ಡಾ ನರಸಾಪೂರ & ಪರಿವಾರ

ಶ್ರೀ ಕೃಷ್ಣವಿಠ್ಠಲಪದಗುಚ್ಛ 3.7

ವಾಮನ ಚರಿತೆ

400. ಸುಗುಣಾಂತರಂಗ ಅವಿರ್ಭವಿಸಿ ಅದಿತಿ-ಕಶ್ಯಪ ಪುತ್ರನಾಗಿ |

ಆಗಲೇ ತೋರಿದ ಸುಂದರ ವಟು ವಾಮನರೂಪದಿ ||

ಆಗಮಿಸಿ ಯಜ್ಞಮಂಟಪದಿ ಬೇಡಿದ ಬಲಿಗೆ ದಾನವ |

ಬಗೆಬಗೆಯ ದಾನ ಒಲ್ಲದೆ ಬೇಡಿದ ತ್ರಿಪದ ಭುವಿಯ ||

ಅಗಣಿತ ಬೆಳೆದ ಅಚಿಂತ್ಯಾದ್ಭುತ ತ್ರಿವಿಕ್ರಮರೂಪದಿ |

ಬೇಗ ಅಳೆದ ಎರಡು ಪಾದದಿ ಭುವಿ ಅಂತರಿಕ್ಷವ ||

ನಗೆ ಬೀರಿ ಕೇಳಿದ ಎಲ್ಲಿಡಲಿ ಮೂರನೇ ಪಾದ ಸ್ಥಳತೋರು |

ಯೊಗದಿ ಅರಿತ ಸಾಮನ್ಯನಲ್ಲ ಇವ ಪರಮಾತ್ಮನೆಂದು ||

ಭಂಗವಾಗದಂತೆ ತನ್ನ ಪ್ರತಿಜ್ಞೆ ಸ್ಥಳವ ತೋರಿದ ಶಿರಬಾಗಿ |

ಬೇಗನೆ ಬಲಿಶಿರವ ಮೆಟ್ಟಿ ಪಾತಾಳ ಕಟ್ಟಿದ ||

ಅಂಗನೆಯ ಜೊತೆಗೂಡಿ ನಡೆದ ಚಿರಂಜೀವಿ ಬಲಿ |

ಈಗಲೂ ಕಾಯುತ್ತಿರುವ ಭಕ್ತವತ್ಸಲ ಅರಮನೆ ಬಾಗಿಲವ ||

ಗಗನಕ್ಕೆತ್ತಿದ ಪಾದ ನಖ ತಾಕಿ ಒಡೆಯಿತು ಬ್ರಹ್ಮಾಂಡ ಖರ್ಪರ |

ಸುಜ್ಞಾನಿ ಬ್ರಹ್ಮ ಆ ಜಲದಿ ಮಾಡಿದ ಪಾದಪೂಜೆಯ ||

ಆಗ ವಿಷ್ಟುಪದಿ ಎನಿಸಿ ಪವಿತ್ರಳಾಗಿ ಕೆಳಗೆ ಹರಿದಳು |

ನುಗ್ಗಿ ಬಂದ ರಭಸ ತಡೆದು ಶಿವ ಜಟೆಯಲಿ ಬಂಧಿಸಿದ ||

ಭಗೀರಥ ಮಾಡಿದ ಘೋರ ತಪಕೆ ಮೆಚ್ಚಿ ಕೆಳಗೆ ಕಳುಹಿದ |

ಸಂಗ ತೊರೆಯಲು ಮನವಿಲ್ಲದೆ ದೇವಲೋಕ ಬಿಟ್ಟು ಇಳಿದಳು |

ಸಾಗಿ ಬಂದು ಜಹ್ನುಋಷಿ ಆಶ್ರಮವ ತೇಲಿಸಿದಳು |

ಗಂಗೆಯನು ತೀರ್ಥವೆಂದು ಆಪೋಶನದಿ ಸಕಲ ಸ್ವೀಕರಿಸಿದ ||

ಸುಜ್ಞಾನಿಗಳು ಪಾವನವಾದುದ್ದು ಎಂದು ಬಿಟ್ಟಗಲರು ||

ವಿಜ್ಞಾಪಿಸಲು ಭಗೀರಥ ಕಿವಿಯಿಂದ ಹೊರಹೊರಟಳು ಜಾಹ್ನವಿ |

ಮಂಗಳೆ ಕೆಳಗೆ ಹರಿದು ಭುವಿ ಪಾತಾಳದಿ ಲೋಕ ಪಾವನಗೊಳಿಸಿ ||

ಸಗರ ಕುಲ ಬಾಂಧವರನ್ನೆಲ್ಲಾ ಉದ್ಧರಿಸಿದ ಸುಚರಿತನ ಗಾಥಾ |

ಗಗನದ ಸುರನದಿ ಭೂಮಿಲಿ ಪಾಪ ಕಳೆವ ಗಂಗೆ ||

ಜಗದೋದ್ಧಾರಕ ಶ್ರಿಕೃಷ್ಣವಿಠ್ಠಲನ ಪ್ರೇಮ ಕುವರಿಯಾದಳು ||

401. ಪುಟ್ಟದ ದೇಶವಿಲ್ಲ ಧರಿಸದ ದೇಹವಿಲ್ಲ |

ಮುಟ್ಟದ ಗ್ರಾಸವಿಲ್ಲ ತಿರುಗದ ಸ್ಥಳವಿಲ್ಲ ||

ಬಟ್ಟ ಬಯಲಲ್ಲೂ ನೀನೇಜೊತೆ |

ಹುಟ್ಟಿದ ಸ್ಥಿತಿಯಲ್ಲೂ ನೀನೇಜೊತೆ ||

ಹುಟ್ಟಿದ ಮೇಲೆ ಹೊಟ್ಟೆ ಚಿಂತೆ |

ಹೊಟ್ಟೆಗಾಗಿ ಮಾಡದ ಕೆಲಸವಿಲ್ಲ ||

ಕಟ್ಟದೆ ಬುತ್ತಿ ತಿಂದುಂಡು ತೇಗಿದೆ |

ಜಟ್ಟಿ ನಾನೆಂದು ಎಂಟರಿಂದ ಬೀಗಿದೆ ||

ಕಟ್ಟಕಡೆಗೆ ನಿನ್ನ ಪಾದವೇ ಗತಿಯೆಂದೆ |

ಸತ್ಯದಾಣೆಗೂ ಮುಂದೆ ಎಲ್ಲಿ ಹೇಗೆಂದರಿಯೆ ||

ಖಟ್ವಾಂಗನಂದದಿ ನಿನ್ನ ಸೇರಲರಿಯೆ |

ಕಟ್ಟಿ ಎಳೆದೊಯ್ವಾಗ ನಿನ್ನ ಸ್ಮರಣೆ ಸಾಕು ||

ಇಷ್ಟುಮಾತ್ರ ಪಾಲಿಸು ಶ್ರೀಕೃಷ್ಣವಿಠ್ಠಲನೇ ||

402. ಯಾರು ಬಂದಾರಮ್ಮಾ ನಮ್ಮ ಮನೆಗಿಂದು |

ಪೋರ ಗೋಪಲಕೃಷ್ಣ ಬಂದಾನಮ್ಮ ||ಪ||

ಸುಳಿಸುಳಿದಾಡುತಾ ನಲಿನಲಿಡಾಡುತಾ |

ಮೆಲ್ಲ ಮೆಲ್ಲನೆ ಬಂದು ಸುತ್ತಲೂ ನೋಡುತಾ ||

ನೆಲುವಿನಲ್ಲಿದ್ದ ಹಾಲು ಮೊಸರನೆ ಮೆದ್ದ |

ಕಳ್ಳನ ಹಿಡಿಯಲು ಓಡಿ ಓಡಿ ದಣಿದೇವಮ್ಮಾ ||1||

ಕೋಲು ತರಲು ತನಗೇನೂ ಗೊತ್ತಿಲ್ಲಮ್ಮಾ ಸೊಲ್ಲ |

ಸುಳ್ಳು ಹೇಳುತ್ತಾ ಕನ್ಣೀರ ತುಂಬಿದ ಅಮಾಯಕ ||

ಗಲ್ಲ ಉಬ್ಬಿಸಿ, ತುಟಿ ಕಚ್ಚಿ ಕೆಂಪುಮೋರೆ ಮಾಡಿದ |

ಚೆಲ್ವ ಶ್ರೀಕೃಕಷ್ಣವಿಠ್ಠಲನೇ ಸಕಲ ಚಿತ್ತ ಚೋರನಮ್ಮಾ ||2||

403. ಅನೇಕಾನೇಕ ರೂಪಿ ಪರಮಾತ್ಮನಿಗೆ ನಮ: |

ಅನೇಕಾನೇಕ ಶಿರ, ನೇತ್ರ, ಪಾದ, ಬಾಹುವಿಗೆ ನಮ: ||

ಅನೇಕಾನೇಕ ಹೆಸರಿನ ಪುರುಷ ಶಾಶ್ವತನೇ ನಮ: |

ಅನೇಕನೇಕ ಕೋಟಿ ಯುಗಗಳಲ್ಲವ ತರಿಸುವ ಶ್ರೀಕೃಷ್ಣವಿಠ್ಠಲನೇ ನಮೋನಮ: ||

404. ಒಂದರಸುಖ (ಸ್ವರೂಪ) ಸವಿಯಲು ಎರಡನು ತಿಳಿ | (ಪ್ರವೃತ್ತಿ & ನಿವೃತ್ತಿ)

ಮುದದಿ ಮುರನು (ಜ್ಞಾನಭಕ್ತಿ, ವೈರಾಗ್ಯ), ಪಡೆಯಲು ನಾಲ್ಕುರೀತಿ ಪಾಲಿಸಿ ||(ಧರ್ಮದಿ)

ಐದನ್ನು (ಪಂಚೇಂದ್ರಿಯ) ತುಳಿದು ಆರನ್ನು ತ್ಯಜಿಸಿ | (ಕಾಮಾದಿ)

ಒದ್ದು ಏಳನ್ನು (ಸಪ್ತದೋಷ), ಎಂಟನ್ನು ಪರಿತ್ಯಾಗಿಸಿ || (ಅಷ್ಟಮದ)

ಒಂದೇ ಮನದಿ ಒಂಬತ್ತರಿಂದ (ನವವಿಧಭಕ್ತಿ), ಹತ್ತಾಗುವುದೇ | (ಪೂರ್ಣಜ್ಞಾನಿ)

ಬದುಕಿನ ಗುರಿ ಶ್ರೀಕೃಷ್ಣವಿಠ್ಠಲನ ಸೇರುವ ಸುಲಭದಾರಿ ||

405 ದಾರಿಯ ತೋರೋ ಮುಕುಂದ ಎನಗೆ ಬೇರ್ಯಾರು ತೋರುವರಿಲ್ಲ |

ಉದ್ಧವಗೆ ಉಪದೇಶಿಸಿದೆ ತತ್ವವ ||

ಯುದ್ಧ ಬೇಡೆಂದರ್ಜುನಗೆ ಬೋಧಿಸಿದೆ ಧರ್ಮವ |

ಭೀಷ್ಮರಿಗೆ ತೋರಿ ನಿಜರೂಪ ಮುಕ್ತಿಯಿತ್ತೆ ||

ಕಷ್ಟದಿ ದ್ರೌಪದಿಯ ಮಾನವ ಕಾಯ್ದೆ |

ಸಕಲರ ಇಷ್ಟಾನಿಷ್ಟ ಬಲ್ಲ ಸರ್ವಜ್ಞನೇ ||

ಶ್ರೀಕೃಷ್ಣವಿಠ್ಠಲ ಎನಗೆ ದಾರಿ ತೋರದಿರೆ ಆಣೆ ನಿನಗೆ ||

406. ಎನಗೆ ಎಳೆತ ಸಕಲ ಕಡೆಗಳಿಂದಲು ಎಳೆತ |

ನಿನಗೆ ತಿಳಿಯದೇ ನಾ ಹೇಗೆ ಧ್ಯಾನಿಸಲಿ ನಿನ್ನ ||ಪ||

ನಿನ್ನ ಬಿಟ್ಟು ಅನ್ಯದರಲ್ಲಿ ಸದಾ ಸೆಳೆತ |

ಮನ ಮತ್ತು ಶರೀರ, ಸತಿ ಆತ್ಮಜರಲಿ ||

ಮನೆ ಮತ್ತು ಆಪತ್ತು ಸಮಾಜ ರಾಷ್ಟ್ರದಲಿ |

ಧನ ಮತ್ತು ಕನಕ ಸೇವಕ ಆತ್ಮೀಯರಲಿ ||1||

ತ್ರೀಗುಣದಲಿ ಸಿಲುಕಿ ಸುತ್ತುತಿರುವೆ ಸದಾ |

ಸಂಗರಹಿತಳಾಗಲು ಆಗದೆ ಒದ್ದಾಡುತಿರುವೆ ||

ಸುಜ್ಞಾನ ಪಡೆಯದೆ ಜನುಮ ವ್ಯರ್ಥವಾಗುತಿದೆ |

ಸುಗುಣಾಂತರಂಗ ಶ್ರೀಕೃಷ್ಣವಿಠ್ಠಲ ಎನ್ನ ಪಾರುಮಾಡು ||2||

407. ಸರಿಯುವುದು ಸಮಯ ಅರಿವಿಲ್ಲದೆ |

ಮರೆಯದೆ ಮುನ್ನ ಮಾಡು ಹರಿಸೇವೆ ||

ಸದಾ ಶ್ರವಣ ನಿರುತನಾಗು ಹರಿಕಥೆಯಲಿ |

ಸದಾ ಕೀರ್ತಿಸು ಚಿತ್ತದಿ ಹರಿಮಹಾತ್ಮೆಯಾ ||

ಸದಾ ಧ್ಯಾನಿಸು ಅಂತ್ಯವಿಲ್ಲದ ಹರಿ ಗುಣಗಳ |

ಸದಾ ದೃಷ್ಟಿಸು ಒಲುಮೆಯಿಂ ಹರಿ ಸರ್ವತ್ರದಿ ||

ಸದಾ ಮಾಡಿದ ಕೆಲಸವ ಹರಿಗರ್ಪಿಸು |

ಸದಾ ಓಡಾಡುವುದು ಹರಿ ತೀರ್ಥಯಾತ್ರೆ ||

ಸದಾ ಅಘ್ರಾಣಿಸು ಭಕ್ತಿಯಿಂ ಹರಿ ನಿರ್ಮಾಲ್ಯವ |

ಸದಾ ಸೇವಿಸು ಪ್ರೀತಿಯಿಂ ಹರಿ ಪ್ರಸಾದವ ||

ಸದಾ ಸತ್ಕರ್ಮಾಚರಣೆಯೇ ಉಸಿರಾಗಲಿ |

ಸದಾ ನಡೆಯುವುದೆಲ್ಲಾ ಹರಿ ಪ್ರೇರಣೆಯೆನ್ನು ||

ಸಚ್ಚಿದಾನಂದಾತ್ಮ ಶ್ರೀಕೃಷ್ಣವಿಠ್ಠಲನೊಲಿವ ||

408. ಅಂತರಂಗದಿ ಪೊಳೆವ ಚಿನ್ಮಯ ವಚನಾತೀತ |

ಅತೀ ಶಕ್ತ ಸುಜೀವಿಗಳ ವೈಕುಂಠದಲ್ಲಿಡುವ ||

ಚೇತನ ಪರಮಾಧೀನ ಎನ್ನ ಕರ, ಚರಣ, ಪ್ರಾಣ |

ಆತ್ಮಸ್ಥ ಪುರುಷ ಶ್ರೀಕೃಷ್ಣವಿಠ್ಠಲ ನಿನಗೆ ನಮೋನಮ: ||

409 ಮುಂಜಾವಿನಲಿ ನಾರಾಯಣ ನಾರಾಯಣ ಎಂದೆನ್ನುತ್ತಾ ||ಪ||

ಎದ್ದು ತುಳಸೀಲಿ ಕೃಷ್ಣನ ವಂದಿಸಿ ||

ಶೌಚದಲಿ ಕೇಶವನ ನೆನೆಸಿ ಮೃತ್ತಿಕಾಶೌಚದಲಿ ತ್ರಿವಿಕ್ರಮನ ||1||

ದಂತಧಾವನ ಕಾಲದಲಿ ಆಷ್ಟಬಾಹುಗಳ ಹರಿಯ ನೆನಿಸಿ |

ವದನ ತೊಳೆವಾಗ ಮನಸಾ ಮಾಧವನ ಸ್ಮರಿಸಿರಿ ||2||

ಸ್ತನ್ಯ ಪಾನ ಮಾಡಿಸುವಾಗ ಬಾಲಕೃಷ್ಣನ ಸ್ಮರಿಸಿ |

ಮಕ್ಕಳಾಡಿಸುವಾಗ ಅಕ್ಕರದಿ ಯಶೋದೆ ನಂದನ ನೆನೆಸಿರಿ ||3||

ಮೃತ್ತಿಕಾ ಸ್ನಾನದಿ ವರಾಹ ಸ್ವಾಮಿ ಸ್ಮರಿಸಿ |

ವಸ್ತ್ರ ಧರಿಸುವಾಗ ಉಪೇಂದ್ರನ ನೆನೆಯಿರಿ ||4||

ತುಲಸಿ ತೆಗೆವಾಗ ದಾಶರಥ ನಂದನ ಸ್ಮರಿಸಿ |

ಹೂ ಬಿಡಿಸುವಾಗ ಯದುಕುಲ ಚಂದ್ರನ ನೆನೆಯಿರಿ ||5||

ಶುದ್ಧ ವಸ್ತ್ರದಿ ವಾಸುದೇವನ ಸದಾ ಸ್ಮರಿಸಿ |

ಕೇಶವನ ಊರ್ಧ್ವ ಪುಂಡ್ರಧಾರಣೆ ಕಾಲದಿ ಸ್ಮರಿಸಿ ||6||

ಮುದ್ರಾಧಾರಣ ಕಾಲದಿ ಕೃದ್ಧೋಲ್ಕರ ನೆನೆದು |

ಆಪೋಶನ ಸಮಯದಿ ಶ್ರೀಹರಿಯ ನೆನೆಯಿರಿ ||7||

ಉಪವಿತ ಧರಿಸುವಾಗ ವಾಮನನ ಸ್ಮರಿಸಿ |

ಪಾದಯಾತ್ರೆಯಲಿ ಜಾಮದಗ್ನಿ ನೆನೆಯಿರೋ ||8|||

ಮಂಗಳಾರತಿ ಸ್ವೀಕರಿಸುವಾಗ ಭಾರ್ಗವನ ನೆನೆಸಿ |

ತೀರ್ಥಪ್ರಾಶನ ಕಾಲದಿ ರಾಮಾ,ಕೃಷ್ಣಾ, ವಾಸುದೇವ ಎನ್ನಿರಿ ||9||

ಶಂಖೋದಕ ಪ್ರೋಕ್ಷಣೆಯಲಿ ಮುಕುಂದನ ಸ್ಮರಿಸಿ |

ಭೋಜನ ಕಾಲದಿ ಭಕ್ಷ್ಯದಲ್ಲಿ ಅಚ್ಯುತನ ನೆನೆಯಿರಿ ||10||

ಶಾಕದಲಿ ಧನ್ವಂತರಿಯ ಮರೆಯದೇ ಸ್ಮರಿಸಿ |

ಪರಮಾನ್ನದಿ ಪಾಂಡುರಂಗನ ನೆನೆಸಿರಿ ||11||

ಬೆಣ್ಣೆಯಲಿ ಕೃಷ್ಣನ ತುಪ್ಪದಲಿ ದಾಮೋದರನ ಸ್ಮರಿಸಿ |

ಎಣ್ಣೆಭಕ್ಷ್ಯದಲಿ ವಿಷ್ಣು ಮತ್ತು ಮೊಸರಲಿ ವಾಮನನ ಸ್ಮರಿಸಿರಿ ||12||

ಕ್ಷೀರಪಾನದಿ ಶ್ರೀನಿವಾಸನ ನೆನಸಿ ಫಲ ಭಕ್ಷಿಸಿ |

ಜಲಪಾನೇ ಬಾಲಕೃಷ್ಣಂ ಮಧುಪಾನೇ ತ್ರಿವಿಕ್ರಮನ ನೆನೆಸಿ ||13||

ಪಾನಕದಿ ನಾರಸಿಂಹನ ಮಾರ್ಗಮಧ್ಯೆ ಗರುಡಾರೂಢ ಶ್ರೀಹರಿಯ |

ಪ್ರೀತಿಯಿಂ ಚುಂಬಿಸುವಾಗ ವೇಣುನಾದ ಪ್ರಿಯನ ನೆನೆಸಿರಿ ||14||

ಹೆಂಡತಿಯೊಡನೆ ಸರಸದಿ ಗೋಪಿವಲ್ಲಭನ ನೆನೆಸಿ |

ಶಯನದಿ ಸಂಕರ್ಷಣ ತಾಂಬೂಲದಿ ಅನಿರುದ್ಧನ ಸ್ಮರಿಸಿರಿ ||15|||

ದಕ್ಷಿಣೆ ಕೊಡುವಾಗ ದಕ್ಷಿಣಾಪತಿ ಹರಿಯ ನೆನೆದು |

ಪ್ರದಕ್ಷಿಣೆ ಕಾಲದಿ ಗರುಡಾತ್ಮ ನಾರಾಯಣ ಎನ್ನಿರಿ ||16||

ಅಂಜಿಕೆಯಲಿ ನರಸಿಂಹನ ನೆನೆದರೆ ಅಭಯಪ್ರಾಪ್ತಿ |

ಫಲಹಾರ ಕಾಲದಿ ವಾಸುದೇವನ ನೆನೆದರೆ ಉದರಪೂರ್ತಿ ||17||

ಪಂಚಪ್ರಾಣಾಹುತಿಯಲಿ ಅನಿರುದ್ಧಾದಿ ರೂಪ ನೆನೆದು |

ಸಂಧ್ಯಾಕಾಲದಲಿ ಶ್ರೀರಾಮ ಜಪದಲಿ ದತ್ತ ನಾಮಕನ ನೆನೆಯಿರಿ ||18||

ಪ್ರೀತಿಯಿಂದ ದೊರಕಿದ್ದಾಗ ಶ್ರೀರಾಮಚಂದ್ರನ ದಯದಿ ಎನ್ನಿ |

ದ್ವೇಷದಿಂದ ಆಗಿದ್ದೆಲ್ಲ ಪರಶುರಾಮನ ದಯದಿ ಎನ್ನಿರಿ ||19||

ವಿಜ್ಞಾನ ಸುಜ್ಞಾನ ಪ್ರಾಪ್ತಿಗಾಗಿ ಹಯಗ್ರೀವನ ಸ್ಮರಣೆ |

ಸರ್ವ ಪದಾರ್ಥದಿ ರಮಾಪತಿಯ ನೆನೆಸಿರಿ ||20||

ಸಕಲ ಕಾರ್ಯವೂ ಶ್ರೀಹರಿ ಚಿತ್ತಕ್ಕೆ ಬಂದಂತೆ ಸೈ |

ಎಂದುದಾಸಿನದಿ ಜಗನ್ನಾಥನ ಸ್ಮರಿಸಿರಿ ||21||

ಆಯಾ ವಸ್ತುಗಳಲ್ಲಿ ತನ್ನಾಮ ಹರಿಯು ರೂಪಗಳ ನೆನೆಸಿ |

ಸ್ಮರಿಸಿ ಈ ಬಗೆಯ ಸದಾ ಚಿಂತಿಸುವಗೆ ವಿಷ್ಣಲೋಕ ಪ್ರಾಪ್ತಿ ನಿ:ಸಂಶಯ ||22||

ಕಾಲಕಾಲಕ್ಕೆ ಈಶ ನೀನು ದಾಸ ನಾನೆಂದು ನೆನೆಸಿ |

ಸರ್ವಕಾರ್ಯವನ್ನು ಶ್ರೀಕೃಷ್ಣವಿಠ್ಠಲಗರ್ಪಿಸಿ ನಿಶ್ಚಿಂತರಾಗಿರಿ ||24||

ಸರ್ವತ್ರ ಸರ್ವದಾ ಸರ್ವದರಲ್ಲಿ ಸರ್ವೇಶನ ನೆನೆಸಿ |

ಸರ್ವಜ್ಞನು ಯೋಗ್ಯತಾನುಸಾರ ಫಲಗಳಿತ್ತು ಕಾಯ್ವ ಕರುಣಾಕರ ಶ್ರೀಕೃಷ್ಣವಿಠ್ಠಲ ||24||

410. ನಿತ್ಯಸ್ಮರಿಸಿ ಎಡೆಬಿಡದೆ ಸಕಲ ಕಾರ್ಯದಿ ಸರ್ವತ್ರ |

ಸತ್ಯಸ್ಯ ಸತ್ಯ ದೋಷದೂರನ ನಿಶ್ಚಲಮನದಿ ||

ಬ್ರಾಹ್ಮೀಕಾಲದಲೆದ್ದು ನಾರಾಯಣನ ಸ್ಮರಿಸಿ ಕೃಷ್ಣಪ್ರಿಯೆ ತುಲಸಿಗೆ ನಮಿಸಿ |

ಶೌಚಕಾಲದಿ ಕೇಶವನೆನ್ನಿ ಮೃತ್ತಿಕಾ ಶೌಚದಿ ತ್ರಿವಿಕ್ರಮನ ||

ದಂತಧಾನವದಿ ಚತುರ್ಭುಜ ಶ್ರೀ ಹರಿ ನೆನೆದು |

ಮುಖಪ್ರಕ್ಷಾಲನದಿ ಮಾಧವನ ಮನದಣಿಯ ನೆನೆಯಿರಿ ||

ಮೊಸರಿನಲಿ ವಾಮನರೂಪ ತುಪ್ಪದಿ ಕೃಷ್ಣನ ಸ್ಮರಿಸಿ |

ಮೃತ್ತಿಕೆ ಸ್ನಾನ ಕಾಲಕೆ ವರಾಹನ ವಸ್ತ್ರ ಧಾರಣೆಯಲಿ ಉಪೇಂದ್ರನ ||

ಮಡಿ ವಸ್ತ್ರದಿ ವಾಸುದೇವನ ಸದಾ ಸ್ಮರಿಸಿ |

ಪುಂಡ್ರ ಧಾರಣೆ ಕಾಲಕೆ ಕೃದ್ಧೋಲ್ಕಾದಿ ಹರಿ ನೆನೆಯಿರಿ ||

ರಾಮಕೃಷ್ಣ ವಾಸುದೇವ ತೀರ್ಥಪಾನ ಸಮಯದಿ |

ಸಮದರ್ಶಿ ಮುಕುಂದನ ಶಂಖೋದಕ ಗ್ರಹಣ ಕಾಲದಿ ಸ್ಮರಿಸಿ ||

ಭೋಜನಾದಿ ಭಕ್ಷ್ಯದಿ ಅಚ್ಯುತನೆನ್ನಿ ತುತ್ತಿಗೊಮ್ಮೆ ಗೋವಿಂದನ ಬಿಡದೆ ಸ್ಮರಿಸಿ |

ಗೋಜುಬೀಳದಿರಲು ಶಾಕದಿ ಧನ್ವಂತರಿ ನಾಮ ಸತತ ನೆನೆಸಿ ||

ಸತ್ಕಥಾ ಕಾಲದಿ ವ್ಯಾಸ, ಕೃಷ್ಣ ಹಯಗ್ರೀವನ ಸ್ಮರಿಸಿ |

ಪತ್ರಛೇದನ ಕಾಲದಿ ಶೇಷಶಾಯಿ ನಾರಾಯಣ ಎನ್ನಿ ||

ಗರಿಕೆ ಕೀಳುತ ಮನದಿ ಕಪಿಲ ಸ್ಮರಿಸೆ ಉತ್ತಮ |

ನಾರಾಯಣನ ದ್ವಿಜರಲಿ ಕ್ಷತ್ರಿಯರಲಿ ಅನಿರುದ್ಧನ ಕಾಣಿರೋ ||

ಗೋವಿನಲಿ ವಿಷ್ಣುರೂಪ ವೈಶ್ಯರಲಿ ಪ್ರದ್ಯುಮ್ನರೂಪ |

ಸೇವಕರಲಿ ಮಹಿದಾಸ ಶೂದ್ರರಲಿ ಸಂಕರ್ಷಣ ನೆನೆಯಿರೋ ||

ಅಲ್ಪಜಾತಿ ಪ್ರಾಣಿ ಪಕ್ಷಿಗಳಲಿ ತ್ರಿವಿಕ್ರಮನ ಸ್ಮರಿಸಿ |

ಕಾಲಕಳೆಯದೆ ಸರ್ವತ್ರ ಗೋವಿಂದನ ಕಾಣಿರೋ ||

ಗ್ರಹಣಕಾಲದಿ ಪರಶುರಾಮನ ಕ್ಷತ್ರಿಯರಲ್ಲಿ ಜನಾರ್ದನ: |

ಆಹಾರ ಸೇವನೆ ಆದಿ ಅಂತ್ಯದಿ ಆಪೋಶನ ಕಾಲದಿ ಹರಿಯನೆನೆಯಿರೋ ||

ಸರ್ವಜ್ಞ ಹರಿಯ ಸ್ಮರಿಸಿ ಸಕಲ ಸಮಯದಿ |

ಅರಿತು ಕೇಶವ ಗೋವಿಂದನೆನ್ನಿ ಪ್ರಭಾತದಿ ||

ಮಧ್ಯಾಹ್ನಾಧಿಪತಿ ವಿಷ್ಣುಂ ಅಪರಾಹ್ನದಿ ಮಧುಸೂದನ |

ಸಾಯಂಕಾಲೇ ನೃಸಿಂಹಂ ಪ್ರದೋಶ ಕಾಲದಿ ಹೃಷಿಕೇಶನ ನೆನೆಸಿ ||

ಆದಿಮೂಲ ಅನಂತರೂಪೀ ಪರಮಾತ್ಮನ ನಾಮಗಳ ಪಠಿಸಿ ಸದಾ |

ಹೃತ್ಕಮಲವಾಸಿ ಶ್ರೀಕೃಷ್ಣವಿಠ್ಠಲ ಸ್ಮರಿಸಿ ಪಡೆಯಿರಿ ಸಕಲ ಫಲವ ||

ಸರ್ವಕಾಲದಿ ವಾಸುದೇವನ ಸದಾ ನೆನೆಯಲು |

ಸರ್ವತ್ರ ವ್ಯಾಪ್ತ ಸದಾನಂದ ಶ್ರೀಕೃಷ್ಣವಿಠ್ಠಲ ಪಂಚವಿಧ ಮುಕ್ತಿನೀವ ||

...

411. ಎನ್ನನುದ್ಧರಿಸೋ ಸ್ವಾಮಿ ಶ್ರೀಕೃಷ್ಣವಿಠ್ಠಲಾ ||ಪ||

ಮನ್ನಿಸಿ ಸಕಲ ತಪ್ಪುಗಳ ಬಿಡದೆ ಕಾಯೋ ಶ್ರೀಕೃಷ್ಣವಿಠ್ಠಲಾ ||ಅಪ||

ಚಂದನ ಚರ್ಚಿತ ಸುಂದರವದನ |

ಮಂದಸ್ಮಿತ ನಿಮಿಲನೇತ್ರ ಮುಕುಟಧರನೇ ||

ಎನ್ನನುದ್ಧರಿಸೋ ಸ್ವಾಮಿ ಶ್ರೀಕೃಷ್ಣವಿಠ್ಠಲಾ ||1||

ನಡುವಿಗೊಡ್ಯಾಣ ಮಕರಕುಂಡಲ ಧಾರಿನ್ |

ಕಡಗ ಕಂಕಣ ನೂಪುರ ಘಿಲ್ಲೆನ್ನುವ ವರಾಭಯಪ್ರದ ||

ಎನ್ನನುದ್ಧರಿಸೋ ಸ್ವಾಮಿ ಶ್ರೀಕೃಷ್ಣವಿಠ್ಠಲ ||2||

ಬ್ರಹ್ಮಾಂಡ ಪಿಂಡಾಡ ಸರ್ವವ್ಯಾಪ್ತಾ ಸರ್ವೇಶ |

ಅಮರ ಸುರಗಣ ಸರ್ವವಂದ್ಯ ಸುಪೂಜಿತ ||

ಎನ್ನನುದ್ಧರಿಸೋ ಸ್ವಾಮಿ ಶ್ರೀಕೃಷ್ಣವಿಠ್ಠಲ ||3||

ಲೋಕೈಕನಾಥ ಸಮಸ್ತ ದೋಷದೂರ |

ಲಕ್ಷ್ಮೀಪತಿ ಶೇಷಶಾಯಿನ ಯೋಗೇಶ್ವರ ||

ಎನ್ನನುದ್ಧರಿಸೋ ಸ್ವಾಮಿ ಶ್ರೀಕೃಷ್ಣವಿಠ್ಠಲ ||4||

ಜಗತ್ ಪರಿಪಾಲಕ ಸತ್ಯಸ್ಯ ಸತ್ಯ |

ಸ್ವಗತ ಭೇದವಿವರ್ಜಿತ ಸ್ವತಂತ್ರರೂಪಿ ||

ಎನ್ನನುದ್ಧರಿಸೋ ಸ್ವಾಮಿ ಶ್ರೀಕೃಷ್ಣವಿಠ್ಠಲ ||5||

ದೇಶ ಕಾಲ ಗುಣತ: ಸರ್ವಸಾಕ್ಷಿ ಏಕೈಕ |

ನಾಶರಹಿತ ಸರ್ವಶಕ್ತ ಅನಂತ ಗುಣಿ ||

ಎನ್ನನುದ್ಧರಿಸೋ ಸ್ವಾಮಿ ಶ್ರೀಕೃಷ್ಣವಿಠ್ಠಲ ||6||

ಆನಂದ ವಿಮಲ ಜ್ಞಾನ ಸಾಗರ |

ಚಿನ್ಮಯರೂಪ ಸಂಸಾರ ಭವತಾಕರ ||

ಎನ್ನನುದ್ಧರಿಸೋ ಸ್ವಾಮಿ ಶ್ರೀಕೃಷ್ಣವಿಠ್ಠಲ ||7||

ಸ್ಮರಣಾತ್ ಸದಾ ವಂದ್ಯ ಪಾವನರೂಪ |

ಸ್ಫುರೇತ್ ಹೃದ್ಗುಹೇ ನಿಜ ಬಿಂಬರೂಪ ||

ಎನ್ನನುದ್ಧರಿಸೋ ಸ್ವಾಮಿ ಶ್ರೀಕೃಷ್ಣವಿಠ್ಠಲ ||8||