ಡಾ ನರಸಾಪೂರ & ಪರಿವಾರ

ಶ್ರೀ ಕೃಷ್ಣವಿಠ್ಠಲಪದಗುಚ್ಛ 3 ಅನುಕ್ರಮಣಿಕಾ

261. ಸುದಾಮ ಸಖ ಅನಿಮಿತ್ತ ಬಂಧುವೇ |

ಚೆಂದದಿ ಕಾಯೋ ಜನುಮ ಜನುಮದಿ ||ಪ||

ಎಂದಿಗೂ ಮಾನ ಅವಮಾನ ನಿನದಯ್ಯಾ |

ಆದದಾಯಿತು ಪಾಪಗಳ ಕಳೆದು ದಯದಿ ||

ಮುಂದೆಂದೂ ಹಾದಿ ತಪ್ಪದಂತೆ ಮಾಡು |

ಭೇದವೆಣಿಸದೆ ನೋಡು ಸಮದರ್ಶಿಯೇ ||1||

ಹೃದಯ ಮಂದಿರದಲಿ ಸ್ಥಿರದಿ ನೆಲೆಸು |

ಎಂದೆಂದೂ ವಿಸ್ಮರಣೆ ಬರದಿರಲಿ ||

ಒಂದೇ ಮನದಿ ಸದಾ ಸ್ಮರಿಸುವಂತಾಗಲಿ |

ಸುಂದರಿನಾಥ ನಿನ್ನ ದರುಶನವಾಗಲಿ ||2||

ಮಂದಿಯೊಳಗಾಡಿಸಿ ಮಂದನೆನಿಸಬೇಡ |

ಕುಂದುಗಳೆಣಿಸದೆ ಕಂದಿಸದೆ ಎನ್ನ ||

ಬಂದು ಭರದಿಂ ಸಲಹೋ ಶುದ್ಧಾತ್ಮ |

ಯದುಕುಲಚಂದ್ರ ಶ್ರೀಕೃಷ್ಣವಿಠ್ಠಲ ||3||

262.. ಮನದಿ ಮಾತು ವ್ಯಕ್ತವಾಗಲು ಭಾಷೆ ಬೇಕು |

ಮನದ ಮಾತು, ಆಡುವ ಭಾಷೆ ಬೇರೆಯಾಗಲೂಬಹುದು ||

ಮಾನ್ಯ-ಅಮಾನ್ಯತೆ ಬರುವುದು ಆಡುಭಾಷೆಯಿಂದ |

ಮೌನದಿಂದ ತಿಳಿಸುವದಕ್ಕೆ ಭಾಷೆಬೇಡ ||

ಮೌನದೊಳಡಗಿಹುದು ಪ್ರೀತಿ, ದ್ವೇಷ, ರೋಷ, ಆನಂದ |

ಕಣ್ಣಿನ ಮೌನ ಭಾಷೆಯಿಂದ ಭಾವನೆವಿದಿತ ||

ಕಾಣದ ದೈವ ಶ್ರೀಕೃಷ್ಣವಿಠ್ಠಲ ಮನದೊಳಗಿದ್ದು ಎಲ್ಲ ನಡೆಸುವ ||

263.. ಭಾಷೆ ತಿಳಿಯದು ಹಕ್ಕಿಗಳ ಇಂಚರದ |

ಭಾಷೆ ತಿಳಿಯದು ಪ್ರಾಣಿಗಳ ಕೂಗಾಟದ ||

ಭಾಷೆ ಭಿನ್ನ, ವೇಷ, ಆವಾಸ ಭಿನ್ನ |

ಪುಷ್ಪಗಳ ವಿಭಿನ್ನ ಸುಗಂಧದ ಮೂಲ ತಿಳಿಯದು ||

ಪುಷ್ಟಿಕರ ಜೇನರುಚಿ ಇರುವ ಬಗೆ ಅರಿಯದು |

ಭಾಷೆಯಾಡದ ಹರಿವ ಜಲದ ವಿಭಿನ್ನತೆ ಗೊತ್ತಾಗದು ||

ಭಾಷೆಗಿಂತ ಉತ್ತಮ ಮೌನ, ಎಲ್ಲವೂ ತಿಳಿಸುವುದಂತೆ |

ವಿಶಿಷ್ಟ ಶ್ರೀಕೃಷ್ಣವಿಠ್ಠಲನ ಮೌನ ಒಟ್ಟಾರೆ ತಿಳಿಯದಲ್ಲ ಹೇಗೆ ? ||

264. ಭಿನ್ನಾಭಿನ್ನ ಈ ಪ್ರಪಂಚದೆಲ್ಲೆಡೆ ಸತ್ಯದಿ ಇದೆ |

ತಿನ್ನುವ ಅನ್ನದಿಂದ, ಅನ್ನುವ ವೇದದವರೆಗೂ ಇದೆ ||ಪ||

ಹೂವ ರಸ-ರುಚಿ ಬೇರಾದರೂ ಮಧುವಿನ ರುಚಿ ಒಂದೇ |

ಜೀವಿಗಳು ಭಿನ್ನರೂಪವಾದರೂ ಒಳಗಿರುವ ಪರಮಾತ್ಮನೊಬ್ಬನೇ ||

ಬದುಕುವ ಜೀವನ ಬೇರೆಯಾದರೂ ನಿಶ್ವಿತ ಮೃತ್ಯು ಒಂದೇ |

ನದಿ ಜಲದ ರುಚಿ ಬೇರಾದರೂ ಸಮುದ್ರ ನೀರು ಉಪ್ಪೇ ||1||

ಒಡಾಡಲು ಕಾಲುಗಳೆರಡಾದರೂ ನಡಿಗೆ ಒಂದೇಕಡೆ |

ನೋಡುವ ಕಣ್ಣು ಎರಡು ಬೇರಾದರೂ ದೃಷ್ಟಿ ಒಂದೇ ||

ದೇವತೆಗಳು ಹಲವಾರು ಇದ್ದರೂ ಪರದೈವನೊಬ್ಬನೇ |

ಅವತಾರರೂಪ ಬೇರೆಯಾದರೂ ಮೂಲರೂಪದ ಶ್ರೀಕೃಷ್ಣವಿಠ್ಠಲನೊಬ್ಬನೇ ||2||

265. ಯಾರು ಆಕಾಶದಲ್ಲಿ ಶಬ್ದ ಇಟ್ಟವರು ? |

ಯಾರು ವಾಯುವಿನಲ್ಲಿ ಸ್ಪರ್ಶವಿಟ್ಟವರು ? ||

ಯಾರು ಅಗ್ನಿಯಲ್ಲಿ ರೂಪ ಇಟ್ಟವರು ? |

ಯಾರು ನೀರಿನಲ್ಲಿ ರಸ ಇಟ್ಟವರು ? ||

ಯಾರು ಪೃಥ್ವಿಯಲಿ ಗಂಧವಿಟ್ಟವರು ? |

ಯಾರು ಚೇತನರಲ್ಲಿ ಚೇತನವಿಟ್ಟವರು ? ||

ಪರಮ ಚೇತನ ಶ್ರೀಕೃಷ್ಣವಿಠ್ಠಲನೇ ಅಲ್ಲವೆ ? ||

266. ಯಾರು ಜೀವಿಗಳಲಿ ಅಷ್ಟಮದವಿಟ್ಟವರು ? |

ಯಾರು ಸಂಸಾರದಿ ಅಭಿಮಾನವಿಟ್ಟವರು ? ||

ಯಾರು ಮನದಿ ಅಹಂಕಾರವಿಟ್ಟವರು ? |

ಯಾರು ದಿವಾ-ರಾತ್ರಿಯಲಿ ಆಯಸ್ಸುಇಟ್ಟವರು ? ||

ಯಾರು ಸೃಷ್ಟ ವಸ್ತುವಿಗೆ ನಾಶವಿತ್ತವರು ? |

ಯಾರು ದೇಶ, ಕಾಲ, ಗುಣ ಬಿಟ್ಟಿರದವರು ? ||

ಪರಮ ಮಹದ್ಬ್ರಹ್ಮ ಶ್ರೀಕೃಷ್ಣವಿಠ್ಠಲನಲ್ಲವೆ ? ||

267. ಎಲ್ಲ ಮೊಡಗಳು ಮಳೆ ಸುರಿಸುವುದಿಲ್ಲ |

ಎಲ್ಲ ವೀರ್ಯಾಣುಗಳಿಂದ ಶಿಶು ಪುಟ್ಟುವುದಿಲ್ಲ ||

ಎಲ್ಲ ಆಶ್ರಮಿಗಳಿಗೆ ಒಂದೇ ತರದ ಯಜ್ಞವಿಲ್ಲ |

ಎಲ್ಲ ಬೀಜಗಳಿಂದ ಉತ್ಕೃಷ್ಟ ಸಸ್ಯ ಹುಟ್ಟುವುದಿಲ್ಲ ||

ಎಲ್ಲ ತಿನ್ನುವುದರಿಂದ ದೇಹಕ್ಕೇ ಹಿತವಿಲ್ಲ |

ಎಲ್ಲ ಕರ್ಮಾಚರಣೆ ಒಂದೇ ಬಗೆಯದಲ್ಲ ||

ಎಲ್ಲ ಕರ್ಮಗಳು ಹರಿ ಪ್ರೀತ್ಯರ್ಥವಾಗುವುದಿಲ್ಲ |

ಕೆಲವು ಮಾತ್ರ ಶ್ರೀಕೃಷ್ಣವಿಠ್ಠಲನ ದಯದಿ ಫಲವೀವುದು ||

268.. ನಮಗೆ ಜಿಹ್ವೆ ಮೂಲಕ ರಸಸ್ವಾದನೆ |

ನಮಗೆ ಕಿವಿಯ ಮೂಲಕ ಶಬ್ದ ಗ್ರಹಣ ||

ನಮಗೆ ನಾಸಿಕದ ಮೂಲಕ ಆಘ್ರಾಣ |

ನಮಗೆ ಕಣ್ಣಿನ ಮೂಲಕ ಮಾತ್ರ ದೃಷ್ಟಿ ||

ನಮಗೆ ಕಾಲಿನಿಂದ ಮಾತ್ರ ನಡಿಗೆ |

ಬೊಮ್ಮಪಿತ ಶ್ರೀಕೃಷ್ಣವಿಠ್ಠಲ ಮಾತ್ರ ಒಂದೇ ಅವಯವದಿ ಸರ್ವಕಾರ್ಯಮಾಡಬಲ್ಲ ||

269.. ಕಣ್ಣಿನಿಂದ ದೃಷ್ಟಿ-ಸೃಷ್ಟಿ |

ಕಣ್ಣಿನಿಂದ ಭಯ-ಲಯ ||

ಕಣ್ಣಿನಿಂದ ಶಾಪ-ಅನುಗ್ರಹ |

ಕಣ್ಣಿನಿಂದ ಹಗಲು-ರಾತ್ರಿ ||

ಕಣ್ಣಿನಿಂದಲ್ಲದೆ ಬೇರೆ ಅಂಗದಿಂದಲೂ |

ಕಣ್ಮಣಿ ಶ್ರೀಕೃಷ್ಣವಿಠ್ಠಲ ಸರ್ವಕಾರ್ಯಮಾಳ್ವ ||

270.. ಸ್ವಾರ್ಥಕ್ಕಾಗಿ ಎಷ್ಟು ಜೀವಿ-ಸಸ್ಯಗಳ ಬಲಿ ಕೊಡುವೆವೋ |

ಸತ್ತು ಹೋಗುವ ಭಯದಿ ಎಷ್ಟು ಪ್ರಾಣಿಗಳ ವಧಿಸುವೆವೋ ||

ಪ್ರತಿ ಹೆಜ್ಜೆ ಕೆಳಗೆ ಎಷ್ಟು ಕ್ರಿಮಿಗಳು ಸಾಯುವವೋ |

ಪ್ರತಿ ಚಪ್ಪಾಳೆಯಲ್ಲಿ ಎಷ್ಟು ಕ್ರಿಮಿಗಳು ಸಾಯುವವೋ ||

ಪ್ರತಿ ಮಾತಿಗೆ ಬಾಯ್ದೆರೆದಾಗ ಎಷ್ಟು ಕ್ರಿಮಿ ಸಾಯುವವೋ |

ಪ್ರತಿ ತುತ್ತಿಗೆ ಎಷ್ಟು ಕ್ರಿಮಿ ನುಂಗುವೆವೋ ||

ಪ್ರತಿ ಉಸಿರಿಗೂ ಎಷ್ಟು ಕ್ರಿಮಿಗಳು ಸಾಯುವವೋ |

ಪ್ರತಿ ಒಂದು ದಿನದ ಬದುಕಿಗೆ ಹತ್ತು ಜನ್ಮವೆತ್ತುವಷ್ಟು ಪಾಪ ||

ಹೊತ್ತು ತಿರುಗುವ ಜೀವಕ್ಕೆ ಮುಕ್ತಿ ಹೇಗೆ ಸಾಧ್ಯ ? |

ಭಕ್ತಿಯ ಶಕ್ತಿಯಿಂದ ಎಲ್ಲಾ ಪಾಪ ಅಳಿವುದು ಶ್ರೀಕೃಷ್ಣವಿಠ್ಠಲ ದಯದಿ ||

271. ಸಿಕ್ಕು ಬಿದ್ದೆನಲ್ಲ ಸಂಸಾರದ ಕೆಸರಲಿ |

ಸಿಕ್ಕ ಸಿಕ್ಕ ದಾರೀಲಿ ತಿರುಗಿ ಇಲ್ಲಿ ಬಂದೆನಲ್ಲ ||

ಸಿಕ್ಕು ಬಿಡಿಸುವುದ್ಹೇಗೆಂದು ಕಾಣದೆ |

ಸಿಕ್ಕಿರುವವರಿಗೆಲ್ಲಾ ಕೇಳಿ ಮೊಸಹೋದೆ ||

ಸಿಕ್ಕ ಸಿಕ್ಕಿದ್ದೆಲ್ಲಾ ಹೇಳಿ ದಾರಿ ತಪ್ಪಿಸಿದರಲ್ಲ |

ಸಿಕ್ಕಷ್ಟೇ ಸಿಗಲಿ ಎಂಬ ಆಸೆಗೆ ಸಿಲುಕಿರುವೆ ||

ಸಿಕ್ಕರೂ ಸಿಗದ ಶ್ರೀಕೃಷ್ಣವಿಠ್ಠಲನೇ ಪಾರುಗೈಸು ||

ಸಹಸಾರ್ಚಿತಸಪ್ತಜಿಹ್ವಸಪ್ತೈಧಾ ಸಪ್ತವಾಹನ | ಅಮೂರ್ತಿರನಘೋಚಿಂತ್ಯೋಭಯಕೃದ್ಭಯನಾಶನ: ||

272.. ತಿಳಿದ ಬುಧರ ಜಿಹ್ವೆಯಾಗಿರುವನ ತಿಳಿಯಲು | (ಪರಮಾತ್ಮ)

ತಿಳಿದ ಸಜ್ಜನರ ಸಮೂಹ ಸೇರಿ || (ಸತ್ಸಂಗ)

ಏಳು ತರದ ಕಟ್ಟಿಗೆ ಒಟ್ಟಿ | (ರೂಪ, ಶಬ್ಧ, ಗಂಧ, ರಸ, ಸ್ಪರ್ಶ, ಸಂಶಯ, ನಿಶ್ವಯ)

ಏಳು ತರದ ಬೆಂಕಿ ಉರಿಸಿ || ( ಇವುಗಳ ಜ್ಞಾನದಿ)

ಏಳು ತರದಿಂದ ಅನುಭವಿಸಿ | (ಅನುಭವ ಜ್ಞಾನದಿ)

ಏಳು ತರದ ಗಾಡಿಯೆಳೆವ || (4 ವೇದ ಮೂಲರಾಮಯಣ, ಮಹಾಭಾರತ, ಪಂಚರಾತ್ರ)

ಏಳು ತರದ ರಥದಿ ಕುಳಿತವ | ( ಉಪಸ್ಥಿತ ಭಗವಂತನ ತಿಳಿಸುವ ಗುರು)

ಗೆಳೆಯ, ದೋಷದೂರ ಆನಂದ |

ಕಳವಳದಿ ಅಭಯ ನೀಡುವನೆಂದು |

ತಿಳಿಸುವ ಅಚಿಂತ್ಯ ಶ್ರೀಕೃಷ್ಣವಿಠ್ಠಲನ ಗುಣಗಳ ||

ಶ್ರೀಮದ್ಭಾಗವತದ ಸರಳ ಅರ್ಥ

273. ತಪವೇ ಶ್ರೀಮದ್ಭಾಗವತ ಸಾರಬೋಧ |

ತಪವೆಂದರೆ ದೀರ್ಘ ಆಲೋಚನೆ, ಚಿಂತನೆ ||

ತಪವೆಂದರೆ ಸತ್ಯತೆಯ ದೀಕ್ಷೆ ಸ್ವೀಕಾರ |

ತಪದಿಂದ ಐಹಿಕ-ಪರಮಾರ್ಥ ಸುಖ ||

ತಪದಿಂಧ ದುಷ್ಟ ಶಕ್ತಿ ನಾಶನ |

ತಪದಿಂದ ಭಗವದ್ ಸಾಕ್ಷಾತ್ಕಾರ ||

ತಪದಿಂದ ಭೋಗಸುಖ, ಮುಕ್ತಿ |

ತಪವೆಂದರೆ ಶ್ರದ್ಧೆ ನಂಬಿಕೆಗಳ ಗೂಡು ||

ತಪವೆಂದರೆ ಅಚಲ ನಿಷ್ಠೆದ್ಯೋತಕ |

ತಪದಿಂದ ಶಾಪ-ಅನುಗ್ರಹ, ಮೋಚಕ ||

ತಪವೆಂದರೆ ಮಾಡುವ ಕೆಲಸದಿ ನಿಷ್ಠೆ |

ತಪವೆಂದರೆ ಪ್ರಾಮಾಣಿಕ ಪ್ರತೀಕ ||

ತಪವೆಂದರೆ ವಚನದಲ್ಲಿ ನಂಬಿಕೆ |

ತಪವೆಂದರೆ ಮಾಡುವ ಕೃತ್ಯದಿ ಪ್ರೀತಿ ||

ತಪವೆಂದರೆ ಹಿರಿಯರ ಮಾತಲಿ ವಿಶ್ವಾಸ |

ತಪವೆಂದರೆ ಗುರುಗಳಲಿ ಶ್ರದ್ಧೆ ||

ತಪವೆಂದರೆ ಅಸಾಧ್ಯ ಸಾಧ್ಯವಾಗಿಸುವುದು |

ತಪ ಮಾಡಲು ಜಾತಿ, ಲಿಂಗ, ವಯಸ್ಸು ಅಭೇಧ ||

ತಪವೆಂದರೆ ಸರ್ವಕಾಲಿಕ ಸರ್ವರ ಉದ್ಧಾರ ಮಾರ್ಗ |

ತಪವೆಂದರೆ ಕೆಲಸದಿ ಸಾಧಿಸಲುಯಶ ||

ತಪವೆಂದರೆ ಜೀವನಸಾರದ ಸತ್ಯ |

ತಪ ಜೀವಿತದಿ ಸಾಧಿಸಿದರೆ ಮುಕ್ತಿಗೆ ಸೋಪಾನ ||

ತಪ ಸಾಧಿಸಿ ಜೀವಿಯ ಸೃಷ್ಟಿಸಿದ |

ತಪ ಸಾಧಿಸಿ ಪ್ರಾಣಿಯಾದರೂ ಮೋಕ್ಷಪ್ರಾಪ್ತಿ ||

ತಪ ಸಾಧಿಸಿದ ಬಾಲಕರಿಗೆ ಪ್ರತ್ಯಕ್ಷನಾದ |

ತಪ ಸಾಧಿಸಿ ಋಷಿ ಲಯ ಅನುಭವಿಸಿದ ||

ತಪದಿಂದ ಭಗವದ್ ಸಂತಾನಪ್ರಾಪ್ತಿ |

ತಪವೆಂದರೆ ಶ್ರೀಮದ್ಭಾಗವತೇ ಸಾಕ್ಷಿ ||

ತಪದಿಂದ ಶ್ರೀಕೃಷ್ಣವಿಠ್ಠಲನಲ್ಲಿ ಸಾಯುಜ್ಯಪ್ರಾಪ್ತಿ ||

274. ತಾಯೇ, ಹರಿಣಾಕ್ಷಿಯೇ ಸ್ಥಿರದಿ ಪೇಳೆ, ಕಾಯಲು ಎನ್ನ ಸದಾ ||ಪ||

ಮಾಯಾಂಗಿನಿ ಪ್ರಪಂಚವ ಮಾಯೆಯಲಿ ಇಟ್ಟವಳೇ ||ಅಪ||

ಮೋಹಿನಿ ರೂಪದಿ ಮರುಳ ಮಾಡಿ ಅಮೃತವಿತ್ತವ |

ಮೋಹ ಹುಟ್ಟಿಸಿ ಬಿಡಿಸುವ ಸಕಲ ಲೋಕಪಾಲಕ ||

ಬಹುವೇಷಧರಿಸಿ ಭಕ್ತರ ಉದ್ಧರಿಸಿ ಸಲಹುವಗೆ |

ಸಹನೆಯಿಂದ ಪಾಪ ಕಳೆದು ಸಾಲೋಕ್ಯದಲ್ಲಿಡಲು ಪೇಳೆ || ||1||

ಸಮುದ್ರ ಮಥನದಿ ಮಂದರಗಿರಿ ಎತ್ತಿದ |

ಮನ್ಮಥಪಿತನವರಿಸಿ ಕ್ಷೀರಸಾಗರದಿ ಕುಳಿತು ||

ಮನ್ಮೋಹಕ ಮುಗುಳುನಗೆ ಬೀರುತ್ತಾ ಪಾದ ಸೇವಿಸುವಳೇ |

ಕರ್ಮಗಳ ಕಳೆದು ಸಾಮಿಪ್ಯದಲ್ಲಿಡಲು ಪೇಳೆ || ||2||

ಸುರಪ್ರಿಯ ಸತ್ಯ ಅನಾದಿ ಜ್ಞಾನ ಮೂರುತಿ |

ಸುರನದಿ ಭುವಿಗೆ ಹರಿಸಿ ಪಾವನಗೊಳಿಸಿ ||

ಊರುವಿನಿಂದ ಅಪ್ಸರೆ ಪುಟ್ಟಿಸಿ ಅಚ್ಚರಿಸಿದ ಯೊಗಿಗೆ |

ಅರ್ಧಾಂಗಿನಿ ಶ್ರೀಕೃಷ್ಣವಿಠ್ಠಲಪ್ರಿಯೆ ಸಾಯುಜ್ಯ ನೀಡಲು ಪೇಳೆ || ||3||

275 ಕರುಣಾಕರ ನೀನಲ್ಲವೆ ? ಧಯಾನಿಧಿ |

ಸರ್ವರಪಾಲಿಪ, ತಂದೆ ಕರುಣಾಕರ ||ಪ||

ಬಂಧನವ ಬಿಡಿಸಯ್ಯಾ ಕರುಣಾಕರ |

ಚೆಂದದಿ ಸಲಹಯ್ಯಾ ಕರುಣಾಕರ ||

ಒಂದೇ ಮನದಿ ಬೇಡಿಕೊಂಬೆ ಕರುಣಾಕರ |

ಮಂದಮತಿಯನುದ್ಧರಿಸೋ ಕರುಣಾಕರ ||1||

ಕಾಲಿಗೆ ಬಿದ್ದೆನಯ್ಯಾ ಕರುಣಾಕರ |

ಪಾಲಿಸೆನ್ನ ಕೈಪಿಡಿದು ಕರುಣಾಕರ ||

ಬಲವಿತ್ತು ಮೇಲೆತ್ತು ಕರುಣಾಕರ |

ಒಲವಿಂದ ನೋಡಯ್ಯಾ ಕರುಣಾಕರ ||2||

ಕೂಸಿನ ಸಂಕಟ ಅರಿಯದೇ ಕರುಣಾಕರ |

ಹೇಸಿಯೆಂದು ತಳ್ಳುವರೇ ಕುರುಣಾಕರ ||

ಎಸಗಿದ ತಪ್ಪು ಮನ್ನಿಸು ಕರುಣಾಕರ |

ಹೊಸ ಶಾಶ್ವತ ಬಾಳುನೀಡು ಶ್ರೀಕೃಷ್ಣವಿಠ್ಠಲ ||ಕರುಣಾಕರ ||3||

276. ಪರಮಾತ್ಮಗೆ ಜ್ಞಾನವೇ ಹೃದಯ |

ಪರಮಾತ್ಮಗೆ ಆನಂದವೇ ಶರೀರ ||

ಪರಮಾತ್ಮಗೆ ಕ್ರಿಯೆಗಳೇ ಆಕಾರ |

ಪರಾತ್ಪರ ಶ್ರೀಕೃಷ್ಣವಿಠ್ಠಲ ಅವಿನಾಶಿ ||

ದಶಾವತಾರದ ಪ್ರಾರ್ಥನಾ ದಶಕ

277. ಭೂಮಿಯನ್ನು ಕಕ್ಷೆಯಲ್ಲಿರಿಸಿದ ವರಾಹನೇ |

ನಮ್ಮ ಭಕ್ತಿ ಕಕ್ಷೆಯಿಂದ ಕಳಚುತ್ತಿದೆ ಉದ್ಧರಿಸು ||1||

ಸಮುದ್ರದಿ ಮುಳುಗುವ ಬೆಟ್ಟ ಅಡಿಯಿಂದೆತ್ತಿದ ಕೂರ್ಮನೇ |

ನಮ್ಮ ಅಕ್ಷಮ್ಯ ಅಪರಾಧ ಬೆಟ್ಟದಿಂದೆತ್ತಿ ಉದ್ಧರಿಸು ||2||

ಕಮಂಡಲದಿಂದ ಬಂದು ಪ್ರಳಯದಲಿ ತೇಲಿಸಿದ ಮತ್ಸನೇ |

ನಮ್ಮ ಮಮಕಾರದಲಿ ತೇಲುತ್ತಿರುವುದ ತಪ್ಪಿಸಿ ಉದ್ಧರಿಸು ||3||

ಒಮ್ಮನದಿ ನಂಬಿದ ಬಾಲಕನ ಅನುಗ್ರಹಿಸಿದ ನರಸಿಂಹನೇ |

ನಮ್ಮ ಕಾಮ, ಕ್ರೋಧಾದಿಗಳನ್ನು ಸುಟ್ಟು ಉದ್ಧರಿಸು ||4||

ಬ್ರಾಹ್ಮಣನಾಗಿ ಬಂದು ಕ್ಷತ್ರಿಯರ ತರಿದ ಪರಶುರಾಮನೇ |

ನಮ್ಮ ಅಹಂಕಾರದ ಹೆಮ್ಮರ ತರಿದು ಉದ್ಧರಿಸು ||5||

ತ್ರಿಮಾತೆಪುತ್ರ ಜಾನಕಿಕಾಂತ ಮಾರುತಿ ಪ್ರಾಣ ಶ್ರೀರಾಮನೇ |

ನಮ್ಮ ಚತುರಾರ್ಥಗಳು ಪರಸೇವೆ ಯಾಗುವಂತೆ ಉದ್ಧರಿಸು ||6||

ಮನ್ಮೋಹಕ ರೂಪನೇ ಯಧು ಕುಲೋದ್ಧಾರಕ ಶ್ರೀಕೃಷ್ಣನೇ |

ನಮ್ಮ ಹೃನ್ಮಂದಿರದಿ ನೆಲಸಿ ಜ್ಞಾನ, ಭಕ್ತಿ ಇತ್ತು ಉದ್ಧರಿಸು |||7||

ಧರ್ಮವ ಉಳುಹಲು ಅಧರ್ಮ ಉಪದೇಶಿಸಿದ ಬುದ್ಧನೇ | ನಮ್ಮ ಜೀವನದ ಕತ್ತಲು ಪರಿಹರಿಸಿ ಉದ್ಧರಿಸು ||8||

ಧರ್ಮಯುದ್ಧಕ್ಕಾಗಿ ಖಡ್ಗಪಾಣಿ, ಹಯವೇರಿದ ಕಲ್ಕಿಯೇ |

ನಮ್ಮ ಬಂಧ ಪಾಶ ಬಿಡಿದಿ ಶ್ರೀಕೃಷ್ಣವಿಠ್ಠಲನಡಿಗೆ ಬೀಳಿಸಿ ಉದ್ಧರಿಸು ||9||

278. ಪರಮಾತ್ಮ ಐಶ್ವರ್ಯಾದಿ ಧರ್ಮಸ್ವರೂಪ |

ಪರಮಾತ್ಮ ಅನಂತ ಶಕ್ತಿ ಸ್ವರೂಪ ||

ಪರಮಾತ್ಮಗಿಲ್ಲ ಲೌಕಿಕ ಆನಂದ ರೂಪ |

ಪರಮಾತ್ಮ ಅಸಂಖ್ಯಾತ ಜ್ಞಾನಾದಿ ಗುಣಪೂರ್ಣ ||

ಪರಮಾತ್ಮ ಸ್ವಾಭಾವಿಕ ಉತ್ತಮೋತ್ತ ಉತ್ತುಂಗ |

ಪರಮಾತ್ಮ ಶ್ರೀಕೃಷ್ಣವಿಠ್ಠಲನೇ ಸರ್ವಪ್ರಣೀತ ||

279. ದೈನ್ಯಕೆ ಸಿಲುಕುವ ದೇವನಲ್ಲನಿವ |

ಚೆನ್ನಾದ ನಿಷ್ಕಲಂಕ ಭಕ್ತಿಗೊಲಿವ ||

ಭಿನ್ನಾಭಿನ್ನ, ಅವ್ಯಕ್ತಾವ್ಯಕ್ತ, ಶೂನ್ಯ ನಾಮಕನಿವ |

ಧ್ಯಾನಕ್ಕೆ ನಿಲುಕುವ ಗುಣಗಳು ಚಿಂತ್ಯಾ ||(ಲಕ್ಷ್ಮೀ, ಬ್ರಹ್ಮರಿಗೆ )

ಅನ್ಯರಿಗೆ ಧ್ಯಾನಿಸಲು ಅಶಕ್ಯಗುಣಗಳೇ ಅಚಿಂತ್ಯಾ (ಇತತರಿಗೆ)

ಮಾನ್ಯ ಶ್ರೀಕೃಷ್ಣವಿಠ್ಠಲನೇ ಚಿಂತ್ಯಾ: ಅಚಿಂತ್ಯಾ: ||

280. ತುಳುಸಿಯ ನಿಜ ಮಂದಿರ ವೃಂದಾವನ |

ತುಳುಸಿಲಿ ನಿತ್ಯ ಶ್ರೀಹರಿ ಸನ್ನಿಧಾನ ||ಪ||

ತುಳುಸಿ ವೃಂದಾವನವಿರೆ ಮನೆ-ಮನ ಶಾಂತಿಸ್ಥಾನ ||ಅಪ||

ಧನ್ವಂತರಿಯ ಅಶ್ರುಬಿಂದುಲಿ ಜನಿಸಿದಳು ರೂಪಮತಿ |

ಸರ್ಮ ಪುಪಷ್ಪಗಳಾರ್ಪಣೆ ಫಲ ತುಳುಸಿ ಅರ್ಪಿಸಲಹುದು ||

ದೇವಿ ಜಾಂಬುವತಿ ತುಳಸಿ ರೂಪದಿ ಹರಿಸೇವಿಪಳು |

ಸರ್ಮ ಸಾಧನೆ ಇದ್ದು ತುಳುಸಿ ಇಲ್ಲದ ಪೂಜೆ ಹರಿ ಕೊಳ್ಳನೋ ||1||

ದುರಿತ ಕಳೆದು ದರುಶನದಿ ಫಲವೀವಳು ನಿಶ್ಚಯ |

ಸರ್ವ ಹತ್ಯೆಯ ಪಾಪ ಕಳೆದು ಗೋದಾನ ಪುಣ್ಯ ಲಭ್ಯ ||

ತೀರ್ಥಾಭಿಮಾನಿಗಳು ಮೂಲದಿ, ಮಧ್ಯೆ ಸರ್ಮದೇವತೆಗಳವಾಸ |

ಅಗ್ರಭಾಗದಿ ಸರ್ವವೇದಾಭಿಮಾನಿಗಳಿದ್ದು ಅಭೀಷ್ಟೆ ಪೂರೈಪರು ||2||

ತುಳಸಿ ನಿಂದಿಸಿದವರೆಲ್ಲಾ ಜಗದಿ ನಿಂದ್ಯರಾಗುವರು |

ತುಳಸಿ ವಂದಿಸಿದವರೆಲ್ಲಾ ಸುರ-ನರ ವಂದ್ಯರಾಗುವರು ||

ತಿಳಿದ ಸಜ್ಜನರು ನಿತ್ಯದಿ ಪೂಜಿಸಲು ಪಾಪ ಪರಿಹಾರ |

ತುಳಸಿಸಹಿತ ಶ್ರೀಕೃಷ್ಣವಿಠ್ಠಲನಂಘ್ರಿ ಪೂಜಿಸೆ ಇಹ-ಪರದಿ ಸೌಖ್ಯ ||3||

281. ಇದ್ದಾಗ ಇಲ್ಲದ ಚಿಂತೆ, ಇಲ್ಲದಾಗ ಇರುವುದರ ಚಿಂತೆ |

ಎದ್ದಾಗ ಬೀಳುವ ಚಿಂತೆ ಬಿದ್ದಾಗ ಏಳುವ ಚಿಂತೆ ||

ಉಂಡು ಅಜೀರ್ಣವಾದಾಗ ಉಪವಾಸದ ಚಿಂತೆ, ಉಪವಾಸದಿ ಊಟದ ಚಿಂತೆ |

ನಿದ್ದೆಯಿದ್ದಾಗ ಎಚ್ಚರದ ಚಿಂತೆ, ಎಚ್ಚರದಿ ನಿದ್ದೆ ಚಿಂತೆ ||

ಸದ್ದು ಜೋರಾದಾಗ ನಿಶಬ್ದದ ಚಿಂತೆ, ನಿಶಬ್ದವಾದಾಗ ಶಬ್ದದ ಚಿಂತೆ |

ಇದ್ದರೂ ಹೆರವರ ವಸ್ತು ಕದಿಯುವ ಚಿಂತೆ, ಕದ್ದಮೇಲೆ ಉಳಿಸುವ ಚಿಂತೆ ||

ಇದ್ದೂ ಇಲ್ಲದಂತಿರಬೇಕೆಂಬ ಅರಿವಿನ ಚಿಂತೆ ಅನುಗಾಲಕೂ ಚಿಂತೆ |

ಹೊದ್ದ ಆಸೆಯ ಹೊದಿಕೆ ಸರಿಯದೆ, ಮುಗಿಯದಿರುವ ಚಿಂತೆ ||

ಒದ್ದಾಡುತ್ತಾ ಗುದ್ದು ತಿಂದು ಪೆದ್ದನಂತೆ ಜೀವನ ಗತಿಸಿದರೂ |

ಚಿದ್ದೇಹ ಮುದ್ದು ಶ್ರೀಕೃಷ್ಣವಿಠ್ಠಲನ ಚಿಂತೆ ಬರುವುದೇ ?||

ಧರ್ಮಚಕ್ರಸಾರ

282. ಚಕ್ರ, ಚಕ್ರ ಧರ್ಮಚಕ್ರ ತಿರುಗುತಲೇ ಇರುವುದು |

ಧರ್ಮಚಕ್ರ ಯುಗಯುಗದಿ ತಿರುಗುತಲೇ ಇರುವುದು ||

ಯಾರೂ ತಿರುಗಿಸದಿದ್ದರೂ ಅದು ತಿರುಗುತಲೇ ಇರುವುದು |

ಚಕ್ರ ಸುಖದಿ ತಿರುಗಲು ಮಾನವರೆಲ್ಲ ಶ್ರಮಿಸಬೇಕು ||

ಸೂತ್ರದಿ ಪೋಣಿಸಿದ ಮಣಿಯಂತೆ ಸರ್ವರೂ ಜೀವನಿಯಮಬದ್ಧರು |

ಸರಳದಿ ತಿರುಗಲು ಸಹಬಾಳ್ವೆಯಲಿ ಔದಾರ್ಯಬೇಕು ||

ಸರ್ವರೂ ಯಜ್ಞ, ದಾನ, ತಪೋವಂತರಾಗಬೇಕು |

ಚಕ್ರಕಾಲ ಕಾಲದಿ ಬದಲಿಸಿದರೂ ಧ್ಯೇಯ ಒಂದೇ ಇರಬೇಕು ||

ವರ್ಜಿಸಿ ಕಾಮಕ್ರೋಧಗಳ ಇನ್ನೊಬ್ಬರ ಕಷ್ಟಕೆ ಒದಗಬೇಕು |

ಸ್ವಾರ್ಥಿಯಾಗದೇ ಪ್ರಿತಿ, ದಯೆ, ಶಾಂತಿ ಉಸಿರಾಗಿಸಬೇಕು ||

ಬರೀ ನಾವು ಸುಖಿಸಿದರೆ ಸಾಲದು ಬೇರೆಯವರನ್ನೂ ಸುಖಿಯಾಗಿಸಬೇಕು |

ಬರುವವರಿಗೆ ಸುಖ ಜೀವನದ ಭದ್ರತೆ ಕಲ್ಪಿಸಿ ಹೋಗಬೇಕು ||

ದಾರಿದ್ರ್ಯ, ನೆಲ, ಜಲ, ಆಹಾರ ಕ್ಷಾಮಕೆ ಕಾರಣವಾಗಬಾರದು |

ಆರೋಗ್ಯ, ಸುಖದ ವಾತಾವರಣ ಸಾಧಿಸಿ, ಉಳಿಸುವ ಕಾರ್ಯಸಾಧಿಸಬೇಕು ||

ಸರ್ವರೂಪ ಸುಖದ ಸೂತ್ರ ಅಳವಡಿಸಿ ಮುಂದಿನವರಿಗೆ ಕೊಡಬೇಕು |

ಧರ್ಮದ ಮರ್ಮವೇ ನಿಜ ಜೀವನದ ಸುಖದ ಸಾರ ||

ಧರ್ಮ ಚಕ್ರದ ರೂವಾರಿ ಶ್ರೀಕೃಷ್ಣವಿಠ್ಠಲನಲಿ ನಿಜಭಕ್ತಿ ಬೆಳೆಸಬೇಕು ||

283. ಬ್ರಹ್ಮಾಂಡದಿ ಸಣ್ಣ ಕ್ರಿಯೆ ಹಿಂದೆ ಎಷ್ಟೊಂದು ಕ್ರಿಯೆ ಅಡಗಿವೆ |

ಅಹಂಕಾರದಿ ನಾ ಮಾಡಿದೆ ಎನ್ನುವರಿಗೆ ಏನು ಗೊತ್ತು ? ||

ಬಹು ಜೀವರ ಶ್ರಮದಿಂದ, ಬಹು ಜನ್ಮದ ಪುಣ್ಯದಿಂದ ಸಾಧಿಸುವುದು |

ಬಹು ಜನರ ಕ್ಷೇಮಕ್ಕಾಗಿ ನಿ:ಸ್ವಾರ್ಥದಿ ಪ್ರಾರ್ಥಿಸಬೇಕು ||

ಬಹು ಜನ ಶೂಶ್ರುಷ ಮಾನವ ಜನ್ಮದ ಸಾರ್ಥಕತೆ |

ಇಹದ ಶಾಂತಿ, ಪ್ರೀತಿ ಇದರಲ್ಲೇ ಹುದುಗಿದೆ ||

ಸಹಬಾಳ್ವೆ ಮಹಿಮೆಯ ಗುಟ್ಟು ಇದರಲ್ಲೇ ಇದೆ |

ದೇಹದ ಪ್ರತೀ ಕ್ರಿಯೇ ತತ್ವಾಭಿಮಾನಿ ದೇವತೆಗಳಿಂದ ನಡೆವುದು ||

ದೇಹದ ಸುಸ್ಥಿತಿಯೂ ಬಹು ಇಂದ್ರಿಯಗಳ ಪರಿಶ್ರಮದ ಫಲ |

ಮಹತ್ವ ತಿಳಿದು ಬಳಿದರೆ ಇಹ-ಪರದಿ ಆಗುವುದು ಸೌಖ್ಯ ||

ಅಹೇಯ ಶ್ರೀಕೃಷ್ಣವಿಠ್ಠಲನೊಬ್ಬನೇ ಪರಿಶ್ರಮರಹಿತ ಸರ್ವಕರ್ತೃ ||

284. ಸುವ್ಯವಸ್ಥಿತ ಸೃಷ್ಟಿ, ನಿಯಾಮಕರು ಯಾರಿಹರು |

ಸುವ್ಯವಸ್ಥಿತ ಜಗತ್ತಿನ ವ್ಯವಸ್ಥೇಲಿ ಯಾರ ಕೈವಾಡ ||

ಸುವ್ಯವಸ್ಥಿತ ಕಾಲಚಕ್ರ ಯಾರು ಉರುಳಿಸುವರು |

ಸುವ್ಯವಸ್ಥಿತ ಜನ ಜೀವನ ಚಕ್ರ ಯಾರ ತಿರುಗುವಿಕೆ ||

ಸುವ್ಯವಸ್ಥಿತ ಪಿಂಡಾಂಡದ ರಚನಾಕಾರ ಯಾರಿಹರು |

ಸುವ್ಯವಸ್ಥಿತದಿ ಪಂಚೇಂದ್ರಿಯಗಳ ಕಾರ್ಯ ನಿರ್ಧರಿಸುವರು ಯಾರು ||

ನವ್ಯತೆಯ ಭವ್ಯತೆ ಜೀವಿಗಳಿಗೆ ಉಣಿಸುವರು ಯಾರು |

ಅವ್ಯಯ ನಮ್ಯ ಶ್ರೀಕೃಷ್ಣವಿಠ್ಠಲದ್ದೇ ಈ ಅಚಿಂತ್ಯಾಧ್ಬುತ ಕ್ರಿಯೆ ||

285. ಕೊಡಪಾನ ಒಡೆಯುವುದೆಂದು ಕೊಳ್ಳದೆ ಬಿಡುವರುಂಟೆ | (ಮಾನವಜನ್ಮ)

ಬಿಡಬೇಕಾದಿತು ಹೊರಗೆ ಉಸಿರೆಂದು ಒಳಗೆಳೆಯದಿರುವರೆ ? ||

ಗಡಿಬಿಡಿ ಜೀವನದಿ ಓಡಾಡದೆ ಕುಳಿತಿದ್ದರೆ ನಡೆವುದೆ ? | (ಜ್ಞಾನಾರ್ಜನೆ)

ನಡೆವವ ಎಡವುನಲ್ಲದೆ ಮಲಗಿದವ ಎಡುವುವನೇ ? || (ಪಾಪಕ್ಕೆ ಹೆದರಿ ಪುಣ್ಯಕರ್ಮ- ಬಿಡುವರೆ)

ಬಿದ್ದರೆ ಎತ್ತುವ ಒಡೆಯ ಶ್ರೀಕೃಷ್ಣವಿಠ್ಠಲನಿರೆ ಚಿಂತೆ ಯಾಕೆ ? ||

286. ಹಡೆದ ತಾಯ್ತಂದೆಯರ ಬಿಟ್ಟು ಗೋಕುಲಕೆ ನಡೆದೆ |

ಪಡೆದ ತಾಯ್ತಂದೆಯರ ಬಿಟ್ಟು ಮಥುರೆಗೆ ಪೋದೆ ||

ಮಡಿಕೆ ಒಡೆದು ಗೋಪಿಯರ ಕಾಡಿ ಆನಂದಿಸಿದೆ |

ಗಡಿಗೆ ಹಾಲು-ಬೆಣ್ಣೆ ಮೆದ್ದು ಗೋಪಿಯರ ತೊರೆದೆ ||

ಒಡನಾಡಿಗಳಾದ ಗೋಪಾಲಕರ ಒಡನಾಟ ತೊರೆದೆ |

ಚೆಂಡಾಡಿ ದುಷ್ಟರ ಶಿರಗಳ ಭೂಭಾರ ಇಳುಹಿದೆ ||

ಒಡನೆ ಆಸಕ್ತಿಯಲಿ ನಿರಾಸಕ್ತಿ ಬೋಧಿಸಿದೆ |

ಕೂಡಲೇ ಹಚ್ಚಿಕೊಂಡಿದ್ದು ಬಿಚ್ಚುಕೊಳ್ಳಲು ಹೇಳಿದೆ ||

ಕೂಡಿಟ್ಟದ್ದು ಪರರಿಗೆ ಕೊಟ್ಟಿದ್ದು ತನಗೆ ಎಂದೆ |

ಮಾಡದೆ ಕರ್ಮಫಲಪೇಕ್ಷೆ ಸಮರ್ಪಿಸು ಎಂದೆ ||

ಕಡೆಗೆ ಮಣ್ಣಿನಿಂದ ಹುಟ್ಟಿ ಮಣ್ಣಾಗುವ ದೇಹದ ಮೋಹ ತೊರೆಎಂದೆ |

ನಡೆದಂತೆ ನುಡಿದೆ ನುಡಿದಂತೆ ನಡೆದೆ ||

ಪದ್ಮಪತ್ರದಂತೆ ಸಂಸಾರದಲ್ಲಿದ್ದು ಪಯಣಿಸು ಎಂದೆ |

ಪದುಮನಾಭ ಶ್ರೀಕೃಷ್ಣವಿಠ್ಠಲ ದಯಾಂಬುಧೇ ಶರಣೆಂಬೆ ತಾರಿಸೆನ್ನ ||

287. ಪ್ರಸನ್ನ ಸುಂದರ ಮೂರುತಿ ಯಾರೆಂದು ಪೇಳಲಿ |

ಪ್ರಸಿದ್ಧನಿವ ಸುಜ್ಞಾನವಂತ ಪಸರಿಸಿಹನೆಲ್ಲಡೆ ಇಹ-ಪರದಿ ||ಪ||

ತ್ರೇತಾಯುಗದಿ ಆಂಜನೇಯನಾಗಿ |

ಮತ್ತೆ ದ್ವಾಪರದಿ ಬಲಭೀಮನಾಗಿ ||

ಇತ್ತ ಕಲಿಯುಗದಿ ಮಧ್ವರಾಗಿ |

ಸತತ ರಾಮ ಕೃಷ್ಣ, ವ್ಯಾಸರ ಸೇವಿಸುವ ||1||

ಹುಟ್ಟುತಲೆ ಸೂರ್ಯನೆಡೆಗೆ ಜಿಗಿದ |

ಮುಷ್ಟಿಯಲಿ ಬಂಡೆ ಪುಡಿ ಮಾಡಿದ ||

ಮೆಟ್ಟಿ ಶಿರ ಅಸುರರ ಭಂಜಿಸಿದ |

ಪುಟ್ಟ ಪೋರ ಧೀರ ಹನುಮಂತ ||2||

ಪಂಚರೂಪದಿಂದಿಹ ಮುಖ್ಯಪ್ರಾಣ |

ಕಿಂಚಿತ್ ಅಪಶಬ್ದ ನುಡಿಯನೆಂದು ||

ಮುಂಚೆ ಮಾಡಿದ ಸಂಚಿತಾರ್ಥ ಕಳೆವ |

ಸಚ್ಚಿದಾನಂದಾತ್ಮಗೆ ಪೇಳಿ ಮೆಚ್ಚಿಸುವ ||3||

ಪ್ರತಿ ಶ್ವಾಸದಿ ಚೇತನ ಪುರೈಸುವ |

ಪ್ರತಿ ಇಂದ್ರಿಯಗಳಲ್ಲಿದ್ದು ಪ್ರೇರಕನಾಗಿಹ ||

ಪ್ರತಿಷ್ಠ ಜೇಷ್ಠ ಶ್ರೇಷ್ಠ ವರಿಷ್ಠ |

ವಾತಾತ್ಮಜ ವಾನರ ಮುಖ್ಯನಿವ ||4||

ಸ್ವಾಮಿ ಕಾರ್ಯ ಸ್ವಕಾರ್ಯದಂತೆ ಮಾಳ್ಪ |

ಕಾಮಿಸಿ ಭಕ್ತಿ, ಮುಕ್ತಿಯ ಬೇಡನೆಂದೂ ||

ಸುಮ್ಮಾನದಿ ಸಹಭೋಗ ಸುಖ ಉಂಬ |

ಹೆಮ್ಮೆಯಲಿ ರಾಮದೂತನೆನಿಸಿಕೊಂಬ ||5||

ಹಾರಿ ಬರುವ ಎಲ್ಲಿ ನೆನೆದರಲ್ಲಿ |

ಬರದಂತೆ ಆಪತ್ತು ಕಾಯ್ವ ||

ವರವಿತ್ತು ಸತತ ಸಲಹುವ |

ಚಿರಂಜೀವಿ ಇವ ಭಕ್ತಿಗೆ ಒಲಿವ ||6||

ಇವನಿಂದ ಗ್ರಹಬಾಧೆ ತಪ್ಪುವುದು |

ಇವನಿಂದ ಜೀವನದಿ ಸಾಮರಸ್ಯ ||

ಇವನನು ಗ್ರಹದಿ ಸರ್ವವಿಜಯ ನಿಶ್ಚಿತ |

ಇವನೊಲಿದರೆ ಪರಮಾತ್ಮ ಒಲಿವ ||7|||

ಅಣುವಾಗುವ ತಾ ಮಹತ್ತಾಗುವ |

ಗುಣವಂತ ಬಲುಧೀಮಂತ ||

ವರ್ಣನೆಗೂ ನಿಲುಕದ ಪುಣ್ಯವಂತ |

ಚಿನ್ಮಯ ಶ್ರೀಕೃಷ್ಣವಿಠ್ಠಲನ ಪರಮಪ್ರಿಯನಿವ ||8||

288. ಕ್ಷಮಿಸು ಹನುಮಯ್ಯ, ನಿನ್ನಯ್ಯನ ಖ್ಯಾತಿ ಬಲ್ಲೆಯಾ |

ಹೆಮ್ಮೆಯಲಿ ಒಮ್ಮೊಮ್ಮೆ ಭಕುತರ ಎತ್ತಿತೋರುವನಯ್ಯಾ ||

ಪುಟ್ಟ ಬಾಲಕನ ದಿಟ್ಟ ಭಕುತಿಗೆ ಒಲಿದ ಸ್ಥಂಭೋದ್ಭವ |

ಕೆಟ್ಟ ಪಿತನ ಸೊಕ್ಕು ಮುರಿದು ಅಂತ ಕಾಣಿಸಿದ ||

ಕೊಟ್ಟ ಮಾತಿನಂತೆ ಅರಣ್ಯಕೆ ತೆರಳಿ ಹೆಣ್ಣನುದ್ಧರಿಸಿದ |

ಕೆಟ್ಟದಾಗಿ ಹೆಣ್ಣಿಗಾಗಿ ಪ್ರಲಾಪಿಸಿ ಯುದ್ಧದಿ ಅಸುರರ ತರಿದ ||1||

ಕೊಟ್ಟ ಉಂಗುರ ಮುಟ್ಟಿಸಿದಕ್ಕಾಗಿ ಸಹಭೋಗವಿತ್ತ ಸಂತಸದಿ |

ಸೃಷ್ಟಿ-ಲಯ ಭ್ರೂಕುಣಿತದಿ ಮಾಡುವಗೆ ಇನ್ನೊಬ್ಬರ ನೆರವು ಬೇಕೆ ? ||

ಮೀಟುತ ತಂಬೂರಿ ನಾರಾಯಣ ಎನ್ನುತ ನಾರದರಲ್ಲಿ ಬರಲು |

ತಟ್ಟನೆ ಅನಾರೋಗ್ಯದ ಸೋಂಗುಹಾಕಿ ಉರುಳಿ ಉರುಳಿ ನರಳಿದ ||2||

ಸ್ಪಷ್ಟ ಪರಿಹಾರವಿದಕೆ ಭಕುತರ ಪಾದಧೂಳಿ ಪರಮೌಷಧವೆಂದ |

ಎಷ್ಟೂ ತಡಮಾಡದೆ ಪಟ್ಟದರಸಿರೆಡೆಗೆ ಬಂದುಪಾದಧೂಳಿ ಬೇಡಲು |

ಕೊಟ್ಟು ಪಾದಧೂಳಿ ಸ್ವಾಮಿಗೆ ಅಪಚಾರವೆಸಗೆವು ಎಂದರೆಲ್ಲ |

ಒಟದಿ ವ್ರಜಕೆ ಬಂದು ಗೋಪಿಯರನೆ ದೈನ್ಯದಿ ಬೇಡಿದರು ||3||

ಕೊಟ್ಟರೆಲ್ಲ ತಮ್ಮ ಪಾದಧೂಳಿ ಬೇಗಹೋಗಿ ಪೂಸಿರೆಂದರು |

ತಟ್ಟದೆ ಹೋದಿತೆ ಪಾಪ, ನರಕ ಭಯ ನಿಮಗಿಲ್ಲವೆ ? ಎನ್ನಲು ||

ಎಷ್ಟೋ ಜನುಮದಿ ಪಾಪಮಾಡಿ ನರಕ ಅನುಭವಿಸಿಲ್ಲವೆ ? ಈಗ ಪುಣ್ಯಮಾಡಿ ಅನುಭವಿಸುವೆವು |

ಕಷ್ಟ ಕಳೆದು ಸ್ವಾಮಿ ಬೇಗ ಗುಣವಾಗಲೆಂದು ಹಾರೈಸಿ ಬೀಳ್ಕೊಟ್ಟರು ||4||

ಮೃತ್ತಿಕಾ ಲೇಪನದಿ ಆರೋಗ್ಯವಾದಂತೆ ನಟಿಸಿದ ಕಪಟನಾಟಕಧಾರಿ |

ಪಟ್ಟ ಮಹಿಷಿಯರಿಗಿಂತ ಗೋಪಾಂಗನೆಯರ ಭಕ್ತಿ ಮೇಲೆಂದು ತೋರಿದ ||

ದೃಷ್ಟಿಯಿಂದ ದುಷ್ಟಸೈನ್ಯ ಸಂಹರಿಸಿ ಪಾರ್ಥಗೆ ಕೀರ್ತಿಯಿತ್ತಂತೆ |

ಶಿಷ್ಟಭಕ್ತ ವತ್ಸಲ ಶ್ರೀಕೃಷ್ಣವಿಠ್ಠಲನ ಲೀಲೆ ಅಚಿಂತ್ಯಾದ್ಭುತ ||5||

ಹಗ್ಗದಿಂದ ಬಿಗಿದ ದೋಣಿ ಹೊತ್ತವನೆ ನಿನ್ನ ಪಾದಪದ್ಮತೋರೋ ||