳಗೆ ತುಂಬಿರಲು | ಸುಗಂಧ ಹೊರಗೆ ಸೂಸುವುದ್ಹೇಗೆ ?|

ದುರ್ಗತಿ ಭಾವ ಒಳಗಿರಲು | ಸುಗತಿ ಮಾರ್ಗಪ್ರಾಪ್ತಿ ಹೇಗೆ ?||

ಸಂಗತಿ ಒಳ್ಳೆಯದಿರಲು | ಭಂಗ ಬರುವುದು ತಪ್ಪುವುದ್ಹೇಗೆ ||

ಮಂಗಳೇ ಕಟಾಕ್ಷವಿಲ್ಲದಿರೆ | ರಂಗ ಶ್ರೀಕೃಷ್ಣವಿಠ್ಠಲ ಒಲಿಯುವನ್ಹೇಗೆ ||

ಸುಗತಿ = ಮೋಕ್ಷಮಾರ್ಗ

ಭಂಗ= ಪುಣ್ಯಕಾರ್ಯದಿ

ಮಂಗಳೇಕಟಾಕ್ಷ = ಅಂತರ್ಗತಪೂಜೆ

121. ಜನಮನ ಜಗದೀ ಮೆಚ್ಚಿಸುವುದು ದುಸ್ತರ |

ಮನವಿರೆ ಅಂದಣದೀ ಕೂರಿಸಿ, ಇಲ್ಲದಿರೆ ಕೆಳಗೆ ನೂಕುವರು ||

ಕೊನೆವರೆಗೂ ಕೈಬಿಡದಿರುವವನೊಬ್ಬನೇ |

ಅನಿಮಿತ್ತ ಬಂಧು ಅವನೇ ಶ್ರೀಕೃಷ್ಣವಿಠ್ಠಲ ||

122. ಜನ್ಯ ಜನಕ ಪ್ರತಿ ಜನುಮಕೆ ಅನ್ಯರಿಹರು |

ಮಾನ-ಅಪಮಾನ ಪ್ರತಿ ಕ್ಷಣದಿ ಆಗುವುದು ||

ಅನ್ಯ ಚೊಂತಸದೆ ಸದಾ ಶ್ರೀಕೃಷ್ಣವಿಠ್ಠಲನ್ನೆ ಉಪಾಸಿಸಿದರೆ |

ಮಾನದೋ ಮಾನ್ಯ ನಿತ್ಯವೂ ಯೋಗಕ್ಷೇಮ ನೋಡಿಕೊಳ್ಳುವ ||

123. ಕ್ರೌರ್ಯವು ನರ-ನಾಡಿಯಲಿ ಹರಿವಾಗ |

ದಯೆಯು ಹೊರಗೆ ಸೂಸಬಲ್ಲುದೆ ? ||

ಮಾಯೆಯು ಒಳ-ಹೊರಗೆ ತುಂಬಿರಲು |

ಕಾಯಾ, ವಾಚಾ, ಮನಸಾ ಶ್ರೀಕೃಷ್ಣವಿಠ್ಠಲನ ಸೇವಿಸಲು ಸಾಧ್ಯವೇ ||

124. ದಾನಿಸಬೇಕು ಸದಾ ದಾನಿಸುತಿರಬೇಕು |

ದಾನದಲ್ಲಿ ದಾನ ಶ್ರೇಷ್ಠ ಅನ್ನದಾನ ||

ಉನ್ನತ, ಅತಿ ಉತ್ತಮ ದಾನ ವಿದ್ಯಾದಾನ |

ಅನ್ನವು ಜೀವಕೆ ಕ್ಷಣಿಕ ತೃಪ್ತಿ ಇತ್ತರೆ ||

ವಿನಾಶರಹಿತ ವಿದ್ಯೆ, ಜೀವನ ಪರ್ಯಂತ |

ಮನದುಂಬಿ ಶ್ರೀಕೃಷ್ಣವಿಠ್ಠಲನ ಪ್ರೀತ್ಯರ್ಥ ||

ದಾನಿಸಿದ ದಾನವೇ ಸಾರ್ಥಕ ದಾನ ||

125. ಬಾಗಿದರೂ ಬೀಗಿದರೂ ಹೋಗಲೇಬೇಕು |

ಹೋಗುವುದು ಎಲ್ಲಿಗೆ, ಹೇಗೆ, ಯಾವಾಗ ||

ಆಗಲೋ, ಈಗಲೋ ಮತ್ತ್ಯಾವಾಗಲೋ ಗೊತ್ತಿಲ್ಲ |

ಸಗ್ಗ ಸುಖವೋ, ನರಕ ದು:ಖವೋ ತಿಳಿಯದು ||

ಜಗದಿಂದ ಹೊರಟು ಮರಳಿ ಬರುವರೆಗಿರುವ |

ಜಾಗ ಯಾರೂ ಅರಿಯರು, ಅರಿತವರು ಪೇಳರು ||

ಕರ್ಮಭೂಮಿ ಇದು, ಎಲ್ಲ ಅವಸರದಿ ಬಂದು |

ಪೂರ್ವನಿರ್ಧಾರಿತ ಕಾರ್ಯಮುಗಿಸುವರು ||

ಸರ್ವರ ಜೀವನವೂ ವೈವಿಧ್ಯ, ವೈಚಿತ್ರ್ಯವು |

ಸರ್ವ ಪ್ರಾಣಿಗಳ ಜನ್ಮ-ಮೃತ್ಯು ಮಾತ್ರ ಖಚಿತ ||

ಯಾರೋ, ಎಲ್ಲಿವರೋ ಇಲ್ಲಿ ಬಂದು ಜೊತೆಇದ್ದು |

ತೆರಳುವರು ಸ್ವಸ್ಥಾನಕ್ಕೆ ಶ್ರೀಕೃಷ್ಣವಿಠ್ಠಲನ ಅನುಜ್ಞೆಯಲಿ ||

126. ದುರ್ಗಮ ಜೀವನದ ಸುಗಮ ಮಾರ್ಗವೆಂದರೆ |

ಭಗವಂತನ ಪಾದಸೇವೆ, ಅನನ್ಯಭಕ್ತಿ ||

ಜಗಕೆ ಸತ್ಸಂತಾನ ಕೊಡ ಮಾಡುವಿಕೆ |

ನಿರ್ಗಮಿಸುವತನಕ ಸುಧರ್ಮ ಪರಿಪಾಲನೆ ||

ಸುಗುಣವಂತ ಶ್ರೀಕೃಷ್ಣವಿಠ್ಠಲನ ಅಣತಿಪಾಲನೆ |

ಆಗಲೇ ಮಾನವ ಜನುಮದ ಸಾರ್ಥಕ್ಯ ||

127. ತ್ರಿಕಾಲದಿ ಕಾಯಾ, ವಾಚಾ, ಮನಸಾ ಸುಖವೀವ |

ಶಂಕೆ ಇಲ್ಲದೆ ಕಷ್ಟಕಳೆದು ಸಂತೋಷವೀವ ||

ಸಕಲ ಪ್ರದಾತಾ ಈ ಜೀವಕೆ ಇಹ-ಪರದಿ ||

ಶ್ರೀಕೃಷ್ಣವಿಠ್ಠಲನ ನಂಬದೆ ಭವದಿ ಬಳಲುವಿರೇಕೆ ?||

128. ಪಂಚೇಂದ್ರಿಯ ಪಂಚ ಪಾಂಡವರಂತೆ, ಬುದ್ಧಿ ದ್ರೌಪದಿಯಂತೆ |

ಹೊಂಚುಹಾಕುವ ಕಲಿ ದುರ್ಯೋಧನನಂತೆ, ಕಷ್ಟದ ಸಂಸಾರದಿ ||

ವಂಚನೆಗೆ ಬಲಿಯಾಗದಂತೆ ಪೇಚಿನಿಂದ ಪಾರುಮಾಡುವ |

ಹೆಚ್ಚಿನ ಅಘಗಳ ತರಿದು, ಮೆಚ್ಚಿ ಉದ್ಧರಿಸುವ ನಮ್ಮ ||

ಅಚ್ಯುತಾನಂತ ಗೋವಿಂದ ಶ್ರೀಕೃಷ್ಣವಿಠ್ಠಲ ಕೈಪಿಡಿದು ನಡೆಸುವ ||

129. ಮುಚ್ಚಿಕೊಂಡಿರುವುದರಲ್ಲೇ ಇದೆ ಮರ್ಯಾದೆ |

ಹೆಚ್ಚಿನ ಮೈತೋರದೆ ಮುಚ್ಚಿದಷ್ಟೂ ಗೌರವ ||

ಬಚ್ಚಿಟ್ಟು ಅಂಜಿಕೆ, ಕೆಚ್ಚೆದೆ ಬಂಟನಂತೆ ತೋರಬೇಕು |

ಹಚ್ಚಬೇಕು ಆರದಂತಹ ನಂದಾದೀಪ ಬಿರುಗಾಳಿಯಲ್ಲೂ ||

ಮುಚ್ಚಿದ ಬಾಗಿಲೊಳಗಿರುವದೇ ಸದಾ ಸುರಕ್ಷೆ |

ಮುಚ್ಚಿ ಒಳಗೆ ಕಷ್ಟ-ಕಾರ್ಪಣ್ಯ ನಗುನಗುತಿರಬೇಕು ||

ಹೊಚ್ಚಹೊಸದಂತೆ ಹೊರಗೆ ತೋರಬೇಕು, ಒಳಗೆ ತೇಪೆ ಇದ್ದರೂ |

ಹೆಚ್ಚಿಗೆ ತೇಗಿರಿ ಮೃಷ್ಟಾನ್ನ ಉಂಡಂತೆ, ಉಪವಾಸವಿದ್ಧರೂ ||

ಕೊಚ್ಚೆ ಗುಂಡಿಯಲ್ಲಿದ್ದರೂ ಹೊರಗೆ ಕಮಲ ಅರಳಿಸಬೇಕು |

ಸ್ವಚ್ಛ ಮನದಿ ಸಕಲರ ಸೇವಿಸುತಿರಬೇಕು ||

ಮೆಚ್ಚುವ ಶ್ರೀಕೃಷ್ಣವಿಠ್ಠಲ ನಿಜದಿ ಅನುಗ್ರಹಿಸಿ ||

130. ಬಡತನವಿರಲಿ, ಸಿರಿತನವಿರಲಿ ಅಂಗಹೀನನಿರಲಿ |

(ಸುದಾಮ, ಅಂಬರೀಷ, ಜಡಭರತ)

ಎನ್ನೊಡೆಯ, ಬುದ್ಧಿ ಭ್ರಷ್ಟನಾಗಿಸಲು ಬೇಡಾ || (ಅಜಮಿಳ)

ಬಿಡದೆ ಪರಿಪಾಲಿಸೋ ನಿನ್ನವನೆಂದು | (ಪ್ರಲ್ಹಾದ)

ಕಡೆಗೆ, ಕಡೆಹಾಯಿಸೋ ಆಪದ್ಬಾಂಧವ ಶ್ರೀಕೃಷ್ಣವಿಠ್ಠಲನೇ || (ಗಜೇಂದ್ರಮೋಕ್ಷ)

131. ಉರಿ ಬಿಸಿಲ ಬೇಗೆ ಇರಲಿ, ಮರದ ತಂಪಿರಲಿ |

ಸೂರು ಇರಲಿ, ಇರದೇ ಸದಾ ತಿರುಗುತಿರಲಿ ||

ಬರೀ ಉಪವಾಸವಿರಲಿ, ಮೃಷ್ಷಾನ್ನ ಭೊಜನವಿರಲಿ |

ಜರಿ ಪೀತಾಂಬರವಿರಲಿ, ಹರಕು ವಸನವಿರಲಿ |

ಶ್ರೀಕೃಷ್ಣವಿಠ್ಠಲ ಹೇಗಾದರೂ ಇರಲಿ ಜೊತೆಗಾರನಾಗಿರಲಿ ||

132. ಉಸಿರಲಿ, ದೇಹದಿ ಕಣ-ಕಣದಿ ಇದ್ದು |

ಬಸಿರಿನಿಂದ- ಉಸಿರಿರುವ ತನಕ ||

ಸಂಸಾರದ ಕೆಸರಿನಿಂದ ಪಾರುಗೈವ |

ಕಂಸಾರಿ ಶ್ರೀಕೃಷ್ಣವಿಠ್ಠಲನಿರೆ ಕ್ಲೇಶವೆಲ್ಲಿದೆ ? ||

133. ಪರಮಾತ್ಮನ ಕರುಣಾಪೂರಿತ ದೃಷ್ಟಿ |

ಅಮೃತದ ಹಸ್ತ ತಲೆಯ ಮೇಲೆ ||

ಪೂರ್ಣಕೃಪೆಯಲಿ ಪೋಷಿತನಾಗಿರಲು |

ಶ್ರೀಕೃಷ್ಣವಿಠ್ಠಲನಲಿ ಹೇಗೆ ರತಿ ಮಾಡದಿರಲಿ ||

134. ಅಂಜನಾಪುತ್ರ ಭಕ್ತಿಯಲಿ ಸೇವಿಸಿದ ಪ್ರಥಮಾವತಾರದಿ |

ಭಂಜಿಸಿದ ಕುರುಸೈನ್ಯ ಬಲಭೀಮನಾಗಿ ದ್ವಿತೀಯವತಾರದಿ ||

ಅಂಜಿಸಿ ಕುಮತಿಗಳ ಪೂರ್ಣಪ್ರಜ್ಞರಾಗಿ ತೃತೀಯವತಾರದಿ |

ರಂಜಿಸಿದ ವಿವಿಧ ಕಾರ್ಯಸಾಧಕನಾಗಿ ರಾಮ, ಕೃಷ್ಣ, ವೇದವ್ಯಾಸರ ||

ಭಜಿಸಿ ಭಕ್ತಿಯಲಿ ಮುಖ್ಯಪ್ರಾಣನು ಮೂರು ಅವತಾರದಿ |

ಕಂಜನಾಭ ಶ್ರೀಕೃಷ್ಣವಿಠ್ಠಲನ ಬಿಡದೆ ಸರ್ವತ್ರ ಜೊತೆಲಿರುವ ||

135. ಹೊಟ್ಟೆ ಹಾಳು ಹೊಟ್ಟೆ, ಹೊಟ್ಟೆಗಾಗಿ ಏನೇನೋ ಮಾಡಿಸುವುದು |

ಹುಟ್ಟಿಂದನಿಂದ ಚಟ್ಟವೇರುವತನಕ ಬಿಡದ ಹೊಟ್ಟೆ||

ಕುಟ್ಟಿ ಕುಟ್ಟಿ ಒಳಗ್ಹಾಕಿದರೂ ಎಂದಿಗೂ ತೃಪ್ತವಾಗದು |

ಕಟ್ಟ ಕಡೆಯತನಕ ತುಂಬದೇ, ಹಿಗ್ಗಿಸಿದಷ್ಟೂ ಹಿಗ್ಗುವುದು ||

ಕೆಟ್ಟದ್ದು-ಸುಟ್ಟಿದ್ದು, ಸುಡದದ್ದು ಮಸಣದಂತೆ ಹಿಡಿಸುವುದು |

ಹೊಟ್ಟೆಯಿಂದಲೇ ಆರೋಗ್ಯ, ಹೊಟ್ಟೆಯಿಂದಲೇ ನಾನಾರೋಗ ||

ಕಷ್ಟಪಡಿಸುವುದಲ್ಲದೇ, ನಾನಾ ಅಪಮಾನಗಳ ಭರಿಸುವುದು |

ಒಟ್ಟಿನಲಿ ಬಡವ-ಶ್ರೀಮಂತನೆನ್ನದೆ ಎಲ್ಲ ಜೀವಿಗಳ ಬೆಂಬಿಡದು ||

ಹೊಟ್ಟೆಬಾಕ ಶ್ರೀಕೃಷ್ಣವಿಠ್ಠಲನ್ನೇ ಬೇಡಿದರೆ ಹೊಟ್ಟೆತುಂಬುವುದೇನೋ |

136. ನಿಲ್ಲೇ ಗೋಪಿಕೆ ನಿಜವ ಪೇಳೇನಗೆ |

ಹಾಲು-ಬೆಣ್ಣೆಗೆ ಕೃಷ್ಣ ನಿನ್ನ ಮೆಚ್ಚಿದನೇನೆ ||ಪ||

ಒಲವಿಂದ ಮೃಷ್ಟಾನ್ನ ನೀಡುವೆ ಎನ್ನ ಒಪ್ಪುವನೇನೆ ? ||ಅಪ ||

ಕಳ್ಳತನ ಹೊರೆಸಿ ಒರಳಿಗೆ ಕಟ್ಟಿಸಿದೆ |

ಮೆಲ್ಲಗೆ ಮೆಚ್ಚಿಸಿ ರಾಸವ್ಹೇಗೆ ಆಡಿದೆ ? ||1||

ಎಳೆದ ಸೆರಗ ದಾರಿ ಬಿಡದೆ ಎಂದೆ |

ನಲಿದು ಹೃದಯಲಿ ಹೇಗೆ ನಿಲ್ಲಿಸಿದೆ ? ||2||

ಗೊಲ್ಲರೆಲ್ಲರ ಗೋಕುಲದಿ ಪೊರೆದ ಚಿಣ್ಣ |

ಸಲ್ಲಿದನ್ಹೇಗೆ ಮಥುರೆಗೆ ಪೋಗಿ ||3||

ಎಲ್ಲ ಬಲ್ಲ ಲಕುಮಿರಮಣ |

ಎಲ್ಲರ ಹೇಗೆ ಮರುಳ ಮಾಡಿದ ? ||4||

ಮಲ್ಲ ಸಕಲರ ದುರಿತ ಕಳೆವ |

ಚೆಲ್ವ ಶ್ರೀಕೃಷ್ಣವಿಠ್ಠಲ ಪುನ: ಗೋಕುಲಕೆ ಬರಲಿಲ್ಲವೇಕೆ ? ||

137. ಕೊಂಡು ತಂದ ಜೀವನ ವ್ಯರ್ಥವಾಗುತಿಹೆ |

ಚೆಂಡಿನಂತೆ ಈಡಾಡುತಿಹುದು ಕಂಡರೂ ||ಪ||

ಭಂಡ ಜೀವ ಕಾಡಿ-ಬೇಡಿ ಓಲೈಸುತಿದೆ |

ಕಂಡರೂ, ಕಾಣದಂತಿಹರೆಲ್ಲ ಕುಂಡೆ ತಿರುಗಿಸುತ ||

ಮಂಡೆಗೆ ಕುಕ್ಕಿ ಜಡಿಯುತಿಹರೆಲ್ಲ ಆದರೂ |

ಬಿಡದೆ ಅವರನ್ನೇ ಮೋಹಿಸುತಿದೆ ಜೀವ ||1||

ಸುಡು ಸುಡು ಬಿಸಿಲು ಮಳಲಲಿ ನಡೆದೆ |

ಬೆಂಡು ಬಸವಳಿದೆ ಕಂಡೆಯಾ ||

ಜಡಿ ಮಳೆಯಲಿ ಗಡಗಡ ನಡುಗುತ |

ಓಡಿ ಓಡಿ ದಣಿಯುತ ತಿರುಗಾಡಿದೆ ||2||

ಪೊಡವಿಯೊಳು ಎಡಬಿಡದೆ ದಡ-ಬಡ |

ನಡೆದಾಡಿ ಎಡವಿ ಬೀಳುತಿರುವೆ ||

ಒಡನೆ ಕಡೆಹಾಯಿಸೋ ಕಡು ಕರುಣಿಯೇ |

ಒಡೆಯಾ ನಿನ್ನಡಿಗಳ ಮೇಲೆ ಬಿದ್ದುಕೊಂಡಿರುವೆ ಶ್ರೀಕೃಷ್ಣವಿಠ್ಠಲ ||3||

138. ಮುಳುಗಿಸೋ ಇಲ್ಲ ತೇಲಿಸೋ ಪ್ರಭುವೇ ||ಪ||

ಮುಳುಗಲು ಆಳದಿ ರತ್ನಗಳ ಹೆಕ್ಕುವೆ ||ಅ.ಪ||

ಪ್ರಳಯದಿ ಸಕಲವೂ ಮುಳುಗಲು |

ಏಳುದಿನ ನೌಕೆಯಲಿ ತೇಲಿಸಿದವನೇ ||

ಕಳಚಿದ ಇಳೆಯ ದಾಡೆಯಲಿ ರಕ್ಷಿಸಿದವನೇ |

ಮುಳುಗುವ ಶಿಲೆಗಳ ತೇಲಿಸಿದವನೇ ||1||

ಮುಳುಗಿರುವೆ ಸಂಸಾರದಿ ಸರಾಗದಿ ಮೇಲೆತ್ತಿ |

ಕೊಳೆಗಳ ತೊಳೆದು ನಿನ್ನ ಸದನದಿ ಇಡಿಸು ||2||

ಸೆಳೆದು ರಭಸದ ಸುಳಿಯಿಂದ ತೇಲಿಸು |

ಪೊಳೆವ ಶ್ರೀಕೃಷ್ಣವಿಠ್ಠಲ ಚಿತ್ತಕ್ಕೆ ಬಂದಂತೆ ದಯಾಮಾಡೋ ||3||

139. ಕಾಡಿನಲ್ಲಿರಿಸು-ನಾಡಿನಲ್ಲಿರಿಸು ಬೇಡುವುದೊಂದೇ |

ಬಿಡದೇ ದೊರಕಿಸು ಪಾದಕಮಲ ಅಖಂಡಸೇವೆ |

ಧೃಡಭಕುತಿ ಪ್ರತಿ ಜನುಮದಿ ಕೊಡು |

ಒಡೆಯಾ ಶ್ರೀಕೃಷ್ಣವಿಠ್ಠಲ ನಿನ್ನಡಿಗಡಿಗೆ ವಂದಿಪೆ ||

140. ಅಖಂಡ ನಾಮಸ್ಮರಣೆಯಿಂದ ಧೃಡಭಕುತಿ |

ಸಂಖ್ಯೆ ಇಲ್ಲದ ಭಗವದ್ಭಕ್ತರ ಸತ್ಸಂಗದಿ ||

ನಿಖಿಳ ಸೇವಾಭಾಗ್ಯ ದೊರಕುವುದಲ್ಲದೆ |

ಸಖ ಶ್ರೀಕೃಷ್ಣವಿಠ್ಠಲನ ಸಾನಿಧ್ಯ ನಿಶ್ಚಿತ ||

141. ಹರಿನಾಮೋಚ್ಛಾರವು ಸಕಲ ಸುಖಪ್ರದಾಯಕ ||ಪ|\

ಹರಿಯುವುದು ಅನಂತ ಪಾಪರಾಶಿ ||ಅ.ಪ||

ಬರದಂತೆ ತಡೆಯುವುದು ದು:ಖಗಳ |

ನರಕ ದರುಶನವಾಗದು ಇಹ-ಪರದಿ ||

ಗೌರವದ ಸರಮಾಲೆ ತೊಡೆಸುವುದು |

ಪರಿಪರಿಯಲಿ ಅಂತರ್ಯದಿ ಹರುಷವಾವುದು ||1||

ಸರ್ವ ಪವಿತ್ರ ತೀರ್ಥಸ್ನಾನದ ಫಲವಾಹುದು |

ಸರ್ವ ಶ್ರೇಷ್ಠ ದಾನದ ಪುಣ್ಯಪ್ರಾಪ್ತಿಯಾಗುವುದು ||

ಸರ್ವ ಪ್ರತಾಚರಣೆಕಿಂತ ವಿಶೇಷವಿದು |

ಪುರಾಣಾದಿಗಳ ಸಾರ ಇದೇ ಇರುವುದು ||2||

ಸರ್ವತ್ರ, ಸರ್ವಾವಸ್ಥೆಯಲಿ ಸದಾ ಪೇಳಬಹುದು |

ಜೋರಾಗಿ ಇಲ್ಲದೇ ಮನದಿ ಉಚ್ಚರಿಬಹುದು ||

ಬೇರೆಯವರಿಂದಲೂ ಹೇಳಿಸುತಲಿರಬೇಕು |

ಸರ್ವವೇದಾರ್ಥ ಅಕ್ಷರನಾಮಕ ಶ್ರೀಕೃಷ್ಣವಿಠ್ಠಲನಾಮ ||3||

142. ತೆರೆದ ಕಣ್ಣಲಿ ಹುಸಿಕೋಪ |

ಬರೀ ಅವನ ರೂಪ ಹೃದಯದಿ ||

ಬಿರಿದ ತುಟಿಯಲಿ ‘ನ’ಕಾರ |

ಪೂರ್ಣಮನದಿ ಶ್ರೀಕೃಷ್ಣವಿಠ್ಠಲನ್ನೇ ಅಪ್ಪುವ ಬಯಕೆ ರಾಧೆಗೆ ||

143. ಹರಿನಾಮ ಸ್ಮರಸುತ, ಹರಿಲೀಲೆಗಳ ಕೊಂಡಾಡುತ |

ಹರಿ ದರುಶನಕಾಗಿ ಕಾತರದ ಕ್ಷಣಗಣನೆ ಮಾಡುತ ||ಪ||

ಸರಿ ರಾತ್ರಿಯಲ್ಲೆದ್ದು ಚಳಿಯಲಿ ನಡುಗುತ |

ಸರದಿಯಲಿ ನಿಂತು ತರತರದ ಜನರ ನೋಡುತ ||

ಭರಭರನೆ ಓಡುತಾ, ನಿಲ್ಲುತಾ, ಜನರ ದೂಗಿಸುತ್ತಾ |

ಬೇರೆಯವರನು ಬೈಯುತ್ತಾ, ಬೈಸಿಕೊಳ್ಳುತ್ತಾ ||1||

ಸರಿಯುವುದು ಮನದಿ ಗಂಟೆಗಳೆಷ್ಟೋ (ಆದರೂ) |

ಸರಿಯಾಗಿ ಒಂದುಕ್ಷಣ ಶ್ರೀನಿವಾಸನೆದುರು ನಿಂತಾಗ ||

ಮರೆತೆಲ್ಲ ಪಟ್ಟಶ್ರಮ ಧನ್ಯತೆಯಲಿ ಮಿಂದು |

ಭರ್ಜರಿ ನಾಮದ ಇಷ್ಟದೈವನ ಮುಖವೋ, ಪಾದವೋ ||2||

ವರದಹಸ್ತವನ್ನೋ, ಶಂಖ-ಚಕ್ರವನ್ನೋ ನೋಡುವುದರಲ್ಲಿ |

ಹರಕೆ ಮನದಿ ಹೇಳಿಕೊಂಬುವುದನ್ನೆ ಮರೆತಾಗ ||

ಗರ್ಭಗುಡಿಯ ಹೊಗೆಗಳೆದು ಹಾಕಿರುತ್ತಾರೆ |

“ಹರೇ ಶ್ರೀನಿವಾಸ” ಎಂದೆನ್ನುತ್ತಾ ಏನೋ ಸಮಾಧಾನದಿ ||3||

ನರ ಜನ್ಮವೇ ಸಾರ್ಥಕವಾದ ಭಾವಹೊತ್ತು |

ಹೊರಬಂದು ಅನಂತಭಕ್ತರ ದರುಶನದಿ ತೃಪ್ತಿಪಟ್ಟು ||

ತಿರುಗಿ ಎಂದಿಗೆ ದರುಶನ ಕೊಡುವನೋ |

ತಿರುಮಲಾಧೀಶ ಶ್ರೀಕೃಷ್ಣವಿಠ್ಠಲನ ಕರುಣೆಯಲಿ ||4||

144 ದುರ್ಲಭವಾದ ಸ್ವಾಮಿ ದರುಶನವೆಂದಾಗ |

ಪೂರ್ವಜನ್ಮಕೃತ ಪುಣ್ಯದ ಫಲವೇ ಸರಿ ||

\ ಗುರುಹಿರಿಯರ ಆಶೀರ್ವಾದದ ಪ್ರಭಾವದಿ |

ಹರಿಚಿತ್ತಕ್ಕೆ ಬರಲು, ಕರೆದು ಸುದರುಶನವಿತ್ತು ||

ಗುರುಗಳಿಂದ ಸನ್ಮಾನಿಸೆನ್ನ ಜನ್ಮ ಸಾರ್ಥಕವಾಗಿಸಿದ |

ಶ್ರೀಕೃಷ್ಣವಿಠ್ಠಲನ ಕೃಪೆಗೇನೆಂದು ಹೇಳಲಿ ? ||

145. ಕ್ಷಣ ಕ್ಷಣ ಕೂಡಿದರೆ ಯುಗಗಳಾಗುವುದು |

ಕ್ಷಣವೇನು ಬಲ್ಲುದು ಯುಗದ ಕಾಲ ||

ಕ್ಷಣ ಕಳೆದರೆ ಮತ್ತೆಬಾರದೂ ಎಂದೂ |

ಕಾಣದ ಕ್ಷಣದಿಂದ ನಿತ್ಯಕಾಲದ ಗಣನೆ ||

ಗುಣತ್ರಯಗಳ ಸೂಕ್ಷ್ಮಭಾಗ ರೂಪತ್ವ ಮೂಲ ಪ್ರಕೃತಿಯಿಂದ |

ಗುಣ ಮೂರು ಪ್ರಧಾನ ತ್ರಿಗುಣಾತ್ಮಕ ಪ್ರಕೃತಿಯಲಿ ||

ಗುಣ ಸಾಮ್ಯವೇ ಲಯವು, ಗುಣ ವೈಷಮ್ಯವೇ ಸೃಷ್ಠಿ |

ಗುಣತ್ರಯಗಳ ಉಪಚಯವೇ ತತ್ವಗಳ ಸ್ಥೂಲಕ್ಕೆ ಕಾರಣ ||

ಪ್ರಾಣಿರಾಶಿಗಳು ಅನಂತ ಹಾಗೇ, ಸ್ಥೂಲ ಶರೀರವೂ ಅನಂತವೇ |

ಕಾಣುವ ತದ್ಭೋಗ್ಯ ವಸ್ತುಗಳು ಸಹ ಅನಂತಾನಂತ ||

ಕಾಣುವ ಪ್ರಕೃತಿ ಸ್ವರೂಪತ: ನಿತ್ಯಾನಿತ್ಯವೇ |

ಮಣ್ಣು-ಘಟದ ಸೃಷ್ಟಿಗೆ ಉಪಾದಾನ ಕಾರಣದಂತೆ ||

ಸೃಷ್ಟವಾಗುವ ಸಮಸ್ತ ವಸ್ತುಗಳಿಗೆ ಪ್ರಕೃತಿ ಕಾರಣ |

ಸೃಷ್ಟಿಯಲಿ ದೇಶ, ಕಾಲ, ಗುಣಗಳ ಸಂಬಂದವಿಲ್ಲದಿಲ್ಲ ||

ದೇಶ ಕಾಲಗಳು ಸದಾ ಸ್ವಗತ ಈಶಾಧೀನ |

ಸೃಷ್ಟ್ಯಾಧೀಶ ಶ್ರೀಕೃಷ್ಣವಿಠ್ಠಲ ಸ್ವತಂತ್ರ, ಸರ್ವಕ್ಕೂ ಮೂಲಕಾರಣ ||

146. ರಕ್ಷಕ ನೀನಿರಲು ನನಗ್ಯಾತರ ಭಯವೋ |

ರಕ್ಷಿಸುವೆ ನವಮಾಸ ಗರ್ಭದಿ ||

ರಕ್ಷಿಸುವೆ ಜನನಾನಂತರ ಜೀವನದಿ |

ಚಕ್ಷುವಿನಲ್ಲಿದ್ದು ನೋಟ ನೀಡುವಿ ||

ಭಿಕ್ಷೆ ನೀಡುವೆ ಸಕಲ ಭೋಗಂಗಳ |

ಭಕ್ಷ್ಯಗಳಲ್ಲಿದ್ದು ತೃಪ್ತಿ ಪಡಿಸುವಿ ||

ಶಿಕ್ಷಿಸಿ ಎನ್ನ ತಪ್ಪುಗಳ ತಿದ್ದುವಿ |

ಲಕ್ಷಿಸದೆನ್ನಪಚಾರಗಳ ಉಪಕರಿಸುವಿ ||

ಪಕ್ಷಪಾತ ಮಾಡದ ಸಮದರ್ಶಿ |

ಸೂಕ್ಷ್ಮರೂಪದಿ ಸರ್ವತ್ರವ್ಯಾಪಕ ||

ಸಾಕ್ಷಿಯಾಗಿದ್ದು ಸಕಲ ವೀಕ್ಷಿಸುವ |

ಲಕ್ಷ್ಮೀಪತಿ ನಿನ್ನ ಕರುಣೆಗೆ ಎಣಿಗಾಣೆ ||

ಸಕ್ಷಮದಕ್ಷ ಶ್ರೀಕೃಷ್ಣವಿಠ್ಠಲನಿರೆ ಭಯವೇಕೆ ? ||

147. ದಿನಕರಂತರ್ಗತ ಶ್ರೀಹರಿಯ ನೆನೆಯೆ |

ದಿನ ಪ್ರತಿದಿನ ಬುದ್ಧಿಶೋಧಿಸುವ |

ದಿನ ದಿನದಿ ಆಯುರಾರೋಗ್ಯ ಹೆಚ್ಚಿಸಿ |

ಮಾನ್ಯವಂತನಾಗಿಸುವ ಶ್ರೀಕೃಷ್ಣವಿಠ್ಠಲ ||

148. ವ್ರತವಾಚರಿಸಿದರು ಗೋಪಿಕೆಯರು ವ್ರತವಾಚರಿಸಿದರು ||ಪ||

ಪತಿಯಾಗಲಿ ದೇವಕಿಕಂದ ತಮಗೆಂದೆಂದೂ ||ಅಪ||

ಪ್ರತಿ ಉಸಿರನ್ನೇ ಮಿಸಲಾಗಿಟ್ಟರು |

ಪ್ರತಿ ಘಳಿಗೆ ತುಂಬು ಭಾವದಿ ಧೇನಿಸುತ ||

ಪ್ರತಿ ವಸ್ತುವಿನಲಿ ಅವನನ್ನೇ ಕಾಣುತ |

ಜೊತೆಗಾರನಾಗಲಿ ಎಂದು ಬಯಸುತ ||1||

ಕಾತ್ಯಾಯನಿ ವ್ರತಾಚರಣೆ ನಿಷ್ಠೆಯಲಿ ಮಾಡಲು |

ಬತ್ತಲೆಯಾಗಿ ನದಿಯಲಿ ಕನ್ನಿಕೆಯರು ಮುಳುಗಲು ||

ಇತ್ತ ಯದುಕುಲಚಂದ್ರ ಮಾಡಿದವರ ವಸ್ತ್ರಾಪಹಾರ |

ಎತ್ತಿ ಎರಡು ಕೈ ಹೊರಬಂದು ಬೇಡಿದರೆ ಕೊಡುವೆನೆಂದ ||2||

ಕತ್ತಲೆಯಲ್ಲೂ ಮಾನಿನಿಯರು ನಾಚಿ ನೀರಾದರು |

ರಾತ್ರಿಯಲಿ ನಗ್ನರಾಗಿ ನದಿಯಲಿ ಮುಳಗಬಾರದು ||

ತತ್ವಾಭಿಮಾನಿ ದೇವತೆಗಳಿಗಪಚಾರ ಮಾಡಬಾರದು |

ಇತ್ತನು ವಸ್ತ್ರ ಸರಿಯಾದ ಪದ್ಧತಿ ಪೇಳಿ ||3||

ಭಕ್ತಿಯಲಿ ಪೂರ್ತಿ ಶರಣಾಗಿ ಫಲ ಕೇಳಲು |

ಅತಿ ಸಂತೋಷದಿ ವ್ರತ ಸಮಾಪ್ತಿ ಮಾಡಿದ ||

ಸ್ವತಂತ್ರ ಸ್ವರಮಣ ವಚನವಿತ್ತವರಿಗೆ |

ಪತಿಯಾಗಿ ರತಿ ನೀಡುವೆ ನಿಮಗೆಂದ ಶ್ರೀಕೃಷ್ಣವಿಠ್ಠಲ ||4||

149. ಸವತಿ ಮಾತ್ಸರ್ಯ ಮೋಹನನ ಮುರುಳಿಯಲಿ |

ತವಕದಿ ಅಂಗಸಂಗವೆಲ್ಲ ತನದಾಗಿಸುವ ಬಯಕೆ ||

ಅವನ ಅಧರಾಮೃತ ತನಗಾಗಿ ಮಾತ್ರ ಎನ್ನುವ ರಾಧೆ |

ಅವನು ಸಕಲ ಭಕ್ತ ಪರಾಧೀನ ಎಂಬುದ ಮರೆತಳು ||

ಅವನ ಕಾಣದೇ ಪರಿತಪಿಸಿ ಬೇಡಿಕೊಂಡಳು |

ಸ್ವವಶ ಶ್ರೀಕೃಷ್ಣವಿಠ್ಠಲ ಯಾರ ಅಧೀನನು ಅಲ್ಲ ||

150 ನಾರಾಯಣ ತಾನಿಹನು ಕ್ಷೀರಸಾಗರದಿ |

ಶ್ರೀರಮಾ ಇಹಳು ಇವನ ವಕ್ಷ ಸ್ಥಳದಿ ||

ಇರುವನು ನಾಲ್ಮೋಗನು ಕಮಲದಿ |

ಹರನಿಹನು ಕೈಲಾಸ ಗಿರಿಯಲಿ ||

ಇಂದ್ರನಿಹನು ಅಮರಾವತಿಯಲಿ |

ನರಕಲೋಕದಿ ಜವರಾಯನಿಹನು ||

ನರರಿಗೂ ಭೂಲೋಕ ವಿತ್ತಿಹನು |

ಸುರವೈರಿಗೂ ಇತ್ತಿಹನು ಅಧಮಲೋಕ ||

ಸರ್ವರಿಗೂ ಸ್ಥಾನ ಇತ್ತಿಹನು ಸ್ವಾಮಿ |

ಸರ್ವಪ್ರಾಣರ ಪ್ರಾಣನೇ ನಿನ್ನಲೋಕ ಯಾವುದು ? ||

ಸರ್ವತ್ರ ವ್ಯಾಪ್ತ ಸ್ವಾಮಿಯ ಆಪ್ತ ಬಂಟನೇ |

ಶ್ರೀಕೃಷ್ಣವಿಠ್ಠಲನ ಬಿಟ್ಟಿರದ ಮುಖ್ಯಪ್ರಾಣನೇ ನಿನ್ನ ತಾಣ ಯಾವುದು ? ||

...

151. ವಂಶೋದ್ಧಾರಕ ನೀನೇ ವಂಶನಿರ್ಮೂಲಕ ನೀನೆ ||ಪ|| (ಪಾಂಡವ,ಯಾದವ)

ಆಶಿಪೆ ಸದಾ ನಿನ್ನ ಕೃಪೆ ಎನ್ನ ಮೇಲಿರಲಿ ||ಅಪ||

ಈಶ ನೀನು, ನಿನ್ನ ದಾಸ ನಾನು |

ಪಾಶ ಬಂಧನ ಬಿಡಿಸುವವ ||

ಆಶಾ, ಕ್ಲೇಶಾದಿಗಳ ಕಳೆದು |

ಹರ್ಷ ನೀಡುವವ ನೀನಲ್ಲದೇ ಮತ್ಯಾರು ? ||1||

ದೋಷ ದೂರ ನೀನು, ಹೇಶಿ ನಾನು |

ಕಾಶಿ ಸುತ್ತಿ, ಕೋಶ ಓದಿದರೂ ||

ಲೇಶ ಪಾಪ ಕಳೆಯಲಿಲ್ಲ |

ವಶವೆಲ್ಲ ನಿನಗೆ, ನೀನೊಬ್ಬರ ವಶನಲ್ಲ ||2||

ಅಂಶಿ ನೀನು, ನಿನ್ನಂಶ ನಾನು |

ಸಾಂಶರೆಲ್ಲ ನಿನ್ನ ವಶರಿಹರು ||

ವಿಷಯ ದೂರ ಮಾಡೆನ್ನ |

ಕೀಶ, ಅವನೀಶ ವ್ರತಿಶನಾಥ ಶ್ರೀಕೃಷ್ಣವಿಠ್ಠಲನೇ ||3||

(ಹನುಮ,ಭೀಮ,ಮಧ್ವ.)

152 ಹುಟ್ಟಿಲ್ಲದವ ಹೊಕ್ಕುಳಲಿ ಹುಟ್ಟಿಸಿ ಹೂವೊಂದು ಮೂಲರೂಪದಿ |

ಎಂಟು ಮೇಲ್ನಾಕು ಪಕಳೆಯ ಪುಷ್ಪದ ಬ್ರಹ್ಮಾಂಡದೊಳೊಂದು ರೂಪ ||

ಹೊಟ್ಟೆಯಲ್ಲಿದ್ದ ಜೀವಿಗಳಿಗೆ ದೇಹ ಸೃಷ್ಟಿಸಿ, ಪಿಂಡಾಂಡದಲ್ಲೊಂದು ರೂಪ |

ಜಟ್ಟಿ ತ್ರಯೀಶ ಶ್ರೀಕೃಷ್ಣವಿಠ್ಠಲ ವ್ಯಾಪಿತ ಸರ್ವತ್ರ ||

153. ಹಲವು ಬಗೆಯಲಿ ಆರಾಧಿಪರು ಲೋಕದಿ |

ಒಲಿಸಲು ಭಗವಂತನ ಸತತ ಯತ್ನದಿ ||ಪ||

ಕೆಲವರು ಭಜನೆಯಲಿ ಮೈಮರೆವರು |

ಕೆಲವರು ತಾಳ ಹಾಕುತ್ತಾ ಕುಣಿವರು ||

ಕೆಲವರು ಏಕಾಂತದಿ ಕುಳಿತು ಧ್ಯಾನಮಾಳ್ಪರು |

ಕೆಲವರು ಪ್ರಕೃತಿ ಅಚ್ಚರಿಯಲ್ಲೇ ತನ್ಮಯರು ||1||

ಕೆಲವರು ಬಾಹ್ಯ ಚಿನ್ಹೆ ಢಾಳಾಗಿ ಧರಿಸುವರು |

ಕೆಲವರು ಬರೀ ಸ್ನಾನ, ಸ್ತೋತ್ರ ಪಠಿಸುವರು ||

ಕೆಲವರು ಮಾಡುವ ಕೆಲಸವೇ ದೇವರೆಂಬುವರು |

ಕೆಲವರು ಪ್ರತ-ನಿಯಮದಿ ದೇಹ ದಣಿಸುವರು ||2||

ಕೆಲವರು ಸತ್ಸಂಗದಲ್ಲೇ ಇರುವರು |

ಕೆಲವರು ಪ್ರವಚನ ಆಲಿಕೆ ಬಯಸುವರು ||

ಕೆಲವರು ಯಜ್ಞ, ಗೋಪೂಜೆ ನಿರುತರು |

ಕೆಲವರು ಮುತ್ತೈದೆ-ಬ್ರಾಹ್ಮಣರ ಪೂಜೆಯಲಿ ತೃಪ್ತರು ||3||

ಕೆಲವರು ಭೋಜನ ಮಾಡಿಸಿ ತಣಿಸುವರು |

ಕೆಲವರು ಅತಿಥಿ-ಅಭ್ಯಾಗತರ ಸೇವಿಸುವರು ||

ಕೆಲವರು ದೀನ-ದು:ಖಿತರ ಸೇವೆಯಲಿ ಸಂತಸರು |

ಕೆಲವರು ಪ್ರಾಣಿದಯೆ ದೊಡ್ಡ ಸೇವೆ ಎಂಬುವರು ||4||

ಕೆಲವರು ಜಪ-ತಪದಿ ತನ್ಮಯರು |

ಕೆಲವರು ಪಾದಯಾತ್ರೆಯಲಿ ನಿರುತರು ||

ಕೆಲವರು ಬರೀ ನಾಮಸ್ಮರಣೆಯಲಿ ಸಂತಸರು |

ಕೆಲವರು ಭಕುತರ ಸೇವೆಯೇ ಭಾಗ್ಯವೆನ್ನುವರು ||5||

ಕೆಲವರಿಗೆ ತೀರ್ಥಯಾತ್ರೆಯಲಿ ರತಿ |

ಕೆಲವರಿಗೆ ದಾನಗಳಲ್ಲೇ ಆಸಕ್ತಿ ||

ಕೆಲವರಿಗೆ ಮೂರ್ತಿ ಪೂಜೆಯಲಿ ತನ್ಮಯತೆ |

ಕೆಲವರಿಗೆ ಬಾಹ್ಯ ಆಚರಣೆಯಲ್ಲಿ ಸುಖಿಪರು ||6||

ಕೆಲವರಿಗೆ ಪ್ರದಕ್ಷಿಣೆಯಲಿ ಭಕುತಿ |

ಕೆಲವರಿಗೆ ನಮಸ್ಕಾರದಲ್ಲೇ ನಂಬಿಕೆ ||

ಕೆಲವರಿಗೆ ದುಡಿಮೆಯಲ್ಲಿ ತತ್ಪರತೆ |

ಕೆಲವರಿಗೆ ಶಾಸ್ತ್ರಭ್ಯಾಸದಲ್ಲೇ ನಂಬಿಕೆ ||7||

ಕೆಲವು ವಿಚಾರವಂತರು ಆಚಾರ ನಂಬರು |

ಕೆಲವರು ಸಕಲರಿಗೆ ಪ್ರಿಯವಚನರು ||

ಕೆಲವರು ಗುರು-ಹಿರಿಯರು ವಚನಪಾಲಕರು |

ಕೆಲವರು ಸ್ವಂತದ ಬಲವೇ ದೈವ ಬಲವೆನ್ನುವರು ||8||

ಎಲ್ಲವೂ ಸುಗತಿಗೆ ಅನೇಕ ದಾರಿಗಳು |

ಸ್ವಲ್ಪ ಮಾಡಿದರೂ ಪುಣ್ಯವೇ ಬರುವುದು ||

ಬಲ್ಲವರು ಬಲ್ಲರು ಒಲಿಸುವ ಬಗೆ |

ಚೆಲ್ವ ಶ್ರೀಕೃಷ್ಣವಿಠ್ಠಲ ತಾನೇ ಒಲಿದರೆ ಅನುಗ್ರಹೀಪ ||9||