ಡಾ ನರಸಾಪೂರ & ಪರಿವಾರ

ಶ್ರೀ ಕೃಷ್ಣವಿಠ್ಠಲಪದಗುಚ್ಛ 3 ಅನುಕ್ರಮಣಿಕಾ

314. ಬಾಯ್ತೆರೆದು ಹರಿ ನಾರಾಯಣ, ಗೋವಿಂದ ಎನೆ |

ಎತ್ತರಕೆ ಏರಿಸುವುದು ಎಲ್ಲರ ದೃಷ್ಟಿಯಲಿ ||

ಗುಪ್ತವಾಗಿ ತುಟಿಯಲಿ ಶ್ರೀರಾಮನ ಜಪಿಸಲು ಆರಾಮ | (ಉಪಾಂಶು)

ನಿತ್ಯದಿ ಶ್ರೀಕೃಷ್ಣವಿಠ್ಠಲನ ಮನದಿ ನೆನೆಯೆ ಮುಕ್ತಿಪ್ರದಾಯಕ ||

315. ಸತತ ಮಾಡಲು ಪರಮಾತ್ಮನ ನಾಮೋಚ್ಚಾರ |

ಪ್ರತಿ ಉಸಿರಿಗೊಮ್ಮೆ ಉಚ್ಚರಿಸೆ ದೇಹ ಶುದ್ಧಿಯಲಿ ||

ಚಿತ್ತ ಶುದ್ಧಿಯೂ ಮಾಳ್ಪ ಸಕಲ ಪಾಪ ಪರಿಹಾರದಿ |

ಸ್ತುತ್ಯ ಶ್ರೀಕೃಷ್ಣವಿಠ್ಠಲ ಒಲಿದು ಅನುಗ್ರಹಿಪ ಸರ್ವಸಿದ್ದಿ ||

316. ಸಾವು ನಿಶ್ವಿತ, ಹುಟ್ಟಿದ್ದು ಸಾಯಲೇಬೇಕು |

ಹಾವು ಮೈಮೇಲೆ ಹರಿದಂತೆ ಭಯವೇಕೆ ? ||

ನೋವಿಗಂಜಿದೊಡೆ ಸಾವು ತಪ್ಪವುದೆ ? |

ಸಾವು ದೇಹ ಕಷ್ಟೇ, ಆತ್ಮ ಅಮರ ಸದಾ ||

ಯಾವ ವಿಧದಿ ಬಂದರೂ ದು:ಖಿಸುವದೇಕೆ |

ಕಾವುದಮ್ಮನು ತಪ್ಪದೇ ಶ್ರೀಕೃಷ್ಣವಿಠ್ಠಲನ ಕೃಪೆ ||

317. ಭಿಕ್ಷೆಯಿಂದ ಬಂದ ಜೀವನ ಕಳೆವವರೆಷ್ಟೋ |

ರಕ್ಷೆ ಇಲ್ಲದೆ ಹಾಳಾಗಿ ಕೆಟ್ಟ ಹಾದಿ ಹಿಡಿವವರೆಷ್ಟೋ ||

ಸಾಕ್ಷಿ ಇಲ್ಲವೆಂದು ತಿಳಿದು ಕುಕರ್ಮ ಮಾಡುವವರೆಷ್ಟೊ |

ಭಕ್ಷಣೆಗಾಗಿ ನಿಷಿದ್ಧ ಅನ್ನ ಸೇವಿಸುವವರೆಷ್ಠೋ ||

318 ಕುಕ್ಷಿಗಾಗಿ ಜಗದೊಳು ಅಳುವವರೆಷ್ಟೋ |

ಸೊಕ್ಕಿನಿಂದ ಅನ್ನಹಾಳು ಮಾಡುವವರೆಷ್ಟೋ ||

ದಾಕ್ಷಿಣ್ಯದಿ ಆಹಾರವಿತ್ತು ಸಲುಹುವವರೆಷ್ಟೋ |

ದಕ್ಷ ಶ್ರೀಕೃಷ್ಣವಿಠ್ಠಲ ನಿನ್ನಂತೆ ಹೊಟ್ಟಿಗಿತ್ತು ಸಲುಹುವರ ನಾ ಕಾಣೆ ಎಲ್ಲೂ ||

319. ಎನ್ನ ಆನಂದ ಕೃಷ್ಣಯ್ಯಾ | ಎನ್ನ ಚೇತನ ಕೃಷ್ಣಯ್ಯಾ ||

ಎನ್ನ ಮುದ್ದು ಕೃಷ್ಣಯ್ಯಾ | ಎನ್ನ ಮಹಾದೇವ ಕೃಷ್ಣಯ್ಯಾ ||

ಎನ್ನ ತಾಯಿ ಕೃಷ್ಣಯ್ಯಾ | ಎನ್ನ ತಂದೆ ಕೃಷ್ಣಯ್ಯಾ ||

ಎನ್ನ ಬಂಧು ಕೃಷ್ಣಯ್ಯಾ | ಎನ್ನ ಬಳಗ ಕೃಷ್ಣಯ್ಯಾ ||

ಎನ್ನ ಹಬ್ಬ ಕೃಷ್ಣಯ್ಯಾ | ಎನ್ನ ಹರಿದಿನ ಕೃಷ್ಣಯ್ಯಾ |

ಎನ್ನ ವ್ರತ-ನೇಮ ಕೃಷ್ಣಯ್ಯಾ | ಎನ್ನ ತೀರ್ಥಯಾತ್ರೆ ಕೃಷ್ಣಯ್ಯಾ ||

ಎನ್ನ ವಿದ್ಯೆ ಕೃಷ್ಣಯ್ಯಾ | ಎನ್ನ ಧನ ಕೃಷ್ಣಯ್ಯಾ ||

ಎನ್ನ ಶಾಸ್ತ್ರ ಕೃಷ್ಣಯ್ಯಾ | ಎನ್ನ ಶ್ರವಣ ಕೃಷ್ಣಯ್ಯಾ ||

ಎನ್ನ ಜೀವ ಕೃಷ್ಣಯ್ಯಾ | ಎನ್ನ ಜೀವನ ಕೃಷ್ಣಯ್ಯಾ ||

ಎನ್ನ ಆತ್ಮ ಕೃಷ್ಣಯ್ಯಾ | ಎನ್ನ ಪರಮಾತ್ಮ ಕೃಷ್ಣಯ್ಯಾ ||

ಎನ್ನ ಉಸಿರು ಕೃಷ್ಣಯ್ಯಾ | ಎನ್ನ ಉದ್ಧಾರಕರ್ತ ಕೃಷ್ಣಯ್ಯಾ ||

ಎನ್ನ ಜ್ಞಾನ ಕೃಷ್ಣಯ್ಯಾ | ಎನ್ನ ಭಕುತಿ ಕೃಷ್ಣಯ್ಯಾ ||

ಎನ್ನ ಶ್ರೀಕೃಷ್ಣವಿಠ್ಠಲನೇ | ಎನ್ನ ಸರ್ವಸ್ವ ಕೃಷ್ಣಯ್ಯಾ ||

ಸ್ವಪ್ನ ದರುಶನ

320. ದರ್ಶನ ಪಡೆಯಲು ಸ್ವಪ್ನದಿ ಅನಂತೇಶ್ವರ ಸನ್ನಿಧಿಗೆ ಪೊಗಲು |

ಆಶ್ಚರ್ಯವಾಯಿತು ಪೌಳಿಯಲಿ ಕುಳಿತ ಗುರುಗಳ ಕಂಡು ||

ಆಶೀರ್ವಾದ ಪಡೆಯಲು ಪೋಗಿ ನಮಸ್ಕರಿಸಲು |

ವೀಕ್ಷಿಸಿ ಕೇಳಿದರು ಪರಮಮಂಗಳನ ಕಥೆಯಲಿ ||

ವಿಶೇಷ ಪ್ರಸಂಗ ಯಾವುದಿದೆ ಪೇಳೆನಲು |

ಅಕ್ಷಯಪಾತ್ರೇಲಿ ಪಡೆದ ಕಥಾಭಾಗ ಪ್ರಿಯವೆನಗೆನಲು ||

ಹರ್ಷದಿ ಎನಗೂ ಅದು ಪರಮ ಪ್ರಿಯವೆಂದು ಹೇಳಿ |

ಆಶೀರ್ವಾದದಿ ಇತ್ತು ಫಲಮಂತ್ರಾಕ್ಷತೆ ಹರಿಸಿದರು ||

ಸಾಕ್ಷಾತ್ ಗುರುಗಳಂತರ್ಗತ ಮಾಡಿದ ಪರಮಾನುಗ್ರಹವಿದು |

ದಶದಿಕ್ಕುಗಳಿಂದ ಮನದಿ ಹೃತ್ಪೂರ್ವಕ ನಮನಗಳು ||

ವಿಶ್ವೇಶ ಶ್ರೀಕೃಷ್ಣವಿಠ್ಠಲಗೇ ಪುನ: ನಮೋನಮ: ||

321. ಉಲ್ಲಾಸತೆಯಲಿ ಕೊಳಲು ನುಡಿಸಿದರೆ |

ಗೊಲ್ಲತಿಯರು ನೀವೆಲ್ಲ ಓಡಿ ಬರುವುದುಚಿತವೇ ? ||

ಕೆಲಸ- ಕಾರ್ಯಗಳು ನಿಮಗಿಲ್ಲವೆ ಸದನದಿ |

ಕೈಲಿದ್ದ ಕೆಲಸ ಅರ್ಧಕೆ ಬಿಟ್ಟು ಹೀಗೆ ಬರುವರೆ ? ||

ಒಲವಿನ ಪತಿ-ಸುತರು, ಅತ್ತೇ ಮಾವ ನಿಮಗಿಲ್ಲವೆ ? |

ಬಲು ಸೋಜಿಗ ರಾತ್ರೀಲಿ ಒಂಟಿಯಾಗಿ ಬರುವುದೇ ? ||

ಪೇಳುವೆನು ನಿಮ್ಮ ಒಳ್ಳೆಯದಕ್ಕೆ ಈಗಲೇ ಹಿಂತಿರುಗಿರಿ |

ಗೊಲ್ಲ ಬಾಲ ಲೊಕಾನು ರೂಢಿಯ ಮಾತನಾಡಿದ ||

ಸೊಲ್ಲ ಕೇಳಿ ಗೋಪಿಯರ ಹೃದಯ ತಲ್ಲಣಿಸಿತು |

ಜಲ ತುಂಬಿದ ನಯನದಿ ಗದ್ಗದಿತರಾದರು ||

ಕುಲಟೆಯರು ನಾವೆಲ್ಲ ದುಷ್ಟ ಕಾಮನೆ ಎಮಗಿಲ್ಲ |

ಒಲವಿನ ಪತಿ-ಸುತ, ಅತ್ತೆ-ಮಾವರೆಲ್ಲ ಎಮಗಿಹರು ||

ಎಲ್ಲ ಇವರು ಈ ಜನುಮದ ಪತಿ-ಬಾಂಧವರು |

ಕಳೆದ ಜನುಮದಿ ಶತ್ರು-ಮಿತ್ರ, ಪುತ್ರ-ಕಳತ್ರ ಏನಾಗಿದ್ದರೋ ||

ಬಲವಂತದಿ ಎಮ್ಮನು ಸಂಸಾರ ಚಕ್ರಕ್ಕೆ ಏಕೆ ಸಿಗಿಸುವಿ ? |

ಕಾಲುಗಳು ನಿನ್ನತ್ತಲೇ ಚಲಿಸುವುದು, ಮನ ನಿನ್ನಲ್ಲೇ ನೆಟ್ಟಿದೆ ||

ನಾಲಿಗೆ ನಿನ್ನನ್ನೇ ಪಾಡುವುದು, ಕಣ್ಗಳು ನಿನ್ನನ್ನೇ ಅರಸುವುದು |

ಆಲಿಸಲು ನಿನ್ನ ವೇಣುನಾದ ಕಿವಿ ಸದಾ ಹಾತೊರೆವುದು ||

ಮೇಲೆ ಹುಸಿ ಮುನಿಸು ತೋರಿದರೂ ನಿನ್ನಾಪೇಕ್ಷೆ ಎಮ್ಮ ಧ್ಯೇಯ |

ಎಲ್ಲ ಬಲ್ಲ ನೀನೇ ಪ್ರತಿ ಜನುಮದ ಪತಿ-ಬಂಧು, ಸಂರಕ್ಷಕ ||

ನಿಲ್ಲಿಸಿರುವೆವು ಎಮ್ಮ ಮನ ನಿನ್ನಲಿ ಶಾಶ್ವತವಾಗಿ |

ಒಲ್ಲೆನೆಂದರೆ ಇಲ್ಲೇ (ಪ್ರಾಣತ್ಯಾಗಿಸಿ) ನಿನ್ನ ಸೇರುವೆವು ||

ಲೀಲಾ ಮಾಧವ ನಿನ್ನನ್ನೇ ಶರಣು ಬಂದಿಹೆವು ಅನುಗ್ರಹಿಸು |

ಎಲ್ಲ ಗೊತ್ತಿದ್ದೂ ಪರೀಕ್ಷಿಸಲೆಂದೇ ಕೇಳಿದನೆಂದ ಗೋಪಾಲ ||

ಗೊಲ್ಲರು, ಗೋವ್ಗಳು, ವೃಂದಾವನ ಎನಗೆ ಪರಮಪ್ರಿಯ |

ಪೇಳಿದ ಗೋವಿಂದ ನಸು ನಗುತಾ, ನಾಚಿನಿಂದ ನೀರೆಯರಿಗೆ ||

ಅಲೌಕಿಕ ನಂದನಂದನ ಆನಂದದಿ ರಾಸವಾಡಿ ದಣಿಸಿದ |

ಅಹ್ಲಾದದಿ ಪ್ರೇಮ ಪೂರ್ಣ ಆಲಾಪದಿ ಅವರ ತಣಿಸಿದ ||

ಗೊಲ್ಲಬಾಲೆಯರೆಲ್ಲ ನಿತ್ಯಸಿದ್ಧ ಪತ್ನಿಯರು |

ತುಳಸಿಪ್ರಿಯ ಶ್ರೀಕೃಷ್ಣವಿಠ್ಠಲ ಭಕ್ತವತ್ಸಲನಿವ ||

322. ಪರಮಾತ್ಮ ನಿಸ್ಪೃಹ- ಕರ್ಮರತ: |

ಪರಮಾತ್ಮ ಅಜನ್ಮ- ಅವತಾರಿ ||

ಪರಮಾತ್ಮ ಕಾಲಾತ್ಮ- ಶತ್ರು ಪಲಾಯನಿ |

ಪರಮಾತ್ಮ ಸ್ವಾತ್ಮರಾಮ-ಸಾಸಿರ ಸ್ತ್ರೀ ಭರ್ತ ||

ಪರಮಾತ್ಮ ಅಖಂಡ ಜ್ಞಾನಿ-ಸಲಹಾಪೇಕ್ಷಿ |

ಪರಮಾತ್ಮ ಸಂಸಾರ ರಹಿತ-ಜಗತ್ ಪಿತೃ ||

ಪರಮಾತ್ಮ ಅವ್ಯಕ್ತ-ವ್ಯಕ್ತಾದೀನ |

ಪರಮಾತ್ಮ ಸ್ವತಂತ್ರ- ಪರತಂತ್ರ || (ಭಕ್ತಾನಾಂವಶ)

ಪರಮಾತ್ಮ ಭಯಕೃತ - ಭಯನಾಶಕ |

ಶ್ರೀಕೃಷ್ಣವಿಠ್ಠಲ ಸರ್ವ- ಶೂನ್ಯನಾಮಕ ||

323. ವಿಶಾಲ ನಯನ ಪರಮ ಪುರುಷನ |

ದರ್ಶಿಸಬೇಕು, ಸಂದರ್ಶಿಸಬೇಕು ||

ಸ್ಪರ್ಶಿಸಬೇಕು, ಹರ್ಷಿಸಬೇಕು |

ವಿಷಯಾಸಕ್ತ ಜೀವಿಗೆ ದುರ್ಲಭ ||

ದುಷ್ಟ ಚಿತ್ತ, ಹೃದಯಸ್ಥಗೆ ದೃಷ್ಟಿಗಗೋಚರ |

ಸಾಕ್ಷಾತ್ ಪರತತ್ತ್ವ, ವಿಶುದ್ಧ ಸತ್ವಮಯ ||

ಮೋಕ್ಷಪ್ರದಾತ ಶ್ರೀಕೃಷ್ಣವಿಠ್ಠಲ ಪಾಹಿಮಾಮ್ ||

324. ಚರಣದಲ್ಲಿರಿಸಿಕೋ ಪರಮ ಪಾವನನೇ |

ದುರ್ಗಾಪತಿ ಕರುಣಾಸಾಗರ, ಪತಿತ ಪಾವನನೇ ||ಪ||

ಮೋಸ ಮಾಡುವ ಅವಕಾಶವೊಂದೂ ಬಿಡಲಿಲ್ಲ |

ಕಾಸಿಗೆ ಆಸೆಪಟ್ಟು ಅನ್ಯಾಯಿಗಳ ಸೇವೆಗೈದೆ ||

ಅಸಹ್ಯ, ಅಭಕ್ಷಣ ಆಹಾರ ಸೇವಿಸಿದೆ |

ದುಷ್ಟನಾಗಿರುವ ಎನ್ನ ಕ್ಷಮಿಸಿ ಸಲಹೋ ||1||

ಪಂಕ್ತಿಯಲಿ ಪರಪಂಕ್ತಿ ಮಾಡಿದೆ |

ಸೊಕ್ಕಿನಲಿ ಮಾತಂದು ಮನ ನೋಯಿಸಿದೆ ||

ಉಕ್ಕಿ ಬಂದ ಕೋಪದಿ ಕೆಡಕು ಬಯಸಿದೆ |

ತೋಕ ನಾನಯ್ಯಾ ಕ್ಷಮಿಸಿ ಸಲಹೋ ||2||

ಅನ್ಯರು ಮಾನಗೇಡಿ ಎಂದರೇನೂ ಭಯವಿಲ್ಲ |

ಮನನೊಂದು ಹೃತ್ಪೂರ್ವಕದಿ ಬೇಡುವೆ ||

ಅನನ್ಯ ಭಕುತಿ ಇತ್ತು ನಿಶ್ಚಯದಿ ಕಾಪಾಡು |

ಜನ್ಮ ಸಾರ್ಥಕವಾಗಿಸಯ್ಯಾ ಶ್ರೀಕೃಷ್ಣವಿಠ್ಠಲ ||3||

325. ಮತ ಬೇಕು, ಮತಿ ಬೇಕು ಪತಿಗೆ |

ಸತಿಯಾಗಿ ಸಂಸಾರದಿ ನಿರಾಸಕ್ತಿಬೇಕು ||

ಅತಿ ಸೇವೆಗೈದು ಗುರುಗಳೊಲುಮೆಯಲಿ |

ಪತಿತ ಪಾವನನ ನಿತ್ಯ ಒಲೈಸಬೇಕು ||

ಸತ್ಯ ಜ್ಞಾನದಿ ಅನಂತ ಬ್ರಹ್ಮನ ಅರಿಯಬೇಕು |

ಭಕ್ತಿ ಸಾಗರದಿ ತತ್ಪರತೆಯಲಿ ತತ್ತ್ವನಿಷ್ಠನಾಗಿ ||

ಉತ್ಸಾಹದಿ ಉತ್ಥಾನಗೈದು ಉಚ್ಚಸ್ತರದಿ |

ಉತ್ತುಂಗ ಶ್ರೀಕೃಷ್ಣವಿಠ್ಠಲನ ಭಜಿಸಬೇಕು ||

ಮತ = ದ್ವೈತಸಿದ್ಧಾಂತ, ಮತಿ = ಬುದ್ಧಿ, ಪತಿ = ಪರಮಾತ್ಮ, ಸತಿ = ವಿಧೇಯ (ಸರ್ವಾಂಗಸೇವೆ)

|

326. ಸತ್ಯವಂತ ಬ್ರಹ್ಮನ ಪುತ್ರ ಅಧರ್ಮ |

ಈತನ ಸತಿಯಾದಳು ಮೃಷಾ ||

ಪುತ್ರ-ದಂಭ, ಪುತ್ರಿ ಮಾಯಾ ಜನಿಸೆ |

ಸಂತಾನರಹಿತ ನಿರ್ಋತಿ ಗ್ರಹಿಸಿದರಿವರಿಬ್ಬರ ||

ಸಂತತಿ ಬೆಳೆದು ಜನಿಸಿದರು ಲೋಭ-ನಿಕೃತಿ | (ಶಾಠ್ಯ)

ಮತ್ತೆ ಇವರಿಂದ ಕ್ರೋಧ-ಹಿಂಸೆ ಪುಟ್ಟಿದರು ||

ಪುತ್ರರಾಗಿ ಕಲಿ (ಕಲಹ)-ದುರುಕ್ತಿ ಇವರಿಗಾದರು |

ಪತ್ನಿದುರುಕ್ತಿಯಿಂದ ಭಯ-ಮೃತ್ಯು ಸಂತತಿ ಪಡೆದ ಕಲಿ ||

ಉತ್ಪನ್ನವಾಯಿತು ಯಾತನೆ ನಿರಯ (ನರಕ) ಜೋಡಿ ಇವರಿಂದ |

ಅತ್ಯಾಚಾರ-ಅನ್ಯಾಯ, ಅಶಾಂತಿಯ ಮೂಲವೇ ಅಧರ್ಮವಂಶ ||

ತತ್ತರಿಸಿ ಇದರಿಂದ ಪ್ರಳಯ ಕಾರಣವಾಯ್ತು |

ನಿತ್ಯದಿ ಇದ ತಿಳಿಯಲು ಅಧರ್ಮ ತ್ಯಜಿಸಿ ಪುಣ್ಯ ದೊರೆವುದು ||

ಸತ್ಸಂಗವಿರೆ, ಅಧರ್ಮ ಸಂತತಿಯಿಂದಲೇ ದೂರವಾಗುವುದು |

ಸಾತ್ತ್ವಿಕ ಪೂಜೆಯಲಿ ಸದಾ ಶ್ರೀಕೃಷ್ಣವಿಠ್ಠಲಗೆ ಕೃತಜ್ಞನಾಗಿರುವ ||

ಶ್ರೀಹರಿ ಅವತಾರ ಕಾರ್ಯ

327. ಸರೋವರದಲ್ಲಿಳಿದ ಗಜನ ಕಾಲ್ಪಿಡಿದು |

ಭದ್ರವಾಗಿ ಬಿಡದೆ ಮಕರ ನೀರಲ್ಲೆಳೆದ ||

ಸ್ವರಕ್ಷಣೆ ಫಲ ನೀಡದಿರಲು ಆರ್ತಿಯಲಿ |

ಪರಮಾತ್ಮನ ಸ್ತುತಿಸಿ ಮೊರೆ ಇಟ್ಟ ||

ಕರಿಯ ಕರೆ ಕೇಳಿ ಅವಸರದಿ ಶ್ರೀಹರಿ |

ಗರುಡನ ಹೆಗಲೇರಿ ರಮೆಗೂ ಪೇಳದೆ ||

ತ್ವರಿತದಿ ಧಾವಿಸಿ ಕಂಟಕ ಮಕರಿಯ |

ಕೊರಳು ತರಿದು ಒಡನೆ ಶುಭವಿತ್ತ ||

ಶ್ರೀಕೃಷ್ಣವಿಠ್ಠಲನ ಕಾರುಣ್ಯಕ್ಕೇನೆಂಬೆ ||1||

ಮಾತೃವಚನದಂತೆ ತೆರಳಿ |

ಅರಣ್ಯದಿ ಕಠಿಣ ತಪಗೈದ ||

ಸರಳ ಮನದ ಚಿಣ್ಣ ತರಳಗೆ |

ಆರು ತಿಂಗಳಿಗೆ ಪ್ರತ್ಯಕ್ಷನಾಗಿ ||

ಕರದಲ್ಲಿದ್ದ ಶಂಖ ಗಲ್ಲಕೆ ಸ್ಪರ್ಶಿಸೆ |

ತೆರೆದು ಕಣ್ಣು ನೋಡಿದ ಒಳಗಿದ್ದ ರೂಪ ಹೊರಗೆ ||

ಸರ್ವಾಂಗದಿ ಶರಣಾದವಗೆ ಚಿರಸ್ಥಾನವಿತ್ತ |

ಶ್ರೀಕೃಷ್ಣವಿಠ್ಠಲನ ಕಾರುಣ್ಯಕ್ಕೇನೆಂಬೆ ||2||

ಹರಿ ಹರಿ ಎಂದೊಡೆ ಹರಿವುದು ಪಾಪವೆಲ್ಲ |

ಹರಿ ಹರಿ ಎಂದೊಡೆ ಉದ್ಧರಿಸುವ ಸಕಲರ ||

ಹರಿ ಹರಿ ಎಂದೊಡೆ ತರಿವನೆಲ್ಲ ಕಷ್ಟವ |

ಹರಿ ಹರಿ ಎಂದೊಡೆ ನೆರಳಿನಂದದಿ ಸದಾ ಕಾಯ್ವ ||

ಹರಿ ಹರಿ ಎಂದೊಡೆ ಹರಸುವನು ಹರುಷದಿ |

ಹರಿ ಹರಿ ಎಂಬ ಶ್ರೀಕೃಷ್ಣವಿಠ್ಠಲನೇ ಓಡಿ ಬರುವ ||3||

328. ಸ್ಮರಿಸಲು ಸದಾ ಹರಿನಾಮ ಭಕುತಿಯಲಿ |

ಇರುಳು-ಹಗಲು ಉಪದ್ರವ ಬಾರದಂತೆ ||

ಪರಿಹರಿಸಿ ಸಕಲ ಕಷ್ಟ ಕಾರ್ಪಣ್ಯಗಳ |

ಹರಿದು ಬಿಸುಟುವ ಭವದ ಗಂಟು ||

ಶ್ರೀರಮಾ ವಲ್ಲಭ ಆಪತ್ತು ಬರಲೀಸದೆ |

ಶ್ರೀಕೃಷ್ಣವಿಠ್ಠಲ ತನ್ನ ಭಕುತರ ಯೋಗಕ್ಷೇಮಕಾಯ್ವ ||

329. ನಿನ್ನ ಧ್ಯಾನಿಸುವ ಮನವಿತ್ತರೆ ಧ್ಯಾನಿಸುವೆನಯ್ಯಾ |

ನಿನ್ನ ವೀಕ್ಷಿಸುವ ದೃಶ್ಯವಿತ್ತರೆ ದೃಷ್ಟಿಸುವೆನಯ್ಯಾ ||

ನಿನ್ನ ಕಥಾಶ್ರವಣಿಸುವ ಭಾಗ್ಯವಿತ್ತರೆ ಶ್ರವಣಿಸುವೆನಯ್ಯಾ |

ನಿನ್ನತ್ತ ಧಾವಿಸುವ ಅವಕಾಶವಿತ್ತರೆ ಓಡಿ ಬರುವೆನಯ್ಯಾ ||

ನಿನ್ನ ಸೇವಾ ಸಂದರ್ಭವಿತ್ತರೆ ಸೇವೆ ಸಲ್ಲಿಸುವೆನಯ್ಯಾ |

ನಿನ್ನತ್ತ ಧಾವಿಸುವ ಅವಕಾಶವಿತ್ತರೆ ಸೇವೆ ಸಲ್ಲಿಸುವೆನಯ್ಯಾ |

ನಿನ್ನಿಂದ ಸರ್ವಸೇವಾ ಸೌಭಾಗ್ಯ ಸಿಕ್ಕರೆ ನನ್ನ ಅರ್ಪಿಸುವೆನಯ್ಯಾ ||

ನಿನ್ನ ಓಲೈಸುವ ಬುದ್ಧಿ ಇತ್ತರೆ ಅದರಲ್ಲೇ ಮುಳುಗುವೆನಯ್ಯಾ |

ನೀನೆನ್ನ ಯೋಗೇಶ್ವರ ಶ್ರೀಕೃಷ್ಣವಿಠ್ಠಲ ಸಕಲ ಯೋಗ ದಯಪಾಲಿಸು ||

330. ಜಯ, ಜಯ ಕರುಣಾಸಾಗರ ಭವ ಬಂಧಮೋಚಕ |

ಭಯವ ಪರಿಹರಿಸಿ ಧ್ಯಾನವೀಯೋ ದಯಾನಿಧೇ ||

ಕಯಾದು ಇತ್ತ ವಿಷ ಅಮೃತವಾಗಿಸಿದಂತೆ |

ಸಿಯಾ ರಾಮನ ನಂಬಿದ ಹನುಮನ ಪೊರೆದಂತೆ ||

ಮಾಯಾ ಸಂಸಾರ ಬಿಡಿಸಿ ಪದಕಮಲದಲ್ಲಿರಿಸು |

ವಾಯ್ವಾಂತರ್ಗತ ಸಚ್ಚಿದಾನಂದಾತ್ಮಕ ಶ್ರೀಕೃಷ್ಣವಿಠ್ಠಲ ||

331. ವಿಧವಿಧದ ಆನಂದ ಲೌಕಿಕದಿ |

ಬಂದು ಹೋಗುವುವು ಕ್ಷಣಿಕದಿ ||ಪ||

ಮೋದ ಅಮೋದ ಪ್ರಮೊದ ಸುಖವೀವುದು |

ಸದಾ ಅಲೌಕಿಕದ ಆನಂದ ಪರಮಾನಂದ ||

ಹುಡುಕಬಾರದು ಹೊರಗಿನ ವಸ್ತುವಿನಲಿ |

ತಡಕಾಡಬೇಕು ತನ್ನೊಳಗೆ ಮುಳುಗಿ ||1||

ಕಡೆ ಇಲ್ಲದ ನಿತ್ಯ ಆನಂದವ |

ಪಡೆಯಬೇಕು ಬಿಡದೆ ಶಾಶ್ವತದಿ ||

ನಂದನಕಂದ ಆನಂದ ಸ್ವರೂಪಿ |

ಒಡೆಯ ಶ್ರೀಕೃಷ್ಣವಿಠ್ಠಲ ಬೇಡಿಕೊಂಡರೆ ಅನುಗ್ರಹೀಪ ||2||

332. ಆಳವಾದ ಅಲೌಕಿಕ ಜ್ಞಾನ, ವಿಜ್ಞಾನ |

ತಿಳಿಯಲು ಮಾನವ ಜನುಮ ಸಾರ್ಥಕ ||ಪ||

ತಿಳಿಯಲಾಗದು ಸಂಪೂರ್ಣದಿ ಎಂದೂ |

ಒಳ್ಳೇಯದಾಗುವುದು ತಿಳಿಸಿಕೊಂಡರೆ ||

ಅಳತೆ ಇಲ್ಲದ, ಎಲ್ಲೆ ಇಲ್ಲದ್ದು |

ಕೊಳೆಯದೇ ಸದಾ ಜೊತೆಯಲ್ಲಿಹುದು ||1||

ಅಳೆಯಲಾಗದು, ಕಳೆಯಲಾಗದು |

ತಿಳಿದು, ತಿಳಿಸುವ ಕ್ರಮವಿದೆ ||

ಬೆಳಸಿ, ಉಳಿಸುವ ವಿಧಾನವಿದೆ |

ಉಳಿದಾಗ ಫಳಫಳ ಹೊಳೆವುದು ||2||

ಕಳ್ಳತನವಾಗದು ಸುರಕ್ಷೆ ಈವುದು |

ತಿಳುವಳಿಕೆ ನೀಡಿ ಸುಖವೀವುದು ||

ಬಳುವಳಿಯಾಗಿ ಮುಂದೂ ಬರುವುದು |

ಬೆಳೆಯುವುದು ಜನ್ಮ ಜನ್ಮದಿ ||3||

ಹೇಳುವಂತಹ ನಿರ್ದುಷ್ಟ ಆಕಾರವಿಲ್ಲದ್ದು |

ಕೇಳಿ ತಿಳಿದಾಗ ಆನಂದ ಅಪರಿಮಿತ ||

ಸುಳ್ಳಲ್ಲ ಇದೇ ಸತ್ಯದ ಜ್ಞಾನ |

ಕೇಳಿಕೊಂಡರೆ ಅನುಗ್ರಹೀಪ ನಮ್ಮ ಶ್ರೀಕೃಷ್ಣವಿಠ್ಠಲ ||4||

333.. ಒಂದು ಒಂದೇ, ಒಂದೇ ಸಾಧ್ಯ, ಸಾಧನೆ |

ಒಂದರ ಸಮ ಮತ್ತೊಂದಿಲ್ಲ, ಒಂದೇ ಎಂದೂ ಎಂದೆಂದಿಗೂ ||ಪ||

ಒಂದರಿಂದಲೇ ಆನಂದ, ಮಹದಾನಂದ |

ಒಂದನ್ನೇ ನಂಬಿರಿ ಅನ್ಯವೇನಿಲ್ಲ ಜೀವನದಿ ||ಅಪ||

ಒಂದರ ಸಮ ಯಾವ ತೀರ್ಥಯಾತ್ರೆ ಇಲ್ಲ |

ಒಂದರ ಸಮ ಯಾವ ಪವಿತ್ರ ನದಿ ಇಲ್ಲ ||

ಒಂದರ ಸಮ ಸಕಲ ವ್ರತ-ಆಚರಣೆ |

ಒಂದರ ಸಮ ಸಕಲ ಯಜ್ಞ, ದಾನ, ತಪ ||1||

ಒಂದರಲ್ಲಿ ಮುಳುಗಿದರೆ ಸಕಲೋದ್ಧಾರ |

ಒಂದರಲ್ಲಿದ್ದ ಶಕ್ತಿ ಎಲ್ಲದರಲ್ಲಿದೆ ||

ಒಂದೇ ಸಕಲ ರೋಗಕ್ಕೆ ಸಿದ್ಧೌಷದ |

ಒಂದರಿಂದ ಹಿಂದು-ಇಂದು-ಮುಂದಿನ ಶುದ್ಧಿ ||2||

ಒಂದಕ್ಕೆ ಯಾವ ದೇಶ-ಕಾ ಲನಿಯಮವಿಲ್ಲ |

ಒಂದಕ್ಕೆ ಯಾವ ವರ್ಣಾಶ್ರಮ ಭೇದವಿಲ್ಲ ||

ಒಂದಕ್ಕೆ ಯಾವ ಶೌಚಾಶೌಚ ಬಾಧೆ ಇಲ್ಲ |

ಒಂದರಿಂದ ಸಕಲ ಪಾಪ ವಿಮುಕ್ತವು ||3||

ಒಂದನ್ನೇ ಪದೇ ಪದೇ ಉಚ್ಚರಿಸು |

ಒಂದು ಮಾಡುವುದು ಭಕ್ತಿ ಧೃಡತೆ ||

ಒಂದರಲ್ಲೇ ಉತ್ಕಟ ಶ್ರದ್ಧೇ ಇರಲಿ |

ಒಂದರ ನಿರಂತರ ಸೇವನೆ ಮಧುರಾತಿ ಮಧುರ ||4||

ಒಂದೇ ಸುಡುವುದು ಸಕಲ ಪಾಪರಾಶಿ |

ಒಂದೇ ತಡೆವುದು ಬರುವ ದುರಂತ ||

ಒಂದೇ ಕೊಡುವುದು ಅಮಿತ ಪುಣ್ಯ |

ಒಂದೇ ಇಡುವುದು ಪಾದ ಪದ್ಮದಿ ||5||

ಒಂದರಿಂದ ಆರ್ತತೆ ಪೋಪುದು |

ಒಂದರಿಂದ ದು:ಖ ಅಳಿವುದು ||

ಒಂದರಿಂದ ಭೀತಿ ತೊಲಗುವುದು |

ಒಂದರಿಂದಲೇ ವ್ಯಾಧಿ ನಿವಾರಣ ||6||

ಒಂದು ಎಂಬುದು ಅಜಮಿಳನ ಪೊರೆಯಿತು |

ಒಂದು ಎಂಬುದು ದ್ರೌಪದಿಯ ಕಾಯ್ದಿತು ||

ಒಂದು ಎಂಬುದು ಪ್ರಲ್ಹಾದನ ರಕ್ಷಿಸಿತು |

ಒಂದು ಎಂಬುದು ಕರಿಗೆ ಮೋಕ್ಷ ಕೊಟ್ಟಿತು ||7||

ಒಂದರಿಂದಲೇ ಸರ್ವತ್ರ ರಕ್ಷಣೆ |

ಒಂದರಿಂದಲೇ ಸರ್ವದರಿಂದ ರಕ್ಷಣೆ ||

ಒಂದರಿಂದಲೇ ಸರ್ವದಾ ರಕ್ಷಣೆ |

ಒಂದೇ ಸರ್ವದ ಸರ್ವಸಾರ ||8||

ಒಂದು ಇರುವುದು ಕೃತಯುಗದಿ ಧ್ಯಾನ |

ಒಂದು ಇರುವುದು ತ್ರೇತಾಯುಗದಿ ಯಜ್ಞ ||

ಒಂದು ಇರುವುದು ದ್ವಾಪಾರದಿ ಅರ್ಚನೆ |

ಒಂದೇ ಇರುವುದು ಕಲಿಯುಗದಿ ನಾಮ ಕೀರ್ತನೆ ||9||

ಒಂದು ನಾಮದಿ ಸಕಲನಾಮ ಪುಣ್ಯ |

ಒಂದು ರೂಪದಿ ಸಕಲರೂಪ ಸ್ಮರಣೆ ||

ಒಂದು ಕ್ರಿಯೆದಿ ಸಕಲ ಶಕ್ತಿ ಸ್ಫುರಣೆ |

ಒಂದರಿಂದ ನಾಮ ರೂಪ ಕ್ರಿಯೆ ಅಭೇದ ||10||

ಒಂದು ನಾಮದಿ ಅಡಕ ಸರ್ವನಾಮ |

ಒಂದುರೂಪದಿ ಅಡಕ ಸರ್ವರೂಪ ||

ಒಂದು ಗುಣದಿ ಅಡಕ ಸರ್ವಗುಣ |

ಒಂದರಿಂದ ಅಭೇದ ರೂಪ ಗುಣ ಕ್ರಿಯಾ ||11||

ಒಂದರಿಂದಲ್ಲಿದೆ ಸುಖದ ಭಂಡಾರ |

ಒಂದರಲ್ಲಿದೆ ಅನಿಷ್ಟ ನಿವಾರಕ ||

ಒಂದರಿಂದಲೇ ಶತ್ರುನಿವಾರಣ |

ಒಂದೇ ಸುಹೃತ ಮಿತ್ರ, ಬಾಂಧವ ||12||

ಒಂದರಿಂದ ಸಕಲ ಮಂಗಲಮಯ |

ಒಂದನ್ನರಿತರೆ ಸಕಲ ವೇದವೇದ್ಯ ||

ಒಂದರಿಂದಲೇ ಪರಮಗತಿ |

ಒಂದು ಎಂಬುದು ಶ್ರೀಕೃಷ್ಣವಿಠ್ಠಲನಾಮ ಸಂಕೀರ್ತನೆ ||12||

ಜಯಹರಿ ಶ್ರೀಕೃಷ್ಣವಿಠ್ಠಲ, ಅಚ್ಯುತ, ಅನಂತ, ಗೋವಿಂದ |

334. ತಿಳಿದಷ್ಟೂ ತಿಳಿಯುವ ತಿಳಿಯಾದ | ತಿಳಿಯಲಾರದ ತಿಳುವಳಿಕೆ ಕೊಡು ||

ತಿಳಿದು ತಿಳಿಸುವ ನಿರ್ದುಷ್ಟ | ತಿಳಿದೂ ತಿಳಿಯದಿರೆ ಅವಿದ್ಯೆ ||

ಕಾಳು ಕಾಳಾಗಿ ಹೆಕ್ಕಿ ಕಣಜ ತುಂಬಿಸಿ | ಕಳೆದುಹೋಗುವ ಮುನ್ನ ಗಳಿಸಿಕೊಳ್ಳಬೇಕು ||

ಸುಳ್ಳು ಇದಲ್ಲ ಸತ್ಯದಿ ಶ್ರೀಕೃಷ್ಣವಿಠ್ಠಲನ | ಕೊಳ್ಳೆಹೊಡೆಯಬೇಕು ನಮ್ಮ ಪಾಲಿನದ್ದು ||

(ಜ್ಞಾನ-ಆನಂದ)

335. ಶ್ರೀನಾರಾಯಣವರ್ಮ ಕಥಾ

ಸರ್ವದೋಷದೂರ, ಸರ್ವಗುಣಪೂರ್ಣ ಓಂಕಾರಸ್ವರೂಪ |

ಸರ್ವಸ್ಥಳದಿ, ಸರ್ವವ್ಯಾಪುತ ಇಹ-ಪರದಿ ರಕ್ಷಿಪ ||1||

ಗುರು ವಿಶ್ವರೂಪರ ಮಂತ್ರತುಲ್ಯ ನಾರಾಯಣ ಕವಚ ಧರಿಸಿ |

ಇಂದ್ರ ಅಸುರರ ಗೆಲ್ಲಿ ಮೂರುಲೊಕದ ಸಾಮ್ರಾಜ್ಯ ಪಡೆದ ||2||

ಪರಿಪೂರ್ಣನಾದ ಪರಮಾತ್ಮನ ಧ್ಯಾನ ಸಹಿತ ಚಿಂತಿಸಿ |

ಪಾರಾಯಣ ರೂಪದಿ ಮಾಡಿದ ವಿದ್ಯಾ ತೇಜ ತಪೋಮೂರ್ತಿಯ ||3||

ಸರ್ವತ್ರ, ಸರ್ವಗ, ಸರ್ವರೂಪದಿಂ ರಕ್ಷಿಸಲಿ |

ಸರ್ವದಾ ಕರುಣಾಮೂರ್ತಿಸ್ಮರಿಸೆ ಸದಾ ರಕ್ಷಿಸಲಿ ||4||

ಗರುಡಗಾಮಿ ಶ್ರೀಹರಿ ಸರ್ವರಕ್ಷಕನ ಧ್ಯಾನಿಸಿ ಪಾದಪದ್ಮವ |

ಕರದಿ ಶಂಖ, ಚಕ್ರ, ಗುರಾಣಿ, ಖಡ್ಗ, ಗದೆ, ಬಾಣ, ಧನು, ಪಾಶಧರಿಸಿಹ ||5||

ನೀರಲಿ ಮತ್ಸಮೂರ್ತಿ ಜಲಜಂತು ವರುಣ ಪಾಶದಿಂದೆನ್ನ ರಕ್ಷಿಸಲಿ |

ಸುರೂಪ ವಾಮನ ನೆಲದಿ, ವಿಶ್ವರೂಪಿ ತ್ರಿವಿಕ್ರಮ ಆಕಾಶದಿ ರಕ್ಷಿಸಲಿ ||6|||

ಘೋರ ಅಟ್ಟಹಾಸದಿ ದೈತ್ಯ ಸ್ತ್ರೀಗರ್ಭಪಾತಿಸಿದ ದಾನವ ಶತ್ರು |

ನರಸಿಂಹ ಕೋಟೆ, ಅರಣ್ಯ, ರಣಭೂಮಿಯಲ್ಲೆನ್ನ ರಕ್ಷಿಸಲಿ ||7||

ಕೋರೆಯಲಿ ಭೂಮಿ ಧರಿಸಿಹ ಯಜ್ಞ ವರಾಹ ಮಾರ್ಗದಲಿ |

ಪರಶುರಾಮ ಗಿರಿ, ಕಂದರದಿ, ಲಕ್ಷ್ಮಣ ಸಹಿತ ಭರತಾಗ್ರಜ ಪ್ರವಾಸದಿ ರಕ್ಷಿಸಲಿ ||8||

ಉಗ್ರ ಪ್ರಮಾದಗಳು, ಅಭಿಚಾರದಿಂದ ನಾರಾಯಣ ರಕ್ಷಿಸಲಿ |

ಕರ್ಮಬಂಧನದಿಂದ ಕಪಿಲನು ಯೋಗೇಶ್ವರದತ್ತನು, ಯೋಗದಲ್ಲಿಯ ವಿಘ್ನದಿಂದ ರಕ್ಷಿಸಲಿ ||9||

ಪರಮ ಋಷಿ ಸನತ್ಕುಮಾರನು ಕಾಮದೇವನಿಂದಲೂ |

ಮಾರ್ಗಕ್ರಮಿಸುವಾಗ ದೇವತಾವರ್ಯರಿಗಭಿವಂದಿಸದ ಪರಾಧವ ||10||

ನಾರದರು ಪೂಜೆ ಕಾಲದಿ ನಡೆದ ಸೇವಾಪರಾಧಗಳಿಂದಲೂ |

ಕೂರ್ಮಾವತಾರಿ ಶ್ರೀಹರಿ ಎಲ್ಲ ರೀತಿಯ ನರಕದಿಂದೆನ್ನ ರಕ್ಷಿಸಲಿ ||11||

ಪರಮಾತ್ಮ ಧನ್ವಂತರಿ ಕುಪಥ್ಯದಿಂದ ಋಷಭನು ಜಿತೇಂದ್ರಿಯದಿ |

ಭರಿಸುವ ಕ್ರೋಧ, ದು:ಖಗಳ ದ್ವಂದ್ವವ ಯಜ್ಞ ರಕ್ಷಿಸಲಿ ||12||

ಮರ್ತ್ಯಲೋಕದಿ ಬರುವ ಕಷ್ಟವನ್ನು ಬಲರಾಮ ನೀಗಲಿ |

ಸರ್ಪಾಧಿರಾಜ ಶ್ರೀಆದಿಶೇಷನು ಸರ್ಪಗಣದಿಂದೆನ್ನ ರಕ್ಷಿಸಲಿ ||13||

ಶ್ರೀಕೃಷ್ಣದ್ವೈಪಾಯನ ಅಜ್ಞಾನದಿಂದ, ಬುದ್ಧ ಪಾಷಂಡಿಗಳಿಂದಲೂ |

ಧರ್ಮರಕ್ಷಣಾರ್ಥದಿ ಅವತರಿಸುವ ಕಲ್ಕಿ ಕಲಿದೋಷದಿಂದೆನ್ನ ರಕ್ಷಿಸಲಿ ||14||

ಸುಹೃತ ಗದಾಪಾಣಿ ಕೇಶವ ಪ್ರಾತ:ದಿ ನಂತರ ಪಿಳ್ಳಂಗೋವಿ ಗೋವಿಂದನು ರಕ್ಷಿಸಲಿ |

ನಾರಾಯಣನು ಪೂರ್ವ ಮಧ್ಯಾಹ್ನದಿ ನಂತರ ಚಕ್ರಧಾರಿ ವಿಷ್ಣು ರಕ್ಷಿಸಲಿ ||15||

ತೀವ್ರದಿ ಅಪರಾಹ್ನದಿ ಧನುರ್ಧಾರಿ ಮಧುಸೂದನ, ಸಾಯಂಕಾಲದಿ ಮೂರ್ಲೋಕದಿ ಮಾಧವ |

ಅರ್ಧರಾತ್ರೀಲಿ ಹೃಷಿಕೇಶ, ನಿಶೀಥದಿ ಪದ್ಮನಾಭನೆನ್ನ ಸಲಹಲಿ ||16||

ದೊರೆ ಶ್ರೀವತ್ಸಾಂಕಿತ ಅಪರಾತ್ರೀಲಿ, ಖಡ್ಗಧಾರಿ ಜನಾರ್ದನ ಉಷ:ಕಾಲದಿ |

ಸೂರ್ಯೋದಯ ಮೊದಲು ದಾಮೋದರನು, ಪ್ರಭಾತದಿ ಕಾಲಮೂರ್ತಿ ವಿಶ್ವೇಶ್ವರ ರಕ್ಷಿಸಲಿ ||17||

ಕಾರ್ಯಕಾರಣ ಕರ್ತ ಕಾಲ ಚಕ್ರನಧೀನ ಸರ್ವವೆಂಬ ಸತ್ಯದ |

ಅರಿವಿನಿಂದ ಎಲ್ಲ ಉಪದ್ರವಗಳು ನಾಶವಾಗಲಿ ||18||

ಚಕ್ರರಾಜ ಸುದರ್ಶನನೇ ವಾಯುಸಹಿತ, ಹುಲ್ಲಿನಮೆದೆ ಸುಡುವಂತೆ |

ಶೀಘ್ರದಿ ನಮ್ಮ ಶತ್ರುಸೈನ್ಯವ ಸುಟ್ಟುಹಾಕು, ಸುಟ್ಟುಹಾಕು ||19||

ಪರಮಾತ್ಮ ಪ್ರಿಯನೇ ವಜ್ರಾಯುಧಕೆ ಮಿಗಿಲಾದ ಕಿಡಿ ಉದುರಿಸುವ ಗದೆಯೇ |

ಸರ್ವಕೂಷ್ಮಾಂಡ ಯಕ್ಷ, ಭೂತಾದಿ ಗ್ರಹದಿಗಳ ಸದೆ ಬಡೆ ||20||

ಶತ್ರುಹೃದಯ ನಡಗಿಸುವ ಶಂಖ ಧ್ವನಿಯಿಂದ ಸರ್ವಪ್ರೇತ, ಪಿಶಾಚಿ |

ಘೋರ ಬ್ರಹ್ಮರಾಕ್ಷಸರ ಘೋರದೃಷ್ಟಿಯಿಂದ ರಕ್ಷಿಸಲಿ ||21||

ಅರಿಯ ತೀಕ್ಷ್ಣವಾದ ಅಲಗಿನಿಂದ ಶತ್ರುಗಳು ಛಿನ್ನ ಭಿನ್ನ ಆಗಲಿ |

ನೂರಾರು ಚಂದ್ರಮಂಡಲ ಸಮ ಗುರಾಣಿಪ್ರಭೆ, ಪಾಪಾತ್ಮರ ಪಾಪನೇತ್ರ ಮುಚ್ಚಿ ರಕ್ಷಿಸಲಿ ||22||

ಸೂರ್ಯವಿರೋಧಿಗ್ರಹ, ಧೂಮಕೇತು, ಜೀವಿಗಳಿಂದ ಬರುವ ಭಯ |

ಕೋರೆಗಾಡಿ ಹಿಂಸ್ರಪಶು, ಸರಿಸೃಪ, ಭೂತಪ್ರೇತ ಭಯನಿವಾರಿಸಲಿ ||23|||

ಸರ್ವಕ್ಕೂ ದಿವ್ಯೌಷಧವಾದ ಭಗವನ್ನಾಮರೂಪ ಅಸ್ತ್ರವೆಂಬ ಮಂತ್ರ |

ಕೀರ್ತಿಶ್ರೇಯಸ್ಸಿಗೆ ವಿಘ್ನತರುವ ಭಯವನ್ನು ನೀಗಿಸಲಿ ||24||

ಗರುಡರೂಢಿಯ ಸ್ತುತಿಸುವ ಬೃಹತ್ ರಥಂತರ ಸಾಮವೇದ |

ಗರುಡ ವಿಷ್ವಕ್ಸೇನ ಪ್ರಭುನಾಮವು ಉಳಿದೆಲ್ಲ ರೀತಿಯಲಿ ರಕ್ಷಿಸಲಿ ||25||

ಹರಿಯ ನಾಮ ರೂಪ, ನಾನಾ ಆಯುಧ, ಶ್ರೇಷ್ಠ ಪಾರ್ಷದರೆಲ್ಲ |

ಇಂದ್ರಿಯ, ಬುದ್ಧಿ, ಮನ-ಪ್ರಾಣಸಹಿತ ಕಾಪಾಡಲಿ ||26||

ಕಾರ್ಯ, ಕಾರಣರೂಪದ ಈ ಜಗತ್ತು ಭಗವಂತನೇ ಆಗಿರುವನೆಂದು |

ಅರಿತರೆ ಸತ್ಯ ಆಗುವುದು ಉಪದ್ರವಗಳ ನಾಶ ||27||

ಸ್ವರೂಪದಿ ವಿಕಲ್ಪರಹಿತ ಭಗವಂತ ಮಾಯಾ ಸ್ವ-ಶಕ್ತಿಯಲಿ |

ಧರಿಸಿರುವ ಸತ್ಯದಿ ಆಯುಧ, ರೂಪ, ನಾಮವ ||28||

ಸರ್ವಜ್ಞ ಭಗವಾನ್ ಹರಿಯೊಬ್ಬನೇ ಸರ್ವಸತ್ಯ |

ಸರ್ವದಾ ಸ್ವರೂಪದಿಂದ ಸರ್ವತ್ರ ರಕ್ಷಿಸಲಿ ||29||

ಯಾರ ಅಟ್ಟಹಾಸದಿ ಭಯ ಓಡಿಸುವನೊ ಅಂತಹ ಸ್ವತೇಜ ನರಸಿಂಹ |

ಸರ್ವರಕ್ಷಕನಾಗಿ ದಿಕ್ಕು ವಿದಿಕ್ಕುಗಳಲಿ ಒಳ ಹೊರಗೆ ಸಮಸ್ತ ರಕ್ಷಿಸಲಿ ||30||

ನಾರಾಯಣಾತ್ಮಕವಾದ ನಾರಾಯಣವರ್ಮ ಕಥೆಯಿಂದ |

ಸರ್ವ ಸುರಕ್ಷಿತನಾಗಿ ಸರ್ವದೈತ್ಯರ ಗೆಲ್ಲಬಲ್ಲೆ ||31||

ನಾರಾಯಣ ಕವಚಧರಿಸಿದವ ಯಾರನ್ನಾದರೂ ದೃಷ್ಟಿಸಲು |

ಚರಣ ಸ್ಪರ್ಶಿಸಿದರೂ ಸಹ ಸಮಸ್ತಭಯ ನಿವಾರಿಸುವುದು ||32||

ಧರಿಸಲು ವೈಷ್ಣವವಿದ್ಯೆ ಭಯವಿರದು ಈ ಜಗದೀ |

ಚೋರ, ರಾಜ, ಗ್ರಹ, ವ್ಯಾಘ್ರಾದಿತರಗಳಿಂದಾಗದು ||33||

ವಿಪ್ರನೊಬ್ಬ ಕೌಶಿಕ ಗೋತ್ರಜನು ಧರಿಸಿ ಈ ವಿದ್ಯೆ |

ಮರಣಿಸಿದ ಮರಳು ಗಾಡಿನಲಿ ||34||

ಚಿತ್ರರಥನೆಂಬ ಗಂಧರ್ವ ತನ್ನ ಪತ್ನಿಯೊಂದಿಗೆ ಆಕಾಶಮಾರ್ಗದಿ |

ಬರುವಾಗ ಆ ಸ್ಥಳದಿ ಕೆಳಗೆ ಬಿದ್ದನು ||35||

ನಾರಾಯಣ ಕವಚ ಧರಿಸಿದ ಪ್ರಭಾವ ವಿದೆಂದು ವಾಲಖಿಲ್ಯರು ಅರುಹಲು |

ಸರಸ್ವತಿ ನದಿಯಲಿ ಅಸ್ಥಿ ವಿಸರ್ಜಿಸಿ ಸ್ನಾನಮಾಡಿ ತೆರಳಿದನು ||36||

ನಾರಾಯಣ ಕವಚ ಸದಾ ಕೇಳುವ, ಆದರದಿ ಧರಿಸುವ ಮಾನ್ಯನು |

ಸರ್ವ ಅಭಯ ಪದದಿ ಪೂಜ್ಯನಾಗುವ ಜಗದಲ್ಲಿ ||37||

ಗುರುವಿಶ್ವರೂಪ ರಚಿತ ಶ್ರೇಷ್ಠನಾರಾಯಣ ವಿದ್ಯೆ |

ಮೂರ್ಲೋಕದಿ ಅಸುರರ ಗೆಲಿದು ಸಾಮ್ರಾಜ್ಯ ಲಕ್ಷ್ಮೀ ಸೇವಿಸಿದನು ||38||

ಪರೀಕ್ಷಿತಗೆ ಶ್ರೀಶುಕಮಹರ್ಷಿ ಪೇಳಿದರೆಂಬಲ್ಲಿಗೆ |

ಕರುಣೆಯಿಂದ ಶ್ರೀಕೃಷ್ಣವಿಠ್ಠಲ ಪೇಳಿದ ಶ್ರೀನಾರಾಯಣವರ್ಮ ಕಥನ ಮುಗಿಸುವೆ ||39||