ಡಾ ನರಸಾಪೂರ & ಪರಿವಾರ

ಶ್ರೀ ಕೃಷ್ಣವಿಠ್ಠಲಪದಗುಚ್ಛ 3.3

1 ಚಕ್ರ- ಶಂಖಗಳ ಧರಿಸಿ ಸಾಧಕ |

ಹಯಗ್ರೀವ

ತುಂಡಾದ ಅನೇಕ ನೊರೆಯಿಂದ ಭಯಾನಕದಿ |

ಕಂಡ ಅಪ್ರಮೇಯ ಮಹಾ ಕನಕದಂತ ||

ಅಂಡಜನಾಭ ಗಜ ಗಂಡಸ್ಥಲ ಖಂಡಿಸುವಂತೆ |

ಚೆಂಡಾಡುವ ದುಷ್ಟರ, ಕಂಬುಕಂಠದ ಹಯಗ್ರೀವನೇ ||

ಕೊಡು ನಿನ್ನಲಿ ಅಖಂಡ ನಿರ್ಮಲ ಭಕುತಿ ||

ಕೂರ್ಮ

ಬೆನ್ನಮೇಲೆ ಮಂದರಗಿರಿ ಪೊತ್ತವನೆ |

ಚೆನ್ನಾದ ಧರ್ಮವನ್ನೇ ಅವಲಂಬಿಸಿದ ||

ಅನೀಶ ಸುರಿಗೆ ಸದಾ ಸುಖ ಬಯಸುವ |

ದಾನವರ ಮರ್ಮಭೇದಕ ಕೂರ್ಮನೇ ||

ಘೃಣೀ ಕಾಂತಿಯುಕ್ತ, ವಿಕಾರರಹಿತ ಜಗತ್ಕರ್ತೃ ಸಂಸಾರದಿಂದೆನ್ನ ತಾರಿಸು ||

ಧನ್ವಂತರಿ

ಸೂರ್ಯಕಿರಣದಿಂದ ವನೌಷಧಿ ಬೆಳೆಸುವ |

ಆಯುರ್ವೇದ ಅಧಿಪತಿಯಾದ ಧನ್ವಂತರಿಯೇ ||

ಜಯಿಸಿ ದಾನವರನ್ನು ವಿವಿಧ ಅವತಾರದಿ |

ಮಾಯೆಯಲಿ ಕಾಮಹರನ ಭ್ರಮಿಸಿದ ರೂಪ ತಳೆದು ||

ಸಂಯಮಕ ಸುರರಿಗೆ ಅಮೃತವಿತ್ತವ ಎನಗೆ ಸುಪಥ ತೋರೋ ||

ಮೋಹಿನಿ

ಕ್ಷೀರಸಾಗರ ಮಥನದಿ ಅಸುರರು ಅಮೃತಾಪಹರಿಸಲು |

ಸುರೇಶ್ವರ ತಳೆದ ಲಾವಣ್ಯಮಯ ಸೌಂದರ್ಯರೂಪ ||

ಸುರಳಿ ಗುಂಗುರ ಕೂದಲು ಹಾರಿಸುತ ಶ್ವೇತವಸನೆ |

ಸೀರೆಯುಟ್ಟು ಕುಚನರ್ತಿಸಿ ಬಳಕುತ್ತಾ ಅಸುರರ ವೀಕ್ಷಿಸೆ ||

ಹರಿಯ ಸ್ತ್ರೀರೂಪ ಮೋಹಿನಿಗೆ ಶರಣಾದರೆಲ್ಲ, ಹಾಗೆ ಎನ್ನನ್ನೂ ಶರಣಾಗಿಸು ||

ಷಡಂಗಯುಕ್ತ ವೇದಾಭಿಮಾನಿ ಸರಸ್ವತೀ, ಉಮೆ |

ಸಡಗರದ ರೂಪ ನೋಡಿ ಬೆರಗಾದರು ||

ಕಡು ಕೆಂಪಾದ (ಹವಶದಂತಹ) ಪಾದ ಊರಿ ಬಳಕುವ ಮೋಹಿನಿಯ |

ಕಂಡು ಬ್ರಹ್ಮ, ರುದ್ರಾದಿಗಳು ಅಸಮರ್ಥರಾದ ತಮ್ಮನ್ನು ಮಾನ್ಯಸೆಂದು ||

ಬೇಡಿಕೊಡರೆಲ್ಲ ಜ್ಞಾನಾನಂದ ಸ್ವರೂಪನ ಹೇ| ನನ್ನನ್ನು ಮನ್ನಿಸಲಿ ||

ವರಾಹ

ಜಲಧರ ಕಾರ್ಮೋಡದಂತೆ ನೀಲ ಮೇಘಶಾಮನು |

ಜಲಸಾಗರ, ನದಿ, ಪರ್ವತ ಸಕಲ ಪೊತ್ತವ ||

ಲೋಲೆಯಿಂದಲಿ ಊರ್ವಿ ಹರಣಗೈದ ಹಿರಣ್ಯಾಕ್ಷನ ದಹಿಸಿ |

ಜಲ ಕ್ರೀಡಿಸಿದ ನೈದಿಲೆ ವರ್ಣದ ಭೂವರಾಹನು ||

ಕಲಂಕ ರಹಿತ ಯೋಗಿವರ್ಯರಿಂದ ಸದಾವಂದಿತ, ಎನ್ನ ನಮನ ಸ್ವೀಕರಿಸು ||

ನರಸಿಂಹ

ವಿಜೃಂಭಿಸಿ ಕಂಬದಿಂದ ಹೊರಟು ಭಕ್ತ ಪ್ರಲ್ಹಾದಗೆ ವರವಿತ್ತ |

ವಜ್ರದಂತಹ ತೀಕ್ಷ ನಖದಿಂದ ಹಿರಣ್ಯಕನ ಉದರ ಬಗೆದ ||

ಅಜನಿ ರಮಾ, ಬ್ರಹ್ಮ, ವಾಯು ಗರುಡ, ಶೇಷರಲ್ಲದೆ |

ಅಜ್ಞಾನಿ, ಹರಿದ್ವೇಷಿಗಳನೆಂದೂ ಸಹಿಸನು ನರಸಿಂಹ ||

ಗಜ ಚರ್ಮಾಂಬರಧಾರಿ ರುದ್ರ, ಇಂದ್ರ, ಷಣ್ಮುಖರಿಂದ ಸ್ತುತಿಸಿಕೊಳ್ಳುವವ ಎನ್ನ ರಕ್ಷಿಸಲಿ||

ವಾಮನ

ಚತುರಂಗ ಸೈನ್ಯಬಲದಿ ಸೊಕ್ಕಿದ ದನುಜನು |

ಕೂತನು ಬಲಿ, ಸಾಂಗವಾಗಿ ಯಜ್ಞಮಾಡಲು ||

ಉತ್ತಮ ಮಂಗಲ ತ್ರಿವಿಕ್ರಮ ಶೃಂಗಾರ ಪಾದದಿ |

ಉತ್ತುಂಗ ಬ್ರಹ್ಮಾಂಡ ಕಟಾಹ ತಾಕಿಸಿ ಸುರಗಂಗೆ ಹರಿಸಿದ ||

ಇಂತಹ ವಿರಾಟರೂಪಿಯ ಭಜಿಸೆ ಪಾಪ ಕಳೆವ ವಾಮನನಿಗೆ ನನ್ನ ನಮನಗಳು ||

ದಾನವ ಬಲಿಯಿಂದ ಗುಪ್ತ್ಯಾರ್ಥದಿ ದಾನ ಪಡೆಯಲು |

ದನುಜ ಪರಿವಾರವೆಲ್ಲ ನೆರೆದು ನಿಂತು ನೋಡಿದರು ||

ಮನ ನಿರ್ಮಲದಿ ಕೋಟಿ ಚಂದ್ರನಂತೆ ಪೊಳೆವ ಮೌಂಜಿಧಾರಿ |

ಜನಿವಾರ, ಛತ್ರಿ, ಪಾದುಕಾ, ದಂಡ ಕಮಂಡಲಧರ ||

ಧಾನ್ಯಯೋಗ್ಯ ವಾಮನರೂಪ ಹರ್ಷ ಸುರಿಸಿ ಎನ್ನ ಧನ್ಯನಾಗಿಸಲಿ ||

ಪರಶುರಾಮ

ಶೌರ್ಯದು ಕ್ಷತ್ರಿಯರಾಜ ಸಮೂಹ ಕುಲಾಂತಕ |

ವೀರ್ಯವಂತ ಸಹಸ್ರಾರ್ಜುನನ ಸವರಿದ ಪರಶುರಾಮ ||

ಭಾರ್ಯೆಯ ಪರಾಧಕೆ ಕುಪಿತ ಪಿತನಾಜ್ಞೆಯಂತೆ |

ಧೈರ್ಯದಿ ಮಾತಾ, ಭ್ರಾತೃಗಳ ಶಿರ ಸಂಹರಿಸಿದ ||

ದಯಾಮಯ ಅಮಿತವೀರ್ಯ ಎನ್ನಪರಾಧ ತಡೆಯಲಿ ||

ಶ್ರೀರಾಮ

ಶುಭ್ರ ನಿರ್ಮಲ ಅಮಿತ ಗುಣವಂತ |

ಶ್ರೀರಾಮನು ಲಕ್ಷ್ಮಣನೆಂಬ ಗಿಳಿಗೆ ಯಶೋವಂತ ||

ಪರಶುರಾಮನಲಿ ಯುದ್ಧ ಕಲಹ ತೋರಿದವ |

ಸ್ವರ್ಗಾಧಿಪತಿ ವೈರಿಗಳ ಭಯ ಹೆಚ್ಚಿಸುವ ||

ನಾರು ವಸ್ತ್ರಾನ್ವಿತ ಘೋರ ಮನೋರಥ ಪೂರೈಸನೆಂದಿಗೂ ಎನ್ನನು ರಕ್ಷಿಸಲಿ ||

ರಮಾ, ಬ್ರಹ್ಮಾದಿಗಳಿಗೆ ಸುಖದ ಸ್ವರ್ಗನು |

ಭ್ರಮಿತವಾಲಿ ಭಜಿಸಿ, ರವಿಸುತಗೆ ರಾಜ್ಯವಿತ್ತ ||

ಕಾರ್ಮೋಡ ಕಂಡು ನಲಿವ ನವಿಲಂತೆ ಅಯೋಧ್ಯಾಪತಿ ಸುತ |

ದುರ್ಮುಖ, ಕಾಕರೂಪಿ ಕುರಂಗನ ಒಕ್ಕಣ್ಣು ಮಾಡಿದ ||

ಸುಮುಖ ಶ್ರೀರಾಮ ನಿನ್ನ ಪಾದ ಕಮಲದಿ ಅತುಲ ಭಕ್ತಿಕೊಡು |

ಸ್ವರ್ಗಭೂಮಿ ಜಯಿಸಿದ ತಪಸ್ವಿ ವಿಶ್ವಾಮಿತ್ರ ಜೊತೆ ಹೊರಟ |

ಶ್ರೀರಾಮ ಸಕಲರ ಕಣ್ಮಣಿ ಮನೋ ವಲ್ಲಭ ||

ಸರ್ವದಾ ಹಸನ್ಮುಖನಾದ ಇವಗೆ ಸಮಾನ-ಅಧಿಕರಾರಿಲ್ಲ |

ರುದ್ರವರಪ್ರದ ಧನು ಹದೆಯೇರಿಸಿ ಮುರಿದ ||

ಶೌರ್ಯವಂತ ಸೌಂದರ್ಯಸಾರ ವಿಜಯಿ ಎನ್ನ ಸಂಸಾರದಿಂದ ಜಯಿಸಲಿ ||

ಅರಣ್ಯದಿ ಶರ ಬೀಸಿ ಅಸುರ ಪತ್ನಿಯರ ವಿಧವೆಯಾಗಿಸಿದ ||

ಕರಿ ಮುಂಗುರುಳು ಹಾರಾಡುವ ಭ್ರಮರದಂತೆ, ಭ್ರೂಮಧ್ಯೆತಿಲಕವಿಟ್ಟ |

ಅರವಿಂದ ನಯನೇ, ಸೂರ್ಯವಂಶ ಕುಲವಧು ಬಂದಳು ||

ಶ್ರೀರಾಮನನುಸರಿಸಿ ದುರ್ಗಮ ಕಾನನಮಾರ್ಗ ಸವೆಸಿದಳು |

ತಾರೆ ಗುಂಪಲಿದ್ದ ಉಡುಪನಂತೆ, ಸೀತೆ ಜೊತೆ ಶೋಭಿಸಿದವ ಎನ್ನ ಕಾಪಾಡಲಿ ||

ಜಿತೇಂದ್ರಿಯರಾದ ಮಹಾ ತಪಸ್ವಿಗಳು |

ಸತತದಿ ದಶಾನನನಿಂದ ಕ್ಲೇಶಪಟ್ಟರು ||

ಇಂತಿರಲು ಭುವಿಯೊಳ್, ಅವರ ದು:ಖ, ಭಯ |

ಅಂತಗೊಳಿಸಲು ಯಜ್ಞರಿಪು ದನುಜನ ||

ಚಿತ್ರಕೂಟದಲ್ಲಿದ್ದ ಶ್ರೀರಾಮ ಉದ್ಯುಕ್ತನಾದ, ಇವನ ಭಜಿಸುವಂತಾಗಲಿ ||

ಮಿಂಚುಳ್ಳ ಕಾಂತಿಯ ಚಾಪ ಶತ್ರು ನಿರ್ಮೂಲಿಸುವಂತೆ |

ವಾಂಛಿತ ಪಾದ ಕಮಲದಿಂ ಅತೀ ದಯಾ ರಸ ಸುರಿಯಲಿ ||

ಇಚ್ಛೆಯಲಿ ಜಟಾಯು ಶ್ರೀರಾಮನ ಸಂದರ್ಶಿಸಿ |

ಸ್ವಚ್ಛವಾಗಿ ಪಾಪಿ ರಾವಣ ಕುಕೃತ್ಯನರುಹಿ ಮರಣಿಸಲು ||

ಸಂಚಿತ ಪಾಪ ಪಾವಕ ಅಮಿತಕೀರ್ತಿ, ಪಂಪಾತಟದಿ ಸಂಚರಿಸುವವ ರಕ್ಷಿಸಲಿ |

ಹರಿಣಾಕ್ಷಿ ಕನಕ ಕುರಂಗ ಕುತೂಹಲದಿ ಆಪೇಕ್ಷಿಸಲು |

ಉರ್ವಿಸುತೆ ಅಪಹಾರಕನ ಅನುಜನ ಪೋಷಿಸಲು ||

ಧರಿಸಿದ ಪುಚ್ಛದಾಗ್ರದಿ ಅಗ್ನಿಯಿಂದ ಲಂಕೆ ದಹಿಸಿ |

ಶ್ರೀರಾಮ ಪದತಲ ರಜವ ಹಣೆಯಲಿಟ್ಟ ||

ಹರಿಸೇನೆ ಶರಧಿಗೆ ಸೇತು ಬಂಧಿಸಿದಂತೆ ಭಕ್ತಿಯಿಂದ ಬಂಧಿಸಲಿ ||

ಬಿಲ್ಲು, ಖಡ್ಗ, ಭುಜದಿ ಬತ್ತಳಿಕೆ ಧರಿಸಿ |

ಸಲ್ಲಕ್ಷಣ ಸೂರ್ಯಕಾಂತಿ ಸಮಾನ ಶ್ರೀರಾಮ ಕಪಿಸೈನ್ಯ ಸಂರಕ್ಷಕನ |

ಅಲಕ್ಷಿಸಿದ ರತ್ನಾಕರನ ಕುಪಿತದಿ ಕೆಂಗಣ್ಣು ಕುಡಿ ನೋಟದಿ ವೀಕ್ಷಿಸೆ ||

ತಲ್ಲಣ ಹೃದಯದಿ ಅಮೂಲ್ಯರತ್ನ ಮಣಿ ಪದತಲಕೆ ಸುರಿದ |

ನಲುಮೆಯಲಿ ಸತತ ಸ್ತುತಿಸುವ ವಾಯುಸುತನ ಸ್ವಾಮಿ ಜಯವೀಯಲಿ ||

ಹುಂಕಾರದಿಂದ ಟಂಕಾರನಾದ ಕೇಳಿ ಪಾಪಿಷ್ಠರು |

ಶಂಕೆಯಿಂದ ವಜ್ರದಂತಿದ್ದ ಹೃದಯ ಚೂರಾಯಿತು ||

ಲಂಕಾಧೀಶ ತನಗೆ ಮೃತ್ಯುಕಾಲ ಸಮೀಪಿಸಿತೆಂದು |

ಏಕಕಾಲಕೆ ಅನೇಕ ಶಂಕೆಯಿಂದ ಉದ್ಗಾರ ತೆಗೆದನು ||

ಲಂಕೆಯಲ್ಲಿದ್ದವರ ಕಾಲನಾದ ಶ್ರೀರಾಮ ಧನುರ್ಧಾರಿಯಾದವನ ಸದಾಭಜಿಸುವಂತಾಗಲಿ ||

ಬುದ್ಧಿಯಿಂದ ತಿಳಿಯಲಸಾಧ್ಯನು, ದು:ಖಿತರಿಗೆ ಮಂಗಲನಾಮ |

ಶುದ್ಧ ರಮಾ, ಬ್ರಹ್ಮ, ರುದ್ರ, ಶೇಷ, ಗರುಡ, ಚಂದ್ರ, ಗುರುವಂದ್ಯನು ||

ಹೃದ್ಯರ ರಕ್ಷಣೆ ಭಾರ ಹೊತ್ತಿರುವ ಪ್ರಭು ಶ್ರೀರಾಮ ಸೀಮಾತೀತ ||

ಯುದ್ಧದಿ ಸಕಲ ಕಂಟಕ ರಾವಣನ ವಧಿಸಿದ |

ಆದ್ಯನಾಗಿ ಸಕಲ ವೇದ ಪ್ರತಿಪಾದ್ಯ ಅಪ್ರಾಕೃತ ಪ್ರಕೃತಿಯಿಂದ ರಕ್ಷಿಸಲಿ ||

ಕಾಮವಶ ಇಂದ್ರನಿಂದ ಪತಿತಳಾಗಿ ಪತಿ ವಚನದಂತೆ |

ಶಮ ದಮ ಸಹಿತಳಾಗಿ ಶಿಲೆಯಾಗಿದ್ದವಳ ಉದ್ಧರಿಸಿದ ||

ಉಮೆಯ ಬಯಸಿ ತಪಗೈದ ಶಂಬೂಕನ ಕರದಿ ಕೊಂದ |

ಸಮಾನತೆಯ ಪ್ರತೀಕ ಶ್ರೀರಾಮ ಬೇಡಸ್ತ್ರೀಯ ಅನುಗ್ರಹಿಸಿದ ||

ಮಾನವಂತ ವಿಭೀಷಣಗೆ ಆಶ್ರಯವಿತ್ತು ಶುಭಕೋರಿದವನ ಸದಾ ಆಶ್ರಯಿಸುವಂತಾಗಲಿ||

ಶ್ರೀಕೃಷ್ಣ

ವೃಂದಾವನದಿ ಗೋವೃಂದವ ಕಾಯ್ದು ಲೀಲೆಗಳ ತೋರಿದ |

ನಂದಸುತ ಏಕೈಕ ಸಕಲ ದೇವತೆಗಳಿಂದ ನಮ್ಯ ||

ಬುಧರಿಂದ ನಮಿತನಾದವ ಅಸುರಹರಣಾರ್ಥ ಭುವಿಗಿಳಿದ |

ಸುಂದರ ಚಂದಿರನು ನೀಲಕಾಂತಿ ಶ್ರೀಕೃಷ್ಣ ರೂಪಕೆ ನಾಚಿದ ||

ಉದರಕೆ ಹಗ್ಗದಿಂದ ಬಂಧಿತನಾದವ ಬಂಧನ ಬಿಡಿಸಿಲಿ ||

ಗೋಪಾಲಕ ಉತ್ಸವದಿ ಉತ್ಸಾಹದ ಮೃಷ್ಟಾನ್ನ ಭೋಜನ |

ಲೋಪಿಸಲು ಕುಪಿತ ಇಂದ್ರ ಸುರಿಸಿದ ಮುಸಲಧಾರೆಗೆ ಗಿರಿಧಾರಿಯಾದ ||

ಗೋಪಾಂಗನೆಯರ ವಸ್ತ್ರ ಅಪಹರಿಸಿ ಭಕ್ತಿವಶರನ್ನಾಗಿಸಿ |

ಗೋಪಿಯರೊಡಗೂಡಿ ರಾಸಲೀಲೆ ಆಡಿ ಉದ್ಧರಿಸಿದ ||

ಗೋಪಾರಿಜಾತಹರಣ ಮಾಡಿದ ಶ್ರೀಕೃಷ್ಣ ಸಕಲಪಾಪ ಅಪಹರಿಸಲಿ ||

ಕಂಸಾದಿ ದುರುದ್ಧೇಶಿತ ಅಸುರರ ದಮನಕ್ಕಾಗಿ ಧರೆಗಿಳಿದ |

ಸು-ಸಾರಭೂತನು ಸಂಸಾರಬದ್ಧ ಸಜ್ಜನರೋದ್ಧಾರಕ ||

ಸಂಸಾರದಿ ಸಾತ್ವಿಕರಿಗೆ ಸುಖವೀವ ಶ್ರೀಕೃಷ್ಣ ಜ್ಞಾನಾನಂದ ||

ಹಂಸಾದಿ ತಾಪಸರಿಗೆ ದರುಶನವಿತ್ತು ಹರುಷವೀವ |

ಹಂಸವಾಹಕ ಬ್ರಹ್ಮಾದಿಗಳಿಂದ ಚರಣವಂದ್ಯನು ಆದರದಿ ಚರಣ ತೋರಲಿ ||

ರಾಜೀವ ನೇತ್ರನು ಜ್ಞಾನಿಪ್ರಿಯ ವಿದುರಗೆ ಪ್ರಾಣಪ್ರಿಯ |

ರಾಜ ಜರಾಸಂಧನ ಚತುರಂಗ ಬಲ ಸೈನ್ಯ ಗರ್ವ ಭಂಗಿಸಿ ||

ಭುಜ ಬಲದಿಂದ ಶ್ವೇತಾಶ್ವರೂಪಿ ದೈತ್ಯನ ವಧಿಸಿದ ಶ್ರೀಕೃಷ್ಣ |

ಜಾಜಿ, ಕದಂಬ, ಎಳೆ ಕಮಲಾದಿ ಹೊಮಾಲೆ ಧರಿತ ||

ವಾಜೀಶವಾಹನ ಸುವಾಸಿತ ಶಿರದವ ಸದಾ ರಕ್ಷಿಸಲಿ ||

ಕಾಲೀಯ ಆವಾಸ ಯಮುನೆಯ ಮಡುನಲ್ಲಿದ್ದವನ |

ಕೇಲಿಯಲಿ ತಲೆಮೇಲೆ ನರ್ತಿಸಿ ಪಾದನಖದಿಂ ||

ಕಾಲೂರಿ ರವಿ ಹೊಂಗಿರಣದಂತೆ ಕೆಂಪಾಗಿ ಪ್ರಹಾರಿಸಿದ |

ನೀಲಕಂಠನ ವರದಿಂದ ಸೊಕ್ಕಿದ ದೈತ್ಯರ ವಧಿಸಿದ ||

ಆಲಿಂಗಿಸಿ ಗೋಪಸ್ತ್ರೀಯರ ಸುವಾಸಿತನಾದ ಶ್ರೀಕೃಷ್ಣ ಭಕ್ತಿಯ (ಪರಿಮಳ) ಪಸರಿಸಲಿ ||

ಕೃಷ್ಣಾದಿ ಪಾಂಡುಸುತರು ದ್ರೌಪದಿ ಮನೋರಥವ ಸಂತೈಸಿದರು |

ಕೃಷ್ಣ ಚಿನ್ಹೆ ಧರಿತವರ ಕಷ್ಟ ಕಳೆವ ನೀಲಾದಿ ಷಣ್ಮಹಿಷಿ ಪತಿ ||

ಪೋಷಿಸಿ ಜ್ಞಾನಿಗಳ ಆನಂದ ಕಡಲಿನ ಚಂದ್ರನಂತೆ |

ವಿಷ್ಣುನಾಮಕ ಗೋವರ್ಧನಧಾರಿ ಶ್ರೀಕೃಷ್ಣ ಜಯಶಾಲಿ ||

ನಿಷ್ಣಾತ ಉಪೇಂದ್ರ ಧೈರ್ಯಶಾಲಿ ಸದಾ ಕರುಣಿಸಲಿ ||

ಸುಂದರಿಯರಾದ ಭೂ,ರಮೆ ಸಮೇತ ಬಲರಾಮಾನುಜನ |

ಮಾಧವನಂಘ್ರಿ ಕಮಲದಿ ಕಾಮಪಿತ ರತಿ ಕೊಡಲಿ ||

ವಧಿಸಿ ವ್ಯೋಮಾಸುರ, ಕಾಮಾರ್ತ ಭೌಮಸುರರ ಕನ್ಯೆಯರ |

ಬಂಧಿತರಾದ ಪ್ರಣಯಪೀಡಿತ ಕನ್ಯೆಯ ಸ್ವೀಕರಿಸಿದವ ಭೀಮಾಭಿವಂದ್ಯ ||

ರುದ್ರ, ಶೇಷಾದಿ, ವೈಮಾನಿಕ ಸಂಚರಿಪರಿಂದ ವಂದ್ಯನು ಸೆರೆ ಬಿಡಿಸಿದ ಶ್ರೀಕೃಷ್ಣ ||

ವಿಷಮಿಶ್ರಿತ ಭಕ್ಷ್ಯ ಇತ್ತು, ವಿಷಸರ್ಪ ಗಣದಲ್ಲಿ ಬಂಧಿತನ ದೂಡಿ |

ಲಾಕ್ಷಾಗೃಹ ಜ್ವಲಿಸಲು, ರಾಕ್ಷಸರಾದ ಹಿಡಿಂಬ, ಬಕರಿಂದ ಪೀಡಿತರು |

ಭೀಕ್ಷಾನ್ನದಂತಹ ಆಪತ್ತು ಬಂದರೂ ಧೈರ್ಯ ಬಿಡಲಿಲ್ಲ |

ಅಕ್ಷಯ ಸೀರೆಯಿತ್ತ ಶ್ರೀಕೃಷ್ಣ , ದ್ರೌಪದಿಮಾನ ಭಂಗದಿ ||

ಭೀಷಣ ಅಪಹಾಸವಾದರೂ ಧರ್ಮಮಾರ್ಗದಿ ನಡೆದರು ||

ಧರ್ಮಾರ್ಜುನಾದಿ ಪಾಂಡವರ ಅನ್ಯಾಯ ವೀಕ್ಷಿಸಿ |

ಮರ್ಮಘಾತಕರ ಅಕ್ಷೋಹಿಣಿ ಬಲನಾಶ ಮಾಡಲು ನಿರ್ಧರಿಸಿ ||

ಗರುಡಾರೂಢೀ ಖಡ್ಗ, ಬಿಲ್ಲು, ಬಾಣ, ಚಕ್ರ ಪಿಡಿಯಲೊಪ್ಪದೇ |

ಸಾರಥಿಯಾಗಿ ಕಪಿಧ್ವಜ ರಥಕೆ ಅರ್ಜುನನ ರಕ್ಷಿಸಿದ |

ಶ್ರೀಕೃಷ್ಣ ಲಕ್ಷ್ಮೀಪತಿ, ಯದುಪತಿ ಜಯಶಾಲಿಯೆನ್ನ ಜಯಶಾಲಿಯಾಗಿಸಲಿ ||

ಬುದ್ಧ & ಕಲ್ಕಿ

ಬುದ್ಧಾವತಾರದಿ ಬುಧರಿಗೆ ದಯೆತೋರಿ ಅವತರಿಸಿ |

ಶುದ್ಧೋಧನ ಪುತ್ರನಾಗಿ ಕಥಾಗತ ಶಾಸ್ತ್ರ ಸಿದ್ಧಾಂತ ಪ್ರವರ್ತಕನಾದ ||

ಕ್ರೋಧದಿ ಖಡ್ಗ-ಗುರಾಣಿ ಪಿಡಿದು ಕಲ್ಕಿ ರೂಪದಿ |

ಶುದ್ಧಾಶ್ವಯಾನದಿ ದೈತ್ಯರ ಹತಗೈವ ಶ್ರೀಕೃಷ್ಣ ||

ಶುದ್ಧ ಹೃದಯದಿ ಲಕ್ಷ್ಮೀಧರಿಸಿದವಗೇ ಕರಮುಗಿವೆ ಸ್ವೀಕರಿಸಲಿ ||

...

ತಾಪಸಿಯರಿಗೆ ವಾರಿಧರ ಕಾರ್ಮೋಡದಂತೆ ಕರಿವರ |

ಅಪಾರ ಸಂಸಾರ ಶತ್ರುವಾದ ಅಹಂನಾಶವೇ ಬಲ ಔಷಧ ||

ಪುಷ್ಪಗಳ ಸಾರ ಶೇಖರಿಸುವ ಭ್ರಮರದಂತೆ ಸದಾ |

ಆಪತ್ತು ಬರಲೀಸದೆ ವೈಕುಂಠದಿ ಚರಿಸುವ ಪದಕಮಲದಲ್ಲಿಟ್ಟು |

ಅಪರಿಮಿತ ವರ್ಣದ ಶ್ರೀಕೃಷ್ಣ ತಾಮರೆ ಸಾರದಂತೆ ರಕ್ಷಿಸಲಿ ||

ಹಯಮುಖ ದೇವನು ಮತ್ಸ್ಯಾದಿ ದಶಾವತಾರಿ ಮನೋಹರನ |

ಬಯಸಿ, ಅತೀ ಭಕ್ತಿಯಲಿ ಶುದ್ಧಬುದ್ಧಿಯ ವಾದಿರಾಜಯತಿ ||

ದಯದಿ ರಚಿಸಿದ ಮಾಣಿಕ್ಯ ಮಾತಿನ ಚಮತ್ಕಾರ ಹಾರ |

ವಾಯು, ಬ್ರಹ್ಮಾದಿವಂದ್ಯ ಶ್ರೀಕೃಷ್ಣವಿಠ್ಠಲನ ಪೂಜೆಯಲಿ ಪಠಿಸಲು ||

ಭಯದ ಯಮಲೋಕವಾಗದೇ ಇತರ ಸುರಲೋಕವೇ ಫಲ ಪ್ರಾಪ್ತಿ ||

196. ಹರಿಯ ನೆನೆದರೆ ಪರಲೋಕ |

ನರರ ನೆನೆದರೆ ಸಂಸಾರಗತಿ ||

ದ್ವೇಷ ಬಿಟ್ಟರೆ ಉತ್ತಮ ಲೋಕ |

ರೋಷ ಮಾಡಲು ಅಧಮಲೋಕ ||

ಕರುಣೆತೋರಲು ಮನಕೆ ಶಾಂತಿ |

ಪರಹಿತ ಬಯಸದಿರೆ ಸ್ವಾರ್ಥಿ ||

ಧನ ದಾನಿಸದಿರೆ ಪಿಸುಣವಂತ |

ಮನ ವಿಶಾಲಿಸೇ ಮಾನ್ಯವಂತ ||

ಗುರು ಹಿರಿಯರ ನಿಂದೆಪಾಪ ವಜ್ರಲೇಪ |

ಕಿರಿಯರ, ಅಸಹಾಯಕರ ಸೇವೆ ಧನ್ಯತಾಭಾವ ||

ಪರರಿಗಾಗಿ ಬಾಳು ಈಲೋಕದಿ ಪರತರ |

ಸೇರಲು ಶ್ರೀಕೃಷ್ಣ ವಿಠ್ಠಲನ ಇದೊಂದೇ ದಾರಿ ||

197. ಎನ್ನ ಸ್ವಾಮಿ ಎನ್ನವ ಗುಣಗಳ ಚಿತ್ತಕ್ಕೆ ತರಿದಿರು |

ನೀನು ಕ್ಷಮಾರ್ಣವನಲ್ಲವೇ, ಎನ್ನ ಅಕ್ಷಮ್ಯಪರಾಧ ಕ್ಷಮಿಸು ||

ನೀನು ಜ್ಞಾನಿಯಲ್ಲವೇ, ಎನ್ನ ಅಜ್ಞಾನ ನೀಗಿಸು |

ನೀನು ಗುಣವಂತನಲ್ಲವೇ ಎನ್ನವ ಗುಣಗಳ ವಧಿಸು ||

ನೀನು ಆನಂದದಾಯಕನಲ್ಲವೇ ಎನಗಧಿಕಾನಂದ ನೀಡು |

ನೀನು ಧನವಂತನಲ್ಲವೇ ಎನ್ನಲಿ ಭಕ್ತಿಧನ ಹೆಚ್ಚಿಸು ||

ನೀನು ವಿಕಾರರಹಿತನಲ್ಲವೇ ಎನ್ನ ವಿಕಾರ ವರ್ಜಿಸು |

ನೀನು ಸಹನವಂತನಲ್ಲವೇ ಎನ್ನನು ಸದಾ ಸಹಿಸು ||

ನೀನು ಶಾಂತಮೂರ್ತಿಯಲ್ಲವೇ ಎನ್ನನು ಶಾಂತಳನ್ನಾಗಿಸು ||

ನೀನು ಸಂತೃಪ್ತನಲ್ಲವೇ ಎನ್ನನು ತೃಪ್ತಿಪಡಿಸು |

ನೀನು ಕಾಮರಹಿತನಲ್ಲವೇ ಎನ್ನನ್ನು ಕಾಮ ವಿಜಯಿಯಾಗಿಸು ||

ನೀನು ಮಹಾದಾನಿಯಲ್ಲವೇ ಎನ್ನನ್ನು ದಾನವಂತಳನ್ನಾಗಿಸು |

ನೀನು ಧರ್ಮಪ್ರಭುವಲ್ಲವೇ ಎನ್ನನ್ನು ಧರ್ಮದಿಂದ ನಡೆಸು ||

ನೀನು ಅನಂತಕಲ್ಯಾಣಗುಣನಲ್ಲವೇ ಎನ್ನನ್ನು ಕಲ್ಯಾಣವಾಗಿಸು |

ನೀನು ಅಚ್ಯುತನಲ್ಲವೇ ಎನ್ನವೇ ಎನ್ನನ್ನು ದೋಷರಹಿತಳನ್ನಾಗಿಸು ||

ನೀನು (ಅಜಾತಶತ್ರು) ಜಿತಾಮಿತ್ರನಲ್ಲವೇ ಎನ್ನ ವೈರಿಗಳ ನಾಶಗೊಳಿಸು |

ನೀನು ಸರ್ವಪ್ರಾಣಿ ಹಿತೈಷಿಯಲ್ಲವೇ ಎನ್ನಹಿತ ನಿನ್ನದಾಗಿಸಿಕೋ ||

ನೀನು ಸರ್ವಭೋಕ್ತಾರನಲ್ಲವೇ ಎನ್ನನ್ನು ಸ್ವೀಕರಿಸು |

ನೀನು ಸರ್ವಾಂತರ್ಯಾಮಿಯಲ್ಲವೇ ಎನ್ನ ಅಂತರ್ಯದಿ ಕಾಣಿಸು ||

ನೀನು ಸರ್ವಪ್ರಭುವಲ್ಲವೇ ಎನ್ನನ್ನು ನಿನ್ನ ದಾಸಳನ್ನಾಗಿಸು ||

ಎನ್ನ ಶ್ರೀಕೃಷ್ಣವಿಠ್ಠಲ ಎನ್ನನ್ನು ನಿನ್ನವಳೆಂದು ಅಪ್ಪಿಕೊ ||

198. ಒಂದೇ ಕಾಲಕೆ ಒಂದೇ ವಿಷಯಕೆ |

ಎಂದೂ ವಿಭಿನ್ನ ಯೋಚನೆ ಬರುವುದು ||ಪ||

ಜೋಡಿ ತಲೆಯಲಿ ಎಂದೂ ಒಂದೇ ವಿಚಾರವಿರದು |

ಕೂಡಿ ಆಲೋಚಿಸಿದರೂ ಒಂದೇ ಚಿತ್ರಣವಿರದು ||

ಕೂಡಾ ಹುಟ್ಟಿದವರಿರಲಿ ಒಡಿನಾಡಿಯೇ ಇರಲಿ |

ಗಂಡ-ಹೆಂಡತಿ ಇರಲಿ ಹಡೆದ ಮಕ್ಕಳೇ ಇರಲಿ ||1||

ಭಿನ್ನ ಜೀವ, ಭಿನ್ನ ಕರ್ಮದಂತೆ ಭಿನ್ನ ಅಭಿರುಚಿ |

ಭಿನ್ನ ಭಿನ್ನ ಸರ್ವಪ್ರಾಣಿಗಳಲಿ ಸರ್ವದಾ ಇರುವುದು ||

ಭಿನ್ನ ನೋಟ, ಭಿನ್ನಊಟ, ಭಿನ್ನಗುರಿ, ಭಿನ್ನಾಭಿಲಾಷೆ |

ಭಿನ್ನಮನ, ಭಿನ್ನಬುದ್ಧಿ, ಭಿನ್ನದೇಹ ಪ್ರಕೃತಿ |||2||

ನೆಲ ಒಂದೇ, ಕಾಲವೊಂದೆ, ಬಾಹ್ಯಾಕಾರವೊಂದೇ |

ಎಲ್ಲ ಸೇವಿಸುವ ಅನ್ನ, ಕುಡಿಯುವ ನೀರು ಒಂದೇ ||

ಬಲಾಬಲ, ದೇಹ-ಬುದ್ಧಿಯಲಿ ಬೇರೆ ಬೇರೆ |

ಎಲ್ಲರಂತರ್ಯಾಮಿ ದೈವ ಶ್ರೀಕೃವಿಠ್ಠಲನೇ ಆದರೂ ಪ್ರಾರಬ್ಧ ಬೇರೆ ಬೇರೆ ||3||

199. ವಾರಿಚರ ಚರಿಸಿ ಸಪ್ತರಾತ್ರಿ ವನೌಷಧಿ ರಕ್ಷಿಸಿದ |

ಘೊರತರ ರಣದಿ ವರಾಹ ಉರ್ವಿಯ ಉಳುಹಿದ ||

ಗಿರಿಧರ ಕುರ್ಮರೂಪಿ ಮಥಿಸಿದ ಸಾಗರವ |

ಸುರವರ ಸಿರಿವರ ಗಂಭಿರನಾದ ನರಹರಿ ||

ಪೋರ ಮೂರು ಪಾದ ಭೂಮಿ ಬೇಡಿ ತ್ರಿವಿಕ್ರಮನಾದ |

ಮಾತೃ-ಭಾತೃರ ಪಿತೃವಾಕ್ಯಕೆ ಪರುಶದಿ ಶಿರತರಿದ ||

ಗುರುವರ ಮಾರುತಿಕಾಂತ ಪ್ರಿಯ ಸೀತಾಪತಿ |

ಗುರುಪುತ್ರ ಮರಳಿಸಿ ಕಂಸಾರಿ ಗುರುದಕ್ಷಿಣೆಯಿತ್ತ ||

ಕರಿವರ ಪರಿವಾರಪಾಲಕ ನವನೀತ ಚೋರ |

ಧರ್ಮಪರಿ ಪಾಲಕ ಜ್ಞಾನಾಮೃತ ಸತ್ಯಬೋಧಕ ||

ಚೋರಪೋರ ಬೋಧಿಸಿ ಅವೇದ ಚಿತ್ತವ ಕೆಡಿಸಿದ |

ಪರಿಸರ ಉಳಿಸಲು ಅಶ್ವನೇರಿ ಖಡ್ಗ ಹಿಡಿದು ಬಂದ ||

ಮಾರಹರ ಭ್ರಮಿತ ರೂಪದಿ ಅಮೃತ ಪಾನಿಸಿದ |

ಸುರಾಸುರರೊಡೆಯ ಭಕ್ತರ ಪ್ರೀತಿ ಪಾತ್ರ ಸದಾ ||

ಪರಿಹರಿಸಿ ಸಜ್ಜನರ ಸಂಸಾರ ಭೀತಿಯ ಕರಪಿಡಿದು ನಡೆಸಿ |

ಗುರುತರ ಪ್ರಾರಬ್ಧ ಬಿಡಿಸಿ ಚರಣಕಮಲದಿ ಇರಿಸು ||

ಪರಾತ್ಪರ ಪಾಪಹರ ಶ್ರೀಕೃಷ್ಣವಿಠ್ಠಲ ದಯಾನಿಧೇ ||

200. ದಣಿವರಿಯದ ದಣಿ ಗುಣಗಳ ಖಣಿ |

ಮಣಿಯನು ಯಾರಿಗೂ ದಿನಮಣಿ ||ಪ||

ಅಣು, ರೇಣು, ತೃಣಕಾಷ್ಠದಲ್ಲಿರುವ |

ಕಣ್ಣುರೆಪ್ಪೆಯಂದದಿ ಸಕಲರ ಕಾಯ್ವ ||

ಬೆಣ್ಣೆಯಂದದಿ ಕರಗುವ ದು:ಖಾರ್ತರಿಗೆ |

ಪ್ರಾಣಿ, ಚಿಣ್ಣರಿಗೂ ಒಲಿದು ಅನುಗ್ರಹಿಪ ||1||

ಕಣಕಣದಲ್ಲಿರುವ ಸುಗುಣಗ್ರಾಹಿ |

ಮಣ ಬಂಗಾರಕೊಟ್ಟರೂ ಒಲಿಯನು ||

ಒಣ ಜಂಬ ತೋರ ಭಕ್ತಾಪರಾಧ ಸಹಿಷ್ಣು |

ದೊಣ್ಣೆನಾಯಕ ಎಲ್ಲರ ಬಿಡದೆ ಹಣಿಯುವ ||2||

ವರ್ಣಾಭಿಮಾನಿ, ಸೃಷ್ಟಿ, ಲಯ ಮಾಳ್ಪ |

ಕುಣಿದು ಕುಣಿಸುವ ಅಕಂಳಕ ||

ಋಣಮೋಚಕ, ಮೋಕ್ಷಪ್ರದಾಯಕ |

ಪರ್ಣಶಾಯಿ ಶ್ರೀಕೃಷ್ಣವಿಠ್ಠಲ ಅಪ್ರತಿಮ ||3||

201. ಅಂಗಳದಲ್ಲಾಡುತಿರಲು ರಘುರಾಮ ಕಂಡಾ |

ಆಗಸದಲ್ಲಿದ್ದ ಚಂದಿರ (ತನಗೆ) ಬೇಕೆಂದು ಹಟ ಮಾಡಿದ ||ಪ||

ಮಗುವಿನಹಟವೆಂದು ಬೇರೆ ಆಟಿಕೆ ತರಲು |

ಚೆಂಗಣ್ಣಿನಲಿ ನೀರು, ಉಬ್ಬಿಸಿಗಲ್ಲ, ಹುಸಿಗೋಪದಿ ||1||

ಬುಗುರಿ, ಚೆಂಡು, ಗೊಂಬೆಗಳನ್ನೆತ್ತಿ ಬಿಸುಟಿದ |

ಗಗನದೆಡೆ ಕೈ ಚಾಚಿ ಪೂರ್ಣ ಚಂದಿರನೇ ಬೇಕೆಂದ ||2||

ಆಗ ತಂದು ಕನ್ನಡಿಯಲಿ ಪ್ರತಿಬಿಂಬ ತೋರಲು |

ನಗುತಾ ಕಿಲಕಿಲ, ಚಪ್ಪಾಳೆ ತಟ್ಟಿದ ಹರ್ಷದಿ ||3||

ತೂಗಿಸಿ ತಲೆ ಗೆಜ್ಜೆ ಕಾಲ್ಗಳ ಹೆಜ್ಜೆ ಕುಣಿಸಿದ |

ಖಗಪತಿ ಶ್ರೀಕೃಷ್ಣವಿಠ್ಠಲ ಜಗಕೆ ಮರುಳ ಮಾಡಿದ ||4||

202. ಆದಿ ಬುನಾದಿಯಿಂದ ಎಲ್ಲ ಶಕ್ತಿಯ ಮೂಲ |

ಆದ್ಯಂತರಹಿತ ಸರ್ವಶಕ್ತ ನೀನಲ್ಲವೇ ? ||ಪ||

ತಿನ್ನುವ ಅನ್ನದಲ್ಲರುವ ಶಕ್ತಿ ನೀನೇ |

ನೀನಲ್ಲದ ಆಹಾರ ಕಸದ ಸಮಾನ ||1||

ಕುಡಿಯುವ ನೀರಿನ ಚೇತನನಾಗಿ |

ಒಡನೆಯೇ ದಾಹ ಪರಿಹರಿಸುವಿ ||2||

ಪ್ರತಿ ಉಸಿರಿನಲ್ಲಿದ್ದು, ಒಂದುಸುರಿನಲ್ಲಿಲ್ಲದಿರೆ |

ಸತ್ತು ಶವವಾಗುವರು ಕ್ಷಣದಲಿ ||3||

ಪ್ರತೀ-ದ್ವೇಷ, ಕಾಮ-ಲೋಭ ಹುಟ್ಟಿಸುವ |

ಕೋತಿ ಮನಸಿನ ಕಡಿವಾಣ ನೀನು ||4||

ಹಿಂದೆ, ಇಂದು-ಮುಂದೆ ಎಂದೆಂದೂ |

ಇದ್ದು ಜೊತೆಗೆ ಶಕ್ತಿಯ ಶಕ್ತಿ ನೀನೇ ಶ್ರೀಕೃಷ್ಣವಿಠ್ಠಲ ||5||

203. ಹುಡುಕ ಬೇಡಿ ಹುಡುಕಿ ದಣಿಯಬೇಡಿ ||ಪ||

ದುಡುಕಿ ಯಾರನ್ನೋ ನಿಯತ ಗುರುವೆನ್ನದಿರಿ ||ಅಪ|||

ಅರುಹುವರು ಸಾಧನದ ಬಗೆ ಅನೇಕರು |

ಮಾರ್ಗದರ್ಶನ ತೋರುವವರನೇಕರು ||

ಶಾಸ್ತ್ರಧ್ಯಾಯ ಮಾಡಿಸುವರನೇಕರು |

ತೋರುವುರು ಗುರಿ ಆದರೆ ತಲುಪಿಸರು ||1||

ನಿಂದ್ಯಾನ್ನ ವರ್ಜಿಸಿ ಅಶೌಚ ತೊರೆದು |

ಸಾಧನೆ ಪೂರ್ಣವಾಗಲು ಸುಜೀವಿ ಬಳಿ ||

ಒದಗಿ ಬರುವ ತಾನೇ ನಿಯತ ಗುರು |

ಕಂದನ ಹುಡುಕಿ ತಾಯಿ ಬರುವಂತೆ ||2||

ಏಕಚಿತ್ತದಿ ಬೋಧಿಸುವ ಸ್ವಬಿಂಬೋಪಾಸನೆ |

ಸಂಕೀರ್ತಿಸಿ, ಸ್ತುತಿಸಿ, ಪೂಜಿಸಲು ಬಿಂಬರೂಪ ||

ಮುಕುಂದನ ಮಂದಿರ ದಾರಿ ಸಿಗುವುದು |

ಲಕುಮಿವಲ್ಲಭ ಶ್ರೀಕೃಷ್ಣವಿಠ್ಠಲನಾಣೆಗೂ ಸತ್ಯ ||3||

204. ಶ್ರೀಗೌರಿ ಕಲ್ಯಾಣಿ ಶಂಕರನರ್ಧಾಂಗಿ |

ಜಗನ್ಮಾತೆ ಉಮಾಮಹೇಶ್ವರಿ ||ಪ||

ಮಾಗಭಿಮಾನಿ ಸೌಭಾಗ್ಯವಂತೆ |

ಗಂಗಾಧರ ಪ್ರಿಯೆ ಸತೀದೇವಿ ||

ಹೊಂಗಿರಣ ಮೂಡಿಸೆನ್ನ ಜೀವನದಿ |

ಜಗನ್ಮಂಗಳೆ, ಪಾರ್ವತಿಯೇ ||ತಾಯೇ |||1||

ಮಾತು ಮನದ ಪ್ರತೀಕವಂತೆ |

ಶತ್ರು ಭಯ ಬಿಡಿಸಿ ಕಾಪಾಡು ||

ಸತ್ಯದ ದಾರಿ ತೋರು ಕರುಣದೀ |

ನಿತ್ಯ ಶ್ರೀಕೃಷ್ಣವಿಠ್ಠಲನ ನಿಜಭಕುತೆ ||ತಾಯೇ ||2||